ប្រឈមនឹងអសន្តិសុខនៅតំបន់សមុទ្រក្រហម ក្រុមហ៊ុនដឹកជញ្ជូនផ្លូវសមុទ្រMaersk ផ្អាកចរាចរណ៍នាវា
ក្រុមហ៊ុនដាណឺម៉ាក ផ្នែកដឹកជញ្ជូនផ្លូវសមុទ្រដ៏ធំបំផុតមួយ ឈ្មោះ Maersk បានសម្រេចនៅថ្ងៃសៅរ៍ទី១៦ធ្នូថា នឹងផ្អាកការធ្វើចរាចរណ៍របស់នាវាខ្លួនទាំងអស់ នៅច្រកសមុទ្រ Bab al-Mandab ដែលជាច្រកឆ្លងកាត់ រវាងសមុទ្រក្រហម និងមហាសមុទ្រឥណ្ឌា ស្ថិតនៅកៀកនឹងយេម៉ែន។ ការសម្រេចដូចនេះ គឺបន្ទាប់ពីក្រុមឧទ្ទាមហ៊ូទី បានគំរាម និងបានបើកការវាយប្រហារជាច្រើនលើក ទៅលើនាវាដឹកទំនិញអន្តរជាតិ ដែលឆ្លងកាត់ច្រកសមុទ្រនេះ។
ចុះផ្សាយនៅថ្ងៃ៖
ស្តាប់ - ០៣:៥៧
ការផ្អាកចរាចរណ៍នាវារបស់ក្រុមហ៊ុន Maersk នឹងត្រូវធ្វើដោយគ្មានពេលកំណត់ រហូតទាល់តែមានការសម្រេចថ្មីណាមួយទៀត ដោយផ្អែកលើស្ថានការណ៍សន្តិសុខ។ ផ្អែកតាមមន្ត្រីកងទ័ពអាមេរិក ប្រចាំនៅតំបន់ដើមបូព៌ា កាលពីថ្ងៃព្រហស្បតិ៍កន្លងទៅ ក្រុមឧទ្ទាមហ៊ូទីបានបាញ់មីស៊ីល សំដៅមកលើនាវាមួយគ្រឿង របស់ក្រុមហ៊ុន Maersk ក៏ប៉ុន្តែបានធ្លាក់ខុសគោលដៅ។
គួរបញ្ជាក់ថា ច្រកសមុទ្រ Bab al-Mandab ស្ថិតនៅចន្លោះ យេម៉ែននិងជីប៊ូទី គឺជាផ្លូវឆ្លងកាត់តែមួយគត់ សម្រាប់នាវាដឹកទំនិញ ដែលឆ្លងកាត់សមុទ្រក្រហម តាមព្រែកជីកស៊ុយអេ។ ស្ថានការណ៍សន្តិសុខតំបន់នេះ នៅក្នុងបរិបទសង្គ្រាមនៅហ្កាហ្សា កំពុងតែធ្វើឲ្យគេព្រួយបារម្ភជាខ្លាំង ថាវាអាចប៉ះពាល់ ដល់ការដឹកជញ្ជូនទំនិញអន្តរជាតិ។ ក្រុមឧទ្ទាមហ៊ូទីយេម៉ែន ដែលជាកូនចៅរបស់អ៊ីរ៉ង់ បានប្រកាសគំរាមថានឹងបាញ់កម្ទេចនាវាដឹកទំនិញទាំងអស់ ដែលឆ្លងកាត់ច្រកសមុទ្រនេះ ប្រសិនបើនាវានោះមានពាក់ព័ន្ធជាមួយអ៊ីស្រាអែល។
កាលពីថ្ងៃសុក្រទី១៥ធ្នូ ក្រុមឧទ្ទាមហ៊ូទី បានបាញ់មីស៊ីល២គ្រាប់ សំដៅទៅលើនាវាដឹកទំនិញ២គ្រឿង ឈ្មោះ MSC Alanya និង MSC Palatium III។ នៅក្នុងកម្មវិធីបាតុម្មគាំទ្រក្រុមហាម៉ាស រៀបចំឡើងដោយក្រុមហ៊ូទីនៅក្រុងសាណា អ្នកនាំពាក្យយោធាហ៊ូទីឈ្មោះ Yehya Sari បានអះអាងថាក្រុមខ្លួន បានបាញ់មីស៊ីលទៅលើនាវាទាំង២ បន្ទាប់ពីក្រុមនាវិក មិនព្រមឆ្លើយទៅតាមការទាក់ទង របស់អាជ្ញាធរយេម៉ែន។
ផ្អែកតាម អគ្គបញ្ជាការដ្ឋានកងទ័ពអាមេរិកប្រចាំតំបន់ដើមបូព៌ា ហៅកាត់ថា Centcom គឺមីស៊ីលបាលីស្ទីកមួយគ្រាប់របស់ក្រុមហ៊ូទី បានប៉ះទៅលើនាវា Palatium ចំណែកនាវា Alanya មិនបានរងគ្រោះទេ។ ដោយឡែក នាវាដឹកទំនិញមួយទៀត ឈ្មោះ Al-Jasrah ដោតទង់ជាតិលីបេរីយ៉ា និងជាកម្មសិទ្ធិរបស់ក្រុមហ៊ុនអាល្លឺម៉ង់ Hapag-Lloyd ត្រូវបានដ្រូនមួយគ្រឿងរបស់ក្រុមឧទ្ទាមហ៊ូទី វាយប្រហារចំ បង្កឲ្យមានមានអគ្គីភ័យ មុននឹងត្រូវគេពន្លត់ទាន់។ ផ្អែកតាម Centcom ដដែល បច្ចុប្បន្ននាវានេះ បានបន្តដំណើរឆ្ពោះទៅសិង្ហបុរីហើយ។ ក្រុមហ៊ុនដឹកជញ្ជូនផ្លូវសមុទ្រអាល្លឺម៉ង់ Hapag-Lloyd បានប្រកាសដែរ ថាក្រោយហេតុការណ៍នេះ ខ្លួនបានសម្រេចផ្អាកចរាចរណ៍នាវាខ្លួនទាំងអស់ នៅតំបន់សមុទ្រក្រហម យ៉ាងហោចរហូតដល់ថ្ងៃចន្ទសប្តាហ៍ក្រោយ ទំរាំស្ថានការណ៍សន្តិសុខត្រលប់មកប្រក្រតីវិញ។
សូមរំលឹកដែរថា កាលពីដើមសប្តាហ៍នេះ កងទ័ពបារាំងប្រចាំការនៅក្នុងសមុទ្រក្រហម បានវាយកម្ទេចបានដ្រូន២គ្រឿងរបស់ក្រុមឧទ្ទាមហ៊ូទី ដែលប៉ុនប៉ងវាយប្រហារមកលើនាវាបារាំង។ ហើយនៅថ្ងៃសៅរ៍ទី១៦ធ្នូ លោក Grant Shapps រដ្ឋមន្ត្រីការពារជាតិអង់គ្លេសបានបញ្ជាក់ថា នាវាចម្បាំងអង់គ្លេស HMS Diamond បានបាញ់កម្ទេចដ្រូនមួយគ្រឿង របស់ក្រុមឧទ្ទាមហ៊ូទី ដែលប៉ុនប៉ងវាយប្រហារមកលើនាវាដឹកទំនិញឯកជន នៅក្នុងសមុទ្រក្រហម កាលពីយប់ថ្ងៃសុក្រ ឈានចូលថ្ងៃសៅរ៍។
ថ្លែងក្នុងសន្និសីទកាសែត កាលពីថ្ងៃសុក្រ លោកស្រីរដ្ឋមន្ត្រីការបរទេសអាល្លឺម៉ង់ Annalena Baerbock បានលើកឡើងថា ក្រុមឧទ្ទាមហ៊ូទី ត្រូវតែឈប់វាយប្រហារមកលើនាវាដឹកទំនិញស៊ីវីល នៅក្នុងសមុទ្រក្រហម ជាបន្ទាន់។ លោក Jake Sullivan ទីប្រឹក្សាសន្តិសុខជាតិអាមេរិក ដែលកំពុងបំពេញទស្សនកិច្ចនៅអ៊ីស្រាអែល បានលើកឡើងថា សហរដ្ឋអាមេរិកនឹងសហការជាមួយគ្រប់ភាគីទាំងអស់ ដើម្បីការពារសន្តិសុខនៅតំបន់សមុទ្រក្រហម។ លោកបានទទួលស្គាល់ថា ការគំរាមរបស់ក្រុមឧទ្ទាមហ៊ូទី មកលើសន្តិសុខនាវាដឹកទំនិញ គឺជាការគំរាមជាក់ស្តែង មិនអាចប្រហែសបានទេ ពោលគឺត្រូវតែពិចារណាគ្រប់ជម្រើសទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ