ក្រុងប៉េកាំងព្យួរការដ្ឋានសំណង់សាធារណៈក្នុងរដូវរងា ដើម្បីកាត់បន្ថយការបំពុលបរិស្ថាន
អាជ្ញាធរក្រុងប៉េកាំងនឹងព្យួរការដ្ឋានសំណង់សាធារណៈមួយចំនួន នៅអំឡុងរដូវរងានេះ ដើម្បីកាត់បន្ថយការបំពុលបរិស្ថាន។ រដូវរងានៅចិន ជារដូវដែលមានការបំពុលបរិស្ថានខ្ពស់។ ឆ្នាំនេះ ជាឆ្នាំទី៤ ដែលចិនបើកយុទ្ធនាការប្រយុទ្ធប្រឆាំងការបំពុលបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
រដូវរងានៅទីក្រុងប៉េកាំង ប្រទេសចិន ជារដូវដែលមានការបំពុលបរិស្ថានខ្ពស់ ដោយសារតែលំនៅស្ថាន អគារផ្សេងៗនៅតាមទីក្រុង ត្រូវប្រើប្រាស់ឧបករណ៍កំដៅ ពិសេសប្រើឧបករណ៍ប្រើធ្យូងថ្ម ដែលបង្កទៅជាផ្សែង ប៉ះពាល់គុណភាព ខ្យល់ ដកដង្ហើមក្នុងបរិយាកាស ប៉ះពាល់សុខភាពមនុស្ស។ ដើម្បីកាត់បន្ថយការបំពុលបរិស្ថាន គណៈកម្មការលំនៅស្ថានទីក្រុងប៉េកាំងបានសម្រេចផ្អាកការដ្ឋានសំណង់នៃគំរោងសាធារណៈមួយចំនួន ដូចជាសំណង់ផ្លូវថ្នល់ រឺក៏គំរោងបំផ្លាញអគារជាដើម។ ការព្យួរការដ្ឋានសំណង់ទាំងនេះ នឹងធ្វើក្នុងសង្កាត់ធំៗចំនួន៦នៅប៉េកាំង ពីថ្ងៃទី១៥វិច្ឆិកាខាងមុខ រហូតថ្ងៃ១៥មិនាឆ្នាំ២០១៨។
ប៉ុន្តែ ការដ្ឋានសំណង់មួយចំនួនទៀត ដូចជាផ្លូវដែក រឺការដ្ឋានតាមអាកាសយានដ្ឋាន អគារស្នាក់នៅតម្លៃថោក អាចបន្តដំណើរការបាន លុះត្រាតែមានការអនុញ្ញាតពីអាជ្ញាធរផ្នែកលំនៅស្ថានក្រុង។ អាជ្ញាធរក្រុងប៉េកាំងមានទិសដៅកាត់បន្ថយសារធាតុល្អិតឆ្មារក្នុងបរិយាកាសអោយបានជាង១ភាគ៤ ប្រៀបនឹងកម្រិតសារធាតុល្អិតឆ្មារ ក្នុងឆ្នាំ២០១២។ ពោលគឺត្រូវធ្វើអោយសារធាតុល្អិតឆ្មារទាំងនេះថយចុះមកនៅត្រឹម៦០មីក្រូក្រាម ជាមធ្យម ក្នុងមួយម៉ែត្រគូប។ គួររំលឹកថា ក្រុងប៉េកាំងជួបបញ្ហាផ្សែងពុលក្នុងបរិយាកាស ក្នុងកម្រិតខ្ពស់ កាលពីខែមករា និងខែកុម្ភៈ ដើមឆ្នាំ២០១៧នេះ។ ប៉ុន្តែ រដ្ឋាភិបាលចិនលើកឡើងថា ផ្សែងទាំងនេះបណ្តាលមកពីលក្ខខណ្ឌអាកាសធាតុមិនល្អប៉ុណ្ណោះ។
រៀងរាល់ឆ្នាំ មានមនុស្សជាង១លាន៥សែននាក់ នៅចិន បានស្លាប់មុនអាយុ ដោយសារតែការការពុលក្នុងបរិយាកាស។ ក្នុងទិសដៅកាត់បន្ថយការបំពុលបរិស្ថាន ចិនគ្រោងបញ្ឈប់ដំណើរការមជ្ឈមណ្ឌលថាមពលធ្យូងថ្មរាប់រយកន្លែង នៅដំណាច់ឆ្នាំ២០១៧នេះ។ រដ្ឋចិនសម្រេចផ្តល់អាទិភាពដល់ការប្រើប្រាស់ឧស្ម័ន និងថាមពលមិនចេះរីងស្ងួតវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ