សង្គ្រាមហ្កាហ្សា៖ អ៊ីស្រាអែលនិងហាម៉ាសពន្យារបទឈប់បាញ់២ថ្ងៃ
កិច្ចព្រមព្រៀងឈប់បាញ់មនុស្សធម៌រវាងអ៊ីស្រាអែលនិងហាម៉ាស នឹងត្រូវពន្យារពេលពីរថ្ងៃបន្ថែមទៀត ក្នុងលក្ខខណ្ឌដដែល។ ក្នុងអំឡុងពេលបន្តបទឈប់បាញ់ជាលើកទីមួយនេះ ហាម៉ាសនឹងដោះលែងចំណាប់ខ្មាំងជាថ្នូរនឹងអ្នកទោសប៉ាឡេស្ទីន ព្រមទាំងជំនួយមនុស្សធម៌សម្រាប់តំបន់ហ្កាហ្សាដែលស្ថានភាពមនុស្សធម៌នៅតែត្រដាបត្រដួសខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០០
ចូលជាធរមាននៅថ្ងៃសុក្រទី២៤វិច្ឆិកា កិច្ចព្រមព្រៀងឈប់បាញ់អ៊ីស្រាអែល-ហាម៉ាស ដែលដឹកនាំចរចាដោយកាតា សហរដ្ឋអាមេរិកនិងអេហ្ស៊ីប ត្រូវអស់សុពលភាពនៅថ្ងៃអង្គារ វេលាម៉ោង៥ភ្លឺម៉ោងសកល តែភាគីទាំងពីរបានសម្រេចពន្យាររយៈពេលពីរថ្ងៃបន្ថែមទៀត ពោលគឺរហូតដល់ថ្ងៃព្រហស្បតិ៍ទី ៣០វិច្ឆិកាវេលាម៉ោង៥ភ្លឺម៉ោងសកល។ នេះបើតាមសេចក្តីប្រកាសរបស់កាតានិងសហរដ្ឋអាមេរិក នៅប៉ុន្មានម៉ោងមុនផុតឱសានវាទ។
អ្នកនាំពាក្យកាតាបានលម្អិតនៅក្នុងសេចក្តីថ្លែងការណ៍បន្ថែមទៀតថា ភាគីប៉ាឡេស្ទីននិងអ៊ីស្រាអែល ព្រមបន្តកិច្ចព្រមព្រៀង ដោយគោរពតាមលក្ខខណ្ឌដដែល គឺជាការដោះដូរមួយទល់នឹងបី។ តាមគម្រោង ការបន្តបទឈប់បាញ់ពីរថ្ងៃនេះនឹងអនុញ្ញាតឱ្យមានការដោះលែងចំណាប់ខ្មាំងអ៊ីស្រាអែលប្រមាណ២០នាក់ទៀត ទល់នឹងការដោះលែងអ្នកទោសប៉ាឡេស្ទីនចេញពីពន្ធនាគារចំនួន៦០នាក់។
រដ្ឋាភិបាលអ៊ីស្រាអែលបានទទួលបញ្ជីឈ្មោះចំណាប់ខ្មាំងទាំង១០នាក់ដែលត្រូវដោះលែងនៅថ្ងៃអង្គារនេះ ដោយមិនបញ្ចេញឈ្មោះទេ។ យប់មិញក្នុងក្របខ័ណ្ឌនៃកិច្ចព្រមព្រៀងបួនថ្ងៃ ហាម៉ាសបានដោះលែងចំណាប់ខ្មាំងអ៊ីស្រាអែល១១នាក់ក្នុងនោះពីរនាក់ជាកុមារមានសញ្ជាតិពីរអ៊ីស្រាអែល-បារាំង។ ជាដំណឹងដ៏រីករាយខ្លាំងណាស់ សម្រាប់ប្រធានាធិបតីបារាំងបើទោះបីនៅមានចំណាប់ខ្មាំងបារាំងក្នុងដៃហាម៉ាសទៀតក៏ដោយ។ ចំណែកខាងប៉ាឡេស្ទីនបានទទួលអ្នកទោសចំនួន៣៣នាក់ ក្នុងនោះមានម្នាក់ជាតំណាងយុវជនដើម្បីបុព្វហេតុប៉ាឡេស្ទីនដែលអ៊ីស្រាអែលបានចាប់ខ្លួនកាលពីដើមខែវិច្ឆិកាផង។
ក្រុមអន្តរការីនិងសហរដ្ឋអាមេរិកកំពុងព្យាយាមចរចាដោយស្ងាត់ៗក្រែងអាចបន្តបទឈប់បាញ់ជាលើកទីពីរបាន ដើម្បីឱ្យចំណាប់ខ្មាំងជាច្រើននាក់ទៀតបានទទួលសេរីភាព និងបង្កើនឱកាសផ្តល់ជំនួយដល់ពលរដ្ឋនៅហ្កាហ្សា។ បើតាមអង្គការសហប្រជាជាតិ តំបន់ហ្កាហ្សាកំពុងបន្តប្រឈមនឹងមហន្តរាយមនុស្សធម៌ខ្លាំងណាស់ ដែលចាំបាច់ត្រូវផ្តល់ជំនួយបន្ថែមជាបន្ទាន់ផង និងត្រូវឱ្យជំនួយមនុស្សធម៌បន្តហូរចូលដោយរលូន ហើយអាចគ្រោងបានទើបអាចជួយបន្ធូរបន្ថយទុក្ខវេទនារបស់ពលរដ្ឋប៉ាឡេស្ទីននៅហ្កាហ្សាបាន។ នេះបើតាមបេស្រិតអង្គការសហប្រជាជាតិទទួលបន្ទុកកិច្ចការដើមបូព៌ា លោក Tor Wennesland។ តាំងពីសង្គ្រាមផ្ទុះឡើងនៅថ្ងៃទី៧តុលា លំនៅដ្ឋានជាងពាក់កណ្តាលនៅតំបន់ហ្កាហ្សាត្រូវខូចខាតឬកម្ទេច ហើយពលរដ្ឋ១លាន៧សែននាក់ត្រូវបង្ខំចិត្តធ្វើបំលាស់ទី។ ហ្កាហ្សាត្រូវការជំនួយចាំបាច់ប្រមាណ ២០០ឡានក្នុងមួយថ្ងៃរយៈពេលយ៉ាងហោចពីរខែជាប់គ្នា។ នេះបើតាមភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ