កម្ចាត់មេកើយទីពីរបស់ហាម៉ាសជារបត់ថ្មីនៃសង្គ្រាមហ្កាហ្សា?
បើតាមហាម៉ាស មេកើយលំដាប់ទីពីរបស់ចលនាហាម៉ាសប៉ាឡេស្ទីន សាឡេះ អាល់-អារួរី បានស្លាប់នៅថ្ងៃទី២មករា ក្នុងជំរំហេសបូឡា ក្បែរទីក្រុងបេរ៉ូតប្រទេសលីបង់ ដោយការវាយប្រហាររបស់អ៊ីស្រាអែល។ នេះជាការវាយប្រហារតាមផ្លូវអាកាសលើកទីមួយរបស់អ៊ីស្រាអែល ទៅលើតំបន់ជាយក្រុងបេរ៉ូត គិតចាប់តាំងពីឆ្នាំ២០០៦មក។ ហេតុការណ៍នេះ កើតឡើងតែមួយថ្ងៃមុនសុន្ទរកថារបស់ប្រមុខដឹកនាំចលនាហេសបូឡាលីបង់ លោក ហាសាន ណាស្រាឡា។ ហេសបូឡា ធ្លាប់ព្រមានបញ្ចេញប្រតិកម្មតបតយ៉ាងខ្លាំងក្លា ក្នុងករណីអ៊ីស្រាអែលហ៊ានកម្ចាត់សាឡេះអាល់អារួរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣១
អនុប្រធានការិយាល័យនយោបាយហាម៉ាស និងជាអ្នកទទួលខុសត្រូវតំបន់ស៊ីហ្សកដានីប៉ាឡេស្ទីនសាឡេះ អាល់-អារួរីដែលជាឥស្សរជនដ៏សំខាន់លំដាប់ទីពីរបស់ចលនាអ៊ីស្លាមហាម៉ាសប៉ាឡេស្ទីន បានស្លាប់នៅថ្ងៃទី២មករា២០២៤ ក្នុងជំរំហេសបូឡា ប្រទេសលីបង់។
តើអាឡេះអាល់អារួរីជានរណា?
បន្ទាប់ពីជាប់ឃុំឃាំងក្នុងពន្ធនាគារអ៊ីស្រាអែលអស់រយៈពេលជាង២០ឆ្នាំ និងបានទទួលសេរីភាពនៅឆ្នាំ២០១០ ជាថ្នូរនឹងការធ្វើនិរទេសខ្លួនចេញពីប្រទេស សាឡេះអាល់អារួរី បានមកតាំងទីក្នុងប្រទេសលីបង់។ សាឡេះអាល់អារួរីជាសកម្មជនដ៏រស់រើក គាំទ្រឱ្យមានសហប្រតិបត្តិការយ៉ាងល្អិតល្មួតជាមួយអ៊ីរ៉ង់ និងសម្ព័ន្ធមិត្តផ្សេងទៀតមានជាអាទិ៍ចលនាហេសបូឡា។ មេកើយរូបនេះត្រូវបានគេចាត់ទុកថាជាអ្នកបានចូលរួមបង្កើតសាខាប្រដាប់អាវុធហាម៉ាស Al-Qassam ដែលមានទម្រង់និងរចនាសម្ព័ន្ធដូចជាយោធាប្រទេសមួយ។
សម្រាប់អ៊ីស្រាអែល សាឡេះអាល់អារួរី ជាមេកើយដ៏សំខាន់ម្នាក់ខាងដឹកនាំផែនការវាយប្រហារភេរវកម្មផ្សេងៗប្រឆាំងនឹងអ៊ីស្រាអែលនៅស៊ីហ្សកដានី និងជាមេគំនិតរៀបចំផែនការឆ្មក់វាយប្រហារអ៊ីស្រាអែល នៅថ្ងៃទី៧តុលា២០២៣ ដែលជាដើមហេតុនាំឱ្យផ្ទុះសង្គ្រាមអ៊ីស្រាអែលនៅហ្កាហ្សា។ តាំងពីផ្តើមសង្គ្រាមភ្លាម អ៊ីស្រាអែលបានបង្ហាញឆន្ទៈចង់កម្ចាត់អ្នកទទួលខុសត្រូវចលនាហាម៉ាសមានពាក់ព័ន្ធនឹងការវាយប្រហារថ្ងៃទី៧តុលាឱ្យខ្ទេចអស់។ លោកនាយករដ្ឋមន្ត្រីនេតាន់យ៉ាហ៊ូបានប្រគល់បេសកកម្មនេះទៅឱ្យក្រុមចារកិច្ចអ៊ីស្រាអែល។
តើអាចនឹងមានការតបតយ៉ាងណា?
នៅចុងខែតុលា២០២៣ យោធាអ៊ីស្រាអែលបានទៅដាក់គ្រាប់បំផ្ទុះផ្ទះដ៏ទទេស្អាតរបស់សាឡេះអាល់អារួរី នៅដែនដីអាណានិគមស៊ីហ្សកដានីរួចហើយ។ ប៉ុន្តែអ៊ីស្រាអែលទាំងមូលមិនបញ្ជាក់អ្វីទាំងអស់ទាក់ទងនឹងការវាយប្រហារ ថ្ងៃទី ២មករា២០២៤ សម្លាប់មេកើយចលនាហាម៉ាសនេះ។ ទីប្រឹក្សានាយករដ្ឋមន្ត្រីអ៊ីស្រាអែលបានត្រឹមប្រកាសថា “នរណាជាអ្នកវាយប្រហារមិនសំខាន់ឡើយ។ អ្វីដែលច្បាស់គឺមិនមែនជាការវាយប្រហារលើរដ្ឋលីបង់ទេ តែជាការវាយចោះកម្ទេចក្បាលម៉ាស៊ីនគ្រប់គ្រងចលនាហាម៉ាស។” ដោយមិននិយាយឱ្យចំពីការវាយប្រហារសម្លាប់សាឡេះអាល់អារួរី យោធាអ៊ីស្រាអែលបានប្រកាសត្រៀមលក្ខណៈខ្ពស់ស្រេចបាច់ប្រឈមនឹងគ្រប់សេណារីយូទាំងអស់នៃសង្គ្រាមនៅហ្កាហ្សា។
ប៉ុន្តែនាយករដ្ឋមន្ត្រីស្តីទីលីបង់ បានបរិហារដោយគ្មានបង្អង់ថាអ៊ីស្រាអែលប្រព្រឹត្តឧក្រិដ្ឋកម្មថ្មី និងប៉ុនប៉ងរុញច្រានលីបង់ជាថ្មីឱ្យលូកដៃក្នុងសង្គ្រាមនៅហ្កាហ្សា។ ចំណែកក្រុមហេសបូឡា ដែលតែងតែតតាំងជាមួយយោធាអ៊ីស្រាអែលនៅតាមព្រំដែន បានព្រមានថាការស្លាប់របស់សាឡេះអាល់អារួរី នៅក្រុងបេរ៉ូត គឺជាការឈ្លានពានប្រទេសលីបង់ និងមិនអាចអត់ទោសឱ្យបានឡើយ -ត្រូវតែមានការតបតសងសឹក។ ប្រមុខចលនាហេសបូឡាលីបង់ ត្រូវធ្វើសុន្ទរកថានៅល្ងាចថ្ងៃពុធទី៣មករា២០២៤នេះ។
រីឯប្រធានាធិបតីបារាំងវិញ បានអំពាវនាវឱ្យអ៊ីស្រាអែលបញ្ចៀសរាល់គ្រប់ឥរិយាបថដែលបង្កើនភាពតានតឹងជាពិសេសជាមួយលីបង់ និងប្រឹងធ្វើយ៉ាងណានាំឱ្យមានបទឈប់បាញ់អ៊ីស្រាអែលហាម៉ាសនៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ