ឧបទ្វីបកូរ៉េ៖ទាហានជើងទឹកកូរ៉េខាងត្បូងបាញ់ព្រមាននាវាកូរ៉េខាងជើងដែលបើកឆ្លងដែន
ភាពតានតឹងបានកើនមួយកម្រិតនៅក្នុងឧបទ្វីបកូរ៉េរវាងកូរ៉េខាងជើង និងកូរ៉េខាងត្បូង។ នៅថ្ងៃសុក្រ ទី២៧ ឧសភានេះ ក្រសួងការពារជាតិកូរ៉េខាងត្បូងបានប្រកាសឲ្យដឹងថា កងល្បាតសមុទ្ររបស់កូរ៉េខាងត្បូងបានបាញ់សម្លុតព្រមានលើកងល្បាតសមុទ្រកូរ៉េខាងជើង និងនាវានេសាទកូរ៉េខាងជើងដែលបានបរឆ្លងព្រំដែនសមុទ្រខ័ណ្ឌចែកដែនដីទាំងពីរតាំងពីក្រោយបញ្ចប់សង្រ្គាមកូរ៉េឆ្នាំ ១៩៥០ ១៩៥៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ឧប្បត្តិហេតុនេះបានកើតមានឡើងនៅព្រលឹមស្រាងៗថ្ងៃនេះដែលមាននាវាកូរ៉េខាងជើងចំនួនពីរគ្រឿងបានបរឆ្លងកាត់ព្រំដែនសមុទ្រខ័ណ្ឌចែកកូរ៉េទាំងពីរ។ ភ្លាមៗនោះ កងល្បាតសមុទ្រកូរ៉េខាងត្បូងក៏បានបើកការបាញ់សម្លុតព្រមាន ហើយនាវាកូរ៉េខាងជើងទាំងពីរគ្រឿងក៏បានបែរក្បាលត្រឡប់ក្រោយចូលក្នុងដែនទឹករបស់ខ្លួនវិញ។ អ្នកទទួលខុសត្រូវក្រសួងការពារជាតិកូរ៉េខាងត្បូងបានបញ្ជាក់ថា ការបាញ់សម្លុតព្រមានរបស់ខ្លួនមិនមានការបាញ់តដៃវិញពីកូរ៉េខាងជើងទេ។
យ៉ាងណាក៏ដោយ ឧប្បត្តិហេតុនេះមិនមែនជាលើកទី១ ហើយក៏ប្រហែលមិនមែនជាលើកចុងក្រោយដែរ ព្រោះវាធ្លាប់កើតមានឡើងចំនួន ៣ដង គឺក្នុងឆ្នាំ ១៩៩៩ ឆ្នាំ ២០០២ និង ឆ្នាំ ២០០៩។ មួយវិញទៀតគេកត់សម្គាល់ឃើញថា ឧប្បតិហេតុក្នុងថ្ងៃនេះ ក៏ដូចជា ៣ដងលើកមុនមិនបានបង្កឲ្យមានភាពប្រទូស្រ្តាយផ្លូវអាវុធដាក់គ្នាជាដុំកំភួនឡើយ។ គួររម្លឹកជូនឡើងវិញថា ព្រំដែនទឹកសមុទ្ររវាងបងប្អូនបង្កើតគូសត្រូវទាំងពីរត្រូវបានគូសដោយអង្គការសហប្រជាជាតិនៅក្រោយការបិទបញ្ចប់សង្រ្គាមកូរ៉េចន្លោះឆ្នាំ ១៩៥០ ១៩៥៣។ តែបញ្ហានៅត្រង់ថា កូរ៉េខាងជើងមិនដែលប្រកាសទទួលស្គាល់ខ្សែបន្ទាត់ព្រំដែនទឹកសមុទ្រនោះទេ។
អ្វីជាការកត់សម្គាល់ ឧប្បត្តិហេតុច្រំដែលមួយនេះបានកើតមានឡើង មួយថ្ងៃក្រោយពីលោកអគ្គលេខាធិការអង្គការសហប្រជាជាតិបាន គីមូនដែលកំពុងបំពេញទស្សនកិច្ចនៅកូរ៉េខាងត្បូងជាទឹកដីកំណើតរបស់លោកបានស្នើឲ្យមានកិច្ចចរចាជាមួយកូរ៉េខាងជើងឡើងវិញស្តីពីសំណុំរឿងនុយក្លេអ៊ែរ។ នាប៉ុន្មានសប្តាហ៍កន្លងទៅ ក្រុងព្យុងយ៉ាងខ្លួនឯងក៏បានដាក់សំណើសុំចរចាផ្នែកយោធាជាមួយក្រុងសេអ៊ូលដែរ។
តែទីបំផុត សេអ៊ូលបានច្រានចោលសំណើនេះដោយលើកយកហេតុផលទៅពន្យល់ថា មិនទុកចិត្ត និងមិនជឿលើភាពស្មោះត្រង់របស់កូរ៉េខាងជើង ព្រមទាំងជំរុញកូរ៉េខាងជើងប្រកាន់ជំហររំសាយនុយក្លេអ៊ែរជាមុន មុននឹងផ្តើមកិច្ចចរចាណាមួយ។ តែក្រុងព្យុងយ៉ាងក៏ធ្លាប់បានបញ្ជាក់ជាច្រើនដងថា នុយក្លេអ៊ែរជារឿងមួយដែលមិនអាចចរចាបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ