អ៊ីស្រាអែលនិងក្រុមហាម៉ាសបង្ហាញសញ្ញាចង់ចរចាបទឈប់បាញ់លើកទី២
នៅថ្ងៃពុធ ទី២០ធ្នូ មេដឹកនាំក្រុមហាម៉ាស លោក អ៊ីស្មាអ៊ីល ហានីយេហ៍ បានអញ្ជើញធ្វើដំណើរចាកចេញពីប្រទេសកាតារ ទៅដល់រដ្ឋធានីគែរហើយ។ នេះបើតាមសេចក្តីថ្លែងការណ៍របស់ចលនាក្រុមហាម៉ាស និងដែលបានបញ្ជាក់ថាទៀត ដំណើរទៅកាន់ប្រទេសអេហ្ស៊ីបរបស់ថ្នាក់ដឹកនាំហាម៉ាសរូបនេះ គឺដើម្បីចរចាបទឈប់បាញ់នៅតំបន់ហ្គាហ្សា។ ដំណឹងនេះគឺបន្ទាប់ភាគីខាងកងទ័ពអ៊ីស្រាអែល បានបង្ហាញជំហរថាត្រៀមខ្លួនរួចរាល់ ដើម្បីផ្អាកការវាយប្រហារ សម្រាប់ចរចាដោះដូរចំណាប់ខ្មាំង។
ចុះផ្សាយនៅថ្ងៃ៖
ស្តាប់ - ០២:៤០
បើតាមប្រភពពីក្រុមហាម៉ាស ដែលទីភ្នាក់ងារព័ត៌មានបារាំងអាអេហ្វប៉េទទួលបាន គឺ មេដឹកនាំក្រុមហាម៉ាស់ លោក អ៊ីស្មាអ៊ីល ហានីយេហ៍ នឹងជួបជាមួយ ប្រធានចារកិច្ចអេហ្ស៊ីប លោក អាប្បាស កាមែល រកផ្លូវបញ្ឈប់អំពើហិង្សា និងផ្អាកសង្គ្រាមបាញ់បោះ ដើម្បីនឹងត្រៀមរៀបចំកិច្ចព្រមព្រៀងដោះដូរចំណាប់ខ្មាំង។ ទន្ទឹមនឹងគ្នានោះ មេក្រុមចលនាជីហាតអ៊ីស្លាមប៉ាឡេស្ទីន លោក ហ្សាដ អាល-ណាខាឡា ដែលឈរជើងផ្ទាល់នៅតំបន់ហ្គាហ្សា ក៏នឹងធ្វើដំណើរទៅរដ្ឋធានីគែរ ដើម្បីពិភាក្សាគ្នាដែរ នៅសប្តាហ៍ថ្មី។
ចំណែកភាគីអ៊ីស្រាអែល ប្រធានាធិបតី លោក អ៊ីសាក់ ហែរហ្សុក បានប្រកាសនៅថ្ងៃអង្គារ ទី១៩ធ្នូថា ប្រទេសអ៊ីស្រាអែល បានត្រៀមខ្លួនស្រេច ដើម្បីអនុញ្ញាតឲ្យមានជំនួយមនុស្សធម៌ជាថ្មីថែមទៀត និងដើម្បីរំដោះចំណាប់ខ្មាំងឲ្យមានសេរីភាព។ បើតាមទិន្នន័យរបស់អាជ្ញាធរអ៊ីស្រាអែល គឺតាំងពីផ្ទុះការវាយប្រហារនៅថ្ងៃទី៧តុលាមក ក្រុមហាម៉ាស បានចាប់ចំណាប់ខ្មាំង ចំនួនប្រមាណ ២៥០ នាក់ ហើយខណៈនេះ នៅមានមនុស្ស ១២៩នាក់ទៀត កំពុងតែបន្តជាប់ឃុំនៅឡើយ ឋិតនៅតំបន់ហ្គាហ្សា ក្នុងកណ្តាប់ដៃក្រុមហាម៉ាស។
ក្នុងឱកាសជួបសំណេះសំណាលជាមួយក្រុមគ្រួសាររបស់ចំណាប់ខ្មាំង នាថ្ងៃអង្គារ ទី១៩ធ្នូ លោក បេនចាមិន នេតាន់យ៉ាហ៊ូ បង្ហើបឲ្យដឹងថា ថ្មីៗនេះ រដ្ឋាភិបាលអ៊ីស្រាអែល បានបញ្ជូនប្រធានចារកិច្ចមូស្សាដ ទៅអឺរ៉ុប ២ លើក ដើម្បីស្វែងរកការជំរុញឲ្យដោះលែងចំណាប់ខ្មាំង។ នាយករដ្ឋមន្ត្រីអ៊ីស្រាអែល សង្កត់សម្តីទៀតថា «កាតព្វកិច្ចរបស់យើង គឺនាំពួកគេត្រឡប់មកផ្ទះវិញ»។
គួររំឭកជូនថា អេហ្ស៊ីប និងកាតារ ជាប្រទេសដែលដើរតួយ៉ាងសំខាន់ នៅក្នុងការរៀបចំចរចាបទឈប់បាញ់លើកទី១ ចំនួន ១ សប្តាហ៍ នៅចុងខែវិច្ឆកា និងដើមខែធ្នូកន្លងទៅ។ ពេលនោះ ភាគីជម្លោះទាំងពីរ អ៊ីស្រាអែល និងក្រុមហាម៉ាស បានដោះដូរចំណាប់ខ្មាំង ច្រើនសិបនាក់។ ភាគីអ៊ីស្រាអែល ទទួលបាន មនុស្ស ៨០នាក់ ត្រឡប់មកផ្ទះវិញ ហើយក្រុមហាម៉ាសប៉ាឡេស្ទីន ទទួលបាន ២៤០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ