សង្គ្រាមអ៊ីស្រាអែល-ហាម៉ាស៖ អ.ស.ប.អនុម័ត “បទឈប់បាញ់មនុស្សធម៌”នៅហ្កាហ្សា
ថ្ងៃទី ២៧តុលា ២០២៣ ពោលគឺ ២១ ថ្ងៃក្រោយសង្គ្រាមក្នុងតំបន់ហ្កាហ្សាបានផ្ទុះឡើង អង្គការសហប្រជាជាតិបានបោះឆ្នោត ក្នុងសំឡេងភាគច្រើន ទាមទារឱ្យអ៊ីស្រាអែល “ឈប់បាញ់ភ្លាមដើម្បីមនុស្សធម៌”។ អ៊ីស្រាអែលដែលកំពុងតែពង្រីកប្រតិបត្តិការវាយលុកចូលក្នុងតំបន់ហ្កាហ្សា អាក់អន់ចិត្តយ៉ាងខ្លាំងនឹងសេចក្តីសម្រេចរបស់អង្គការសហប្រជាជាតិនេះ។
ចុះផ្សាយនៅថ្ងៃ៖
ស្តាប់ - ០៣:០៣
បន្ទាប់ពីបរាជ័យផ្ទួនៗដល់ទៅបួនលើកក្នុងរយៈពេលតែ១០ថ្ងៃនៅក្រុមប្រឹក្សាសន្តិសុខមក អង្គការសហប្រជាជាតិបានប្រជុំគ្នាស្វែងរកសេចក្តីសម្រេចចិត្តឱ្យសំណុំរឿងសង្គ្រាមអ៊ីស្រាអែល-ហាម៉ាសនៅហ្កាហ្សាម្តង។ នៅថ្ងៃសុក្រទី២៧តុលា មហាសន្និបាតអង្គការប្រជាជាតិបានបោះឆ្នោតអនុម័តសេចក្តីសម្រេចចិត្ត ក្នុងសំឡេងភាគច្រើនក្រោមស្នូរទះដៃយ៉ាងកងរំពង។ ក្នុងចំណោមសមាជិកទាំង១៩៣ប្រទេស មាន១២០ប្រទេសបានបោះឆ្នោតគាំទ្រ ៤៥ប្រទេសអនុប្បវាទ និង១៤ប្រទេសដែលមានអ៊ីស្រាអែលនិងអាមេរិកផងបានប្រឆាំង។
សេចក្តីសម្រេចចិត្តដែលគ្មានលក្ខណៈចាប់បង្ខិតបង្ខំឱ្យគោរព ទាមទារឱ្យមានការផ្អាកបាញ់មនុស្សធម៌ ភ្លាម ជានិរន្តនិងស្ថិតស្ថេរ ដើម្បីឈានដល់ការបិទបញ្ចប់ប្រតិបត្តិការយោធាទាំងស្រុង។ ជាមួយនឹងការថ្កោលទោសរាប់គ្រប់ទង្វើហិង្សា មានជាអាទិ៍ទង្វើបែបភេរវកម្មនិងការវាយប្រហារ លើជនស៊ីវិលប៉ាឡេស្ទីននិងអ៊ីស្រាអែល សេចក្តីសម្រេចចិត្តដែលគ្មានពាក្យហាម៉ាសមួយម៉ាត់ ផ្តោតសំខាន់ទៅលើស្ថានភាពមនុស្សធម៌នៅតំបន់ហ្កាហ្សា ដោយស្នើឱ្យមានការផ្តល់ភ្លាមនូវ ទឹកស្បៀងអាហារ ប្រេង ភ្លើងអគ្គិសនី ដោយគ្មានការរារាំង។
ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិបានផ្ទុះអំណរនិងថ្លែងអំណរគុណអង្គមហាសន្និបាតដែលសេចក្តីក្លាហានសុំឱ្យបញ្ឈប់សង្គ្រាម បញ្ឈប់ការសម្លាប់រង្គាលប្រជាពលរដ្ឋប៉ាឡេស្ទីន។ ចលនាហាម៉ាសក៏ស្វាគមសេចក្តីសម្រេចចិត្តអង្គការប្រជាជាតិដែរ ដោយជំរុញឱ្យការផ្តល់ជំនួយមនុស្សធម៌ដល់ជនស៊ីវិលចាប់ដំណើរការភ្លាម។
ប៉ុន្តែសម្រាប់អ៊ីស្រាអែលដែលក្រេវក្រោធ អ៊ីស្រាអែលបានប្រកាសចាត់ទុកសេចក្តីសម្រេចចិត្តអង្គការប្រជាជាតិថាជាសេចក្តីសម្រេចដ៏ទុយ៌ស ជាថ្ងៃដ៏អាប់អួរសម្រាប់អង្គការសហប្រជាជាតិនិងមនុស្សជាតិ។ ឯកអគ្គរដ្ឋទូតអ៊ីស្រាអែលបានសន្យាបន្តប្រើគ្រប់មធ្យោបាយដែលខ្លួនមាន ដើម្បីកម្ទេចចលនាហាម៉ាសពីពិភពលោក។
ជាការពិត ក្នុងយប់ថ្ងៃសុក្រខណៈដែលអង្គការសហប្រជាជាតិកំពុងអនុម័តសេចក្តីសម្រេចចិត្តនោះ ផ្ទៃមេឃលើតំបន់ហ្កាហ្សាបានឡើងលឿងទុំនិងក្រហមព្រាត ព្រោះយោធាអ៊ីស្រាអែលបន្តនិងបង្កើនផ្លោងវាយប្រហារតាមផ្លូវអាកាសកាន់តែសន្ធាប់ខ្លាំងផង ពង្រីកប្រតិបត្តិការវាយលុកតាមផ្លូវគោកផង។ កងទ័ពអ៊ីស្រាអែលបានអះអាងថាការវាយប្រហារលើហ្កាហ្សាបានសម្រេចលទ្ធផលគួរជាទីកត់សម្គាល់មែនទែន។ ផ្ទាំងស៊ីបក្រោមដី ខ្លះជារូងផ្លូវខ្លះជាទីតាំងប្រយុទ្ធរបស់ពួកហាម៉ាសចំនួន១៥០កន្លែងនៅខាងជើងហ្កាហ្សាត្រូវបានបំផ្លាញមេបញ្ជាការនៃកងទ័ពអាកាសហាម៉ាសម្នាក់ត្រូវបានសម្លាប់។ ខាងហាម៉ាសបានប្រកាសថាអាគារនិងផ្ទះសម្បែងរាប់រយខ្នងបានបាក់រលំខ្ទេចខ្ទីនៅយប់មិញដោយគ្រាប់ផ្លោងអ៊ីស្រាអែល បណ្តាញទូរគមនាគមន៍និងអ៊ីនធ័រនែតត្រូវបានកាត់ផ្តាច់នៅហ្កាហ្សា។ អ្នកកាសែត ភ្នាក់ងារនានាអង្គការសហប្រជាជាតិ លែងអាចទាក់ទងក្រុមការងាររបស់ខ្លួននៅក្នុងតំបន់ហ្កាហ្សាបានទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ