ប្រេងឆៅឡើងថ្លៃបន្តិច ស្របពេលប្រទេសOPEPអំពាវនាវឲ្យបន្ថយការផលិត
ដើម្បីទាញតម្លៃប្រេងឲ្យឡើងខ្ពស់បន្តិចឡើងវិញ ក្រុមប្រទេសសមាជិកអង្គការ OPEP ដែលមានអារ៉ាប៊ីសាអូឌីត ជាអ្នកនាំមុខ និងដោយមានការសហការពីរុស្ស៊ី បានព្រមគ្នាកាត់បន្ថយការផលិតប្រេងឆៅ។ ដូចការរំពឹងទុក ប្រេងឆៅបានឡើងថ្លៃក្នុងរយៈពេលពីរថ្ងៃជាប់គ្នា ដោយមួយធុងបារីលបានឡើងមកដល់៣៤ដុល្លារ ១៧សេន។ យ៉ាងណាក៏ដោយ អ៊ីរ៉ង់ដែលជាប្រទេសផលិតប្រេងដ៏សំខាន់មួយដែរ បានប្រកាសថាគេមិនអាចកាត់បន្ថយការផលិតបានទេ ព្រោះអ៊ីរ៉ង់ត្រូវការប្រមូលយកទីផ្សារឡើងវិញ បន្ទាប់ពីខកខានជាច្រើនទសវត្សដោយសារតែជាប់ទណ្ឌកម្មសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
តម្លៃប្រេងឆៅនៅទីផ្សារអន្តរជាតិក្រុងញូយ៉ក កាលពីថ្ងៃចន្ទ ទី២៩កុម្ភៈ បានឡើងមួយដុល្លារ។ ហើយកាលពីថ្ងៃអង្គារទី ២១មីនា បានឡើង៤០សេនបន្ថែមទៀត ដែលធ្វើឲ្យប្រេងឆៅមួយធុងបារីល មានតំលៃ ៣៤ដុល្លារ ១៧សេន។ គួររំលឹកថានៅប៉ុន្មានសប្តាហ៍មុននេះ ប្រេងឆៅមានតម្លៃតែ៣០ដុល្លារប៉ុណ្ណោះក្នុងមួយធុងបារីល ដែលនេះជាហាងឆេងទាបមិនធ្លាប់មានទេ ក្នុងរយៈពេល១៣ឆ្នាំចុងក្រោយនេះ។
អ្នកជំនាញទីផ្សារប្រេងនៅធនាគារ COMMERZBANK បានឲ្យដឹងថា តម្លៃប្រេងឆៅបានងើបឡើងវិញ គឺដោយសារមានការថយចុះនូវចំនួនផលិត ដែលការនេះបានទាញកម្រិតស្តុកនៅលើទីផ្សារ ឲ្យមានការថយចុះ។ បើយោងតាមក្រសួងថាមពលអាមេរិកបានឲ្យដឹងផងដែរថា ចំនួនផលិតប្រេងឆៅនៅសហរដ្ឋអាមេរិក បានថយចុះប្រមាណជា ៤ម៉ឺន៣ពាន់ធុងបារីសក្នុងមួយថ្ងៃ។ ហើយបើយោងតាមរបាយការណ៍របស់ទីភ្នាក់ងារព័ត៌មានReuters បានបង្ហាញថាក្នុងខែកុម្ភៈកន្លងទៅ ការផលិតប្រេងឆៅបានថយចុះចំនួន២សែន៨ម៉ឺនធុងបារីល ក្នុងមួយថ្ងៃ សរុបទាំងអស់នៅតាមប្រទេសសមាជិកអង្គការOPEP។
ជាការពិត កាលពីពាក់កណ្តាលខែកុម្ភៈ ក្រុមប្រទេសផលិតប្រេងរបស់អង្គការ OPEP មានដូចជាអារ៉ាប៊ីសាអូឌីត កាតា និងវ៉េណេហ្សុយអេឡា បានព្រមព្រៀងគ្នាជាមួយរុស៊្សីថា មធ្យោបាយតែមួយក្នុងការទាញតម្លៃប្រេងឲ្យងើបឡើងវិញ គឺត្រូវបន្ថយចំនួនស្តុក។ ដូច្នេះគេត្រូវកាត់បន្ថយការផលិត។ យ៉ាងណាមិញ នៅថ្ងៃអង្គារ ទី១មីនា ម្សិលមិញ ប្រទេសអេមៀរ៉ាត់អារ៉ាប់រួម ដែលជាប្រទេសសមាជិកអង្គការ OPEP មួយដែរ បានទទួលស្គាល់និងអំពាវនាវឲ្យគ្រប់គ្នាកាត់បន្ថយចំនួនផលិត។
អ៊ីរ៉ង់ត្រូវការផលិតដើម្បីប្រមូលទីផ្សារឡើងវិញ៖
អ៊ីរ៉ង់ បានប្រឆាំងដាច់ខាត មិនព្រមកាត់បន្ថយការផលិតទេ។ រដ្ឋមន្ត្រីក្រសួងប្រេងកាតអ៊ីរ៉ង់ អះអាងថា ការផលិតប្រេងនាំចេញ គឺជាសិទ្ធិស្របច្បាប់របស់អ៊ីរ៉ង់។ លោកបន្តថាអស់រយៈពេលជាច្រើនទសវត្សមកហើយ ដែលអ៊ីរ៉ង់ ត្រូវគេដាក់ទណ្ឌកម្មសេដ្ឋកិច្ច គ្មាននរណាទិញប្រេងអ៊ីរ៉ង់។ ឥឡូវពេលនេះ ទណ្ឌកម្មសេដ្ឋកិច្ចទើបតែត្រូវដកចេញ ដូច្នេះមានរឿងអីដែលត្រូវមកហាមឃាត់ មិនឲ្យអ៊ីរ៉ង់ផលិតប្រេងលក់? លោករដ្ឋមន្ត្រីអ៊ីរ៉ង់ បាននិយាយបែបចំអកទៅឲ្យអារ៉ាប៊ីសាអូឌីតថា៖ មានប្រទេសខ្លះមកចង់ហាមឃាត់កុំឲ្យគេផលិតច្រើនពេក តែខ្លួនឯងវិញ ឆ្លៀតពេលកាលពីអ៊ីរ៉ង់ ត្រូវគេដាក់ទណ្ឌកម្មសេដ្ឋកិច្ច បានតំឡើងការផលិតរបស់ខ្លួន រហូតដល់១០លានធុងបារីល ក្នុងមួយថ្ងៃដើម្បីវាយលុកដណ្តើមទីផ្សារ។
សូមបញ្ជាក់ថា ក្រោយពេលដែលសហគមន៍អន្តរជាតិ បានដកទណ្ឌកម្មចេញពីអ៊ីរ៉ង់ កាលពីខែមករា រដ្ឋាភិបាលអ៊ីរ៉ង់បានប្រកាសថា គេនឹងចាប់ផ្តើមតំឡើងការផលិតប្រេងឆៅមួយថ្ងៃ៥សែនធុងបន្ថែម ដើម្បីនាំចេញនឹងស្រូបយកទីផ្សារឡើងវិញ។ យោងតាមតួលេខចុងក្រោយ ការផលិតប្រេងឆៅរបស់អ៊ីរ៉ង់ គិតចាប់ពីដើមខែកុម្ភៈឆ្នាំ២០១៦ នេះ បានកើនឡើងចំនួន៤សែនធុងបារីស ជាមធ្យមក្នុងមួយថ្ងៃ។ តួលេខនេះមានន័យថា អ៊ីរ៉ង់ផលិតប្រេងឆៅក្នុងមួយថ្ងៃ ៣លាន២សែនធុងបារីល។ រដ្ឋមន្ត្រីប្រេងកាតអ៊ីរ៉ង់ និយាយថាតួលេខផលិតត្រឹមប៉ុណ្ណេះ នៅមិនទាន់ស្មើរតួលេខកាលពីជំនាន់អ៊ីរ៉ង់ មិនទាន់ត្រូវគេដាក់ទណ្ឌកម្មសេដ្ឋកិច្ចផងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ