លោកម៉ាក្រុង ទៅជួបព្រះចៅហ្សកដានី និងប្រធានាធិបតីអេហ្ស៊ីប ស្វែងរកដំណោះស្រាយជួយប៉ាឡេស្ទីន
បន្ទាប់ពីបានជួបជាមួយថ្នាក់ដឹកនាំនយោបាយអ៊ីស្រាអែល នៅទីក្រុងហ្សេរុយសាឡឹម និងបានជួបជាមួយលោកប្រធានាអាជ្ញាធរប៉ាឡេស្ទីនម៉ាសមូដ អាបាស នៅក្រុងរ៉ាម៉ាឡាកាលពីថ្ងៃអង្គារទី២៤តុលា លោកម៉ាក្រុង បានបន្តដំណើរទៅរាជធានីអាំម៉ាន់ ជួបជាមួយព្រះចៅអាប់ដាឡាទី២ នៅថ្ងៃពុធទី២៥តុលា។ ចេញពីហ្សកដានី លោកម៉ាក្រុង បានហោះឆ្ពោះទៅទីក្រុងគែរប្រទេសអេហ្ស៊ីប ដើម្បីជួបជាមួយលោកប្រធានាធិបតី អាប់ឌែល ហ្វាតា អាល់ស៊ីស៊ី។
ចុះផ្សាយនៅថ្ងៃ៖
ស្តាប់ - ០៤:៤២
កន្លងមក អេហ្ស៊ីបធ្លាប់ដើរតួនាទីសំខាន់ ក្នុងការសម្របសម្រួលវិបត្តិ រវាងអ៊ីស្រាអែលនិងប៉ាឡេស្ទីន។ ជាងនេះទៀត លោកម៉ាក្រុងក៏ចង់បានការជួយជ្រោមជ្រែងពីអេហ្ស៊ីបដែរ នៅក្នុងការរកវិធីចរចា ដោះលែងចំណាប់ខ្មាំងជនជាតិបារាំង ដែលកំពុងស្ថិតក្នុងដៃរបស់ក្រុមហាម៉ាស។ បន្ថែមពីនេះ ច្រកព្រំដែនរ៉ាហ្វា រវាងអេហ្ស៊ីបនិងហ្កាហ្សា គឺជាច្រកតែមួយគត់ ដែលគេអាចធ្វើដំណើរដឹកស្បៀង ចូលទៅជួយប្រជាជននៅហ្កាហ្សា។
នៅរដ្ឋធានីអាំម៉ាន់ ព្រះចៅអាប់ដាឡាទី២ បានថ្លែងប្រាប់ទៅលោកម៉ាក្រុង ដោយសុំឲ្យមហាអំណាចធំៗទាំងអស់ រួមគ្នាដាក់សំពាធទៅលើអ៊ីស្រាអែល ឲ្យអ៊ីស្រាអែលឈប់បាញ់ប្លោងមីស៊ីល ទៅលើតំបន់ហ្កាហ្សាតទៅទៀត ហើយត្រូវតែឈប់បិទខ្ទប់តំបន់នេះ ព្រោះថាប្រជាជនប៉ាឡេស្ទីនប្រមាណ២លាន៣សែននាក់ កំពុងស្ថិតនៅក្នុងស្ថានភាពលំបាកវេទនាជាទីបំផុត។ ផ្អែកតាមលិខិតប្រកាសនៃព្រះបរមរាជវាំងហ្សកដានី ព្រះចៅអាប់ដាឡាទី២ បានប្រាប់ទៅលោកម៉ាក្រុងទៀត ថាបើអ៊ីស្រាអែលនៅតែបន្តសង្គ្រាមនេះ គឺវានឹងឆេះរាលដាល ទូទាំងតំបន់ជាក់ជាមិនខាន។
សូមរំលឹកថា មានមនុស្សប្រមាណ១៤០០នាក់ ដែលត្រូវបានក្រុមហាម៉ាស សម្លាប់យ៉ាងសាហាវព្រៃផ្សៃបំផុត នៅក្នុងទឹកដីអ៊ីស្រាអែល កាលពីថ្ងៃទី៧តុលា។ ក្រុមហាមាសបានចាប់ចំណាប់ខ្មាំងមនុស្សចំនួនជាង២០០នាក់ថែមទៀត។ អ៊ីស្រាអែលបានវាយបកវិញ ដោយបានបាញ់ប្លោងមីស៊ីលយ៉ាងដំណំទៅលើតំបន់ហ្កាហ្សា បណ្តាលឲ្យស្លាប់មនុស្សជាង ៦៥០០នាក់ ក្នុងនោះមានកុមារ ២៧០៤នាក់។ នេះបើផ្អែកតាមអាជ្ញាធរសុខាភិបាលនៅហ្កាហ្សា។
លោកម៉ាក្រុងបានទៅជួបថ្នាក់ដឹកនាំនយោបាយអ៊ីស្រាអែល នៅថ្ងៃអង្គារទី២៤តុលា ហើយលោកបានថ្លែងការចូលរួមសាមគ្គីគាំទ្រចំពោះអ៊ីស្រាអែល ដែលបានរងគ្រោះ ដោយការវាយប្រហាររបស់ក្រុមភេរវកម្មអាម៉ាស និងបានអះអាងថា អ៊ីស្រាអែលមានសិទ្ធិការពារខ្លួននិងវាយបកវិញដោយស្របច្បាប់។ តែទន្ទឹមនឹងនេះ លោកម៉ាក្រុង បានអំពាវនាវឲ្យភាគីអ៊ីស្រាអែល ថ្លឹងថ្លែងរកដំណោះស្រាយ ជួយសង្គ្រោះជីវិតជនស្លូតត្រង់ប៉ាឡេស្ទីននៅហ្កាហ្សា។ លោកម៉ាក្រុង បានទទូចសុំឲ្យភាគីអ៊ីស្រាអែល បើកចរន្តអគ្គិសនីប្រើឲ្យមន្ទីរពេទ្យនៅហ្កាហ្សា ព្រមទាំងបើកច្រកផ្លូវ ដឹកទឹកនិងស្បៀងអាហារចូលទៅហ្កាហ្សា។ នៅឯក្រុងរ៉ាម៉ាឡា ពេលជួបជាមួយលោកម៉ាសមូដ អាបាស ប្រធានអាជ្ញាធរប៉ាឡេស្ទីន លោកម៉ាក្រុងបានថ្លែងបញ្ជាក់ថា “សម្រាប់បារាំង ជីវិតប្រជាជនប៉ាឡេស្ទីន គឺមានតម្លៃស្មើជីវិតប្រជាជនអ៊ីស្រាអែល”។
គួរកត់សំគាល់ថា ដំណើរទៅជួបភាគីពាក់ព័ន្ធទាំងអស់ នៅក្នុងជម្លោះអ៊ីស្រាអែល-ប៉ាឡេស្ទីន គឺលោកម៉ាក្រុងបានធ្វើឡើងនៅក្នុងកម្មវត្ថុមួយ ចង់រក្សាតុល្យភាព ដោយមិនចង់ឲ្យគេចោទថាបារាំងកាន់ជើងតែម្ខាង។ ពោលគឺបារាំងចង់ប្រកាសជំហរសាមគ្គីជាមួយអ៊ីស្រាអែល ដែលរងគ្រោះដោយការវាយប្រហារភេរវកម្ម តែទន្ទឹមនឹងនេះ បារាំងចង់ឲ្យភាគីអ៊ីស្រាអែល គិតពីបញ្ហាមនុស្សធម៌។ ជាងនេះទៀត លោកម៉ាក្រុងចង់ជំរុញឲ្យគ្រប់ភាគី ឆក់ឱកាសនេះស្វែងរកដំណោះស្រាយសន្តិភាព បង្កើតរដ្ឋប៉ាឡេស្ទីន រស់នៅដោយស្មើភាពនិងសុខសាន្តក្បែរអ៊ីស្រាអែល។ យ៉ាងណាមិញ ពេលជួបជាមួយលោកនេតាន់យ៉ាហ៊ូ លោកម៉ាក្រុងបានថ្លែងថា “គ្មានឡើយសន្តិភាពជារៀងដរាប ប្រសិនបើគ្មានការទទួលស្គាល់សិទ្ធិដ៏ស្របច្បាប់របស់ប្រជាជនប៉ាឡេស្ទីន នៅក្នុងការមានប្រទេសមួយឯករាជ្យ ទេនោះ។
ដោយឡែក លោកម៉ាក្រុងបានស្នើទៅភាគីអ៊ីស្រាអែល ថាបារាំងចង់ផ្តួចផ្តើមគំនិត បង្កើតសម្ព័ន្ធភាពអន្តរជាតិ ដោយមានប្រទេសអារ៉ាប់ចូលរួមដែរ ដើម្បីប្រយុទ្ធបោសសំអាតក្រុមភេរវកម្មហាម៉ាស។ សម្ព័ន្ធភាពនេះគឺយកគម្រូតាមសម្ព័ន្ធភាពអន្តរជាតិ បោសសំអាតក្រុមជីហាតអង្គការរដ្ឋអ៊ីស្លាម នៅស៊ីរីនិងអ៊ីរ៉ាក់។ ទាក់ទិននឹងចំណុចនេះ មានមតិជាច្រើនបានលើកឡើងថា មិនយល់ពីគំនិតរបស់លោកម៉ាក្រុង និងមិនអាចសម្លឹងឃើញថា សម្ព័ន្ធភាពអន្តរជាតិបោសសំអាតក្រុមហាម៉ាសនេះ អាចកើតចេញដោយរបៀបណាទេ ព្រោះថា ទីមួយអ៊ីស្រាអែលចង់ធ្វើការកិច្ចការនេះតែម្នាក់ឯង ហើយមួយទៀត បណ្តាប្រទេសអារ៉ាប់គ្មាននរណាចង់មកសហការជាមួយអ៊ីស្រាអែលទេ។ ជាងនេះទៀត ក្នុងមតិមហាជនអារ៉ាប់ជាទូទៅ គេយល់ថាក្រុមហាម៉ាសប៉ាឡេស្ទីន ខុសពីក្រុមជីហាតអង្គការរដ្ឋអ៊ីស្លាម ព្រោះក្រុមមហាម៉ាសគឺជាចលនាប្រដាប់អាវុធ ដែលតស៊ូរំដោះប្រជាជនប្រជាជនប៉ាឡេស្ទីន ពីក្រញ៉ាំរបស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ