ម៉ូស្គូ៖យន្តហោះរុស្ស៊ីមិនបានហោះឆ្វែលក្បែរនាវាចម្បាំងកាណាដាក្នុងសមុទ្រខ្មៅទេ
ក្រសួងការពារជាតិរុស្ស៊ី ព្រឹកថ្ងៃអង្គារទី ៩កញ្ញាបានបដិសេធច្រានចោល ការចោទប្រកាន់ពីខាងក្រសួងការពារជាតិកាណាដា ដែលថា យន្តហោះចម្បាំងពីរគ្រឿង និយន្តហោះដឹក ជញ្ជូនយោធារុស្ស៊ី មួយគ្រឿង បានហោះក្រវែលខិតទៅជិត នាវាចម្បាំងកាណាដា នៅលើ ផ្ទៃទឹកសមុទ្រខ្មៅ កាលពីថ្ងៃ៧ កញ្ញា ដោយចាត់ទុកទង្វើរុស្ស៊ីនេះ ជាអំពើបង្កហេតុ បន្តឹង ថែមទៀតស្ថានការណ៍ជុំវិញរដ្ឋអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
តាមការពន្យល់បំភ្លឺនៃក្រសួងការពារជាតិរុស្ស៊ី ៖ ផ្លូវហោះហើរនៃយន្តហោះ ប្រដេញរុស្ស៊ីពីរគ្រឿងធុន Su-24 និងយន្តហោះដឹកជញ្ជូនយោធារុស្ស៊ីមួយគ្រឿងធុន An-26 គឺបានឆ្លងកាត់លើតំបន់ ជាទីដែលមាន នាវាចម្បាំងកាណាដាឈ្មោះ Toronto បានស្ថិតនៅ ប៉ុន្តែ យន្តហោះរុស្ស៊ីទាំងបីគ្រឿងនោះ ឥតបានខិតចូលទៅជិត នាវាចម្បាំងបរទេសនោះឡើយ។ ការហោះហើរនៃយន្តហោះរុស្ស៊ី បានប្រព្រឹត្តទៅ គឺ «ដោយស្របទាំងស្រុងនឹងច្បាប់អន្តរជាតិ ខាងប្រើលំហអាកាស នៅពីលើដែនទឹកអព្យាក្រឹត»។
ក្រសួងយោធារុស្ស៊ីលំអិតថា នៅថ្ងៃ៧កញ្ញា កន្លងទៅ ក្រុមអ្នកបើកបរ នៃកងអាកាសរុស្ស៊ីនោះ ចេះបំពេញបានយ៉ាងជោគជ័យ ផែនការដែលមានគ្រោងទុក ខាងហោះពីលើដែនទឹកអព្យាក្រឹត នៃសមុទ្រខ្មៅ ត្រង់តំបន់ព្រំដែនរដ្ឋរបស់សហព័ន្ធរុស្ស៊ី។
ការពន្យល់បំភ្លឺ និងការបដិសេធរបស់ក្រុងម៉ូស្គូនេះ ជាចម្លើយតបនឹង សេចក្តីថ្លែងការណ៍ចោទប្រកាន់ ធ្វើដោយលោករដ្ឋមន្ត្រីការពារជាតិកាណាដា រ៉ូប នីកូលសុន ដែលថា កងអាកាសរុស្ស៊ី បានប្រព្រឹត្តអំពើបង្កហេតុទល់នឹង នាវាចម្បាំងកាណាដា Toronto ដែលបានទៅដល់សមុទ្រខ្មៅ គឺ ដើម្បីរួមចំណែក ក្នុង លំហាត់សឹក ក្រោមឈ្មោះថា “ Sea Breeze-2014 “។ ព្រមជាមួយនេះ លោក រ៉ូប នីកូលសុនកត់សម្គាល់ថា ថ្វីត្បិតតែ យន្តហោះនៃកងអាកាសរុស្ស៊ី បានហោះក្រវែលប៉ុន្មានជុំ នៅពីលើ កប៉ាល់ចម្បាំង Toronto ក្តី ក៏វាមិនបង្កើតជាគ្រោះថ្នាក់ដល់ នាវា កាណាដានេះឡើយ ប៉ុន្តែ វាជាអំពើបង្កហេតុឥតប្រយោជន៍ ដែលបង្កើតជាហានិភ័យ នាំឲ្យស្ថានការណ៍ជុំវិញវិបត្តិអ៊ុយក្រែន រឹតតែតានតឹង។
Sea Breeze-2014 ជាសមយុទ្ធទ្វេភាគី អ៊ុយក្រែន-អាមេរិក ដែលបានចាប់ផ្តើម ថ្ងៃ៨កញ្ញា នៅត្រង់ភាគពាយ័ព្យ សមុទ្រខ្មៅ ហើយនឹងចប់ទៅ នៅថ្ងៃទី១០កញ្ញា។ វាប្រព្រឹត្តទៅស្របនឹង កម្មវិធី ចុះរវាងក្រសួងការពារជាតិអ៊ុយក្រែន និងអង្គការអូតង់. ក្រោមឈ្មោះថា “ ដៃគូ នឹងគ្នាក្នុងនាមសន្តិភាព”។ ចូលរួមសរុបទៅ គឺយោធា ២.០០០នាក់ និងនាវា ១២គ្រឿង ដែលទន្ទឹមនឹងនាវា អ៊ុយក្រែន និងអាមេរិក ក៏មានទាំង នាវា អេស្ប៉ាញ កាណាដា រូម៉ានី និងតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ