កូរ៉េខាងជើង-ចិន៖ហេតុអ្វីបានជាថ្នាក់ដឹកនាំជាន់ខ្ពស់កូរ៉េខាងជើងទៅចិនពេលនេះ?
នៅថ្ងៃអង្គារ ទី៣១ ឧសភា លោករី ស៊ូយ៉ុង អនុប្រធានគណៈកម្មាធិការមជ្ឈិមនៃគណបក្សពលករកូរ៉េខាងជើងបានផ្តើមទស្សនកិច្ចរយៈពេល ៣ថ្ងៃនៅក្នុងប្រទេសចិន។ គឺជាទស្សនកិច្ចដែលមិនបានគ្រោងទុកមុន និងដែលបានធ្វើឡើង ចំពេលដែលស្ថានការណ៍នៅឧបទ្វីបកូរ៉េកំពុងឡើងតានតឹងដល់កំពូល។ តានតឹងដោយសារតែក្រុងព្យុងយ៉ាងបន្តផ្គើនសហគមន៍អន្តរជាតិតាមរយៈការសាកល្បងនុយក្លេអ៊ែរ និងបាញ់គ្រាប់មីស៊ីល។ ក្នុងថ្ងៃនេះទៀត កូរ៉េខាងជើងបានបាញ់សាកល្បងគ្រាប់មីស៊ីលជាថ្មី តែមិនបានទទួលជោគជ័យដូចក្តីរំពឹងទុកទេ។
ចុះផ្សាយនៅថ្ងៃ៖
ស្តាប់ - ០៦:៥៤
ព័ត៌មាននៃដំណើរទស្សនកិច្ចមិនបានគ្រោងទុកមុនរបស់លោករី ស៊ូយ៉ុងដែលជាអតីតរដ្ឋមន្រ្តីការបរទេស និងបច្ចុប្បន្នមានតំណែងជាអនុប្រធានគណៈកម្មាធិការមជ្ឈិមនៃគណបក្សពលករកូរ៉េខាងជើងនៅចិនរយៈពេល ៣ថ្ងៃត្រូវបានទម្លាយឲ្យដឹងដោយមធ្យោបាយឃោសនាមហាជននៅចិន និងនៅជប៉ុន។ កាសែតផ្លូវការចិនឈ្មោះស៊ីនហួរមិនបានប្រាប់ឲ្យដឹងពីកម្មវត្ថុនៃទស្សនកិច្ចរបស់លោករី ស៊ូយ៉ុងទេ តែកាសែតជប៉ុនក្យូដូបានអះអាងថា ថ្នាក់ដឹកនាំជាន់ខ្ពស់កូរ៉េខាងជើងរូបនេះទៅចិនដើម្បីរាយការណ៍ប្រាប់មិត្តចិនអំពីលទ្ធផលនៃសមាជរបស់គណបក្សពលករកូរ៉េខាងជើងដែលបានបើកធ្វើកាលពីពាក់កណ្តាលខែឧសភាកន្លងទៅ។
គឺជាសមាជដែលកូរ៉េខាងជើងបានរៀបចំជាលើកទី១ គិតជិត ៤០ឆ្នាំកន្លងទៅ និងដែលចិនមិនបានចូលរួមទេ។ អវត្តមានរបស់ចិនដែលជាសម្ព័ន្ធមិត្តចាក់ទឹកមិនលេចរបស់កូរ៉េខាងជើងកាលណោះបានធ្វើឲ្យគ្រប់គ្នាមានចម្ងល់យ៉ាងខ្លាំង។ អ្នកខ្លះថា ក្រុងព្យុងយ៉ាងបានអញ្ជើញចិនឲ្យចូលរួមដែរ តែចិនមិនទៅ តែអ្នកខ្លះទៀតថា ចិនមិនត្រូវបានកូរ៉េខាងជើងអញ្ចើញឲ្យចូលរួមទេ។
កូរ៉េខាងជើងទៅលូងលោមចិន
ការដែលកូរ៉េខាងជើងបានបញ្ជូនអ្នកតំណាងជាន់ខ្ពស់ម្នាក់របស់ខ្លួនទៅកាន់ប្រទេសចិនដើម្បីរាយការណ៍ពីលទ្ធផលសមាជ ឬអ្វីមួយនោះ គឺជារឿងមួយធម្មតាក្នុងនាមកូរ៉េខាងជើងជាកូនចៅរបស់ចិន ឬអាចថាចិនជាបងធំរបស់កូរ៉េខាងជើង។ តែហេតុផលដែលថា លោករី ស៊ូយ៉ុងទៅចិនដើម្បីជម្រាបពីលទ្ធផលសមាជគ្រាន់តែជាលេសមួយប៉ុណ្ណោះ ពោលមិនមែនជាកម្មវត្ថុចម្បងរបស់លោករី ស៊ូយ៉ុងទេ។ កម្មវត្ថុជាអាទិភាពរបស់លោករី ស៊ូយ៉ុងដែលគេមើលឃើញ គឺដើម្បីទៅលូងលោមចិនកុំឲ្យខឹងសម្បារនឹងខ្លួន និងសុំឲ្យចិនបន្តការគាំទ្រចំពោះខ្លួនជាបន្តទៀត ពិសេសនៅក្នុងវិស័យសេដ្ឋកិច្ច។
សូមជម្រាបជូនថា ចិនបានចេញមុខគំាទ្រ និងការពារកូរ៉េខាងជើងគ្រប់បែបយ៉ាង និងនៅគ្រប់កាលៈទេសៈទាំងអស់ទាក់ទងនឹងសំណុំរឿងនុយក្លេអ៊ែរដ៏ចម្រូងចម្រាស។ ដោយអាងខ្នងចិន របបក្រុងព្យុងយ៉ាងបានយកនុយក្លេអ៊ែរ និងគ្រាប់មីស៊ីលទៅផ្គើនសហគមន៍អន្តរជាតិជាបន្តបន្ទាប់។ តែថ្មីៗចុងក្រោយនេះ ចិនហាក់ដូចជាធុនទ្រាន់ នឿយណាយ និងទើសទាល់ចិត្តយ៉ាងខ្លាំងនៅចំពោះមុខទង្វើច្រំដែលរបស់កូរ៉េខាងជើង។ ដើម្បីជាការព្រមានផង និងប្រដៅផង ចិនក៏បានសម្រេចចិត្តចាត់វិធានការជាក់ស្តែងមួយចំនួននាពេលថ្មីៗកន្លងទៅ ពិសេសវិធានការសេដ្ឋកិច្ច។
ក្រសួងពាណិជកម្មចិនបានប្រកាសឈប់ទិញផលិតផលរ៉ែធ្យូងថ្ម រ៉ែដែក មាស ទីតាន និងផលិតផលរ៉ែកម្រមួយចំនួនទៀតពីកូរ៉េខាងជើង ព្រមទាំងឈប់លក់ឲ្យកូរ៉េខាងជើងនូវប្រេងឥន្ធនៈ។ ទន្ទឹមគ្នានេះ ចិនក៏យល់ព្រមឲ្យមានចំណាត់ការចំាបាច់ពីក្រុមប្រឹក្សាសន្តិសុខអង្គការសហប្រជាជាតិដើម្បីឆ្លើយតបនឹងទង្វើរបស់កូរ៉េខាងជើងដែរ។
កូរ៉េខាងជើងបន្តផ្គើនសហគមន៍អន្តរជាតិ
ចំថ្ងៃទស្សនកិច្ចរបស់ថ្នាក់ដឹកនាំជាន់ខ្ពស់កូរ៉េខាងជើងក្នុងប្រទេសចិនពេលនេះ របបក្រុងព្យុងយ៉ាងបានបាញ់សាកល្បងគ្រាប់មីស៊ីលអន្តរទ្វីបជាថ្មី តែប្រហែលជាមិនបានទទួលជោគជ័យដូចការរំពឹងទុកទេ។ ព័ត៌មាននេះត្រូវបានប្រកាសដោយក្រសួងការពារជាតិកូរ៉េខាងត្បូងនៅថ្ងៃនេះ តែមិនបានបញ្ជាក់លំអិតពីប្រភេទគ្រាប់មីស៊ីល។ ចំណែកអ្នកនាំពាក្យសេនាធិការដ្ឋានកូរ៉េខាងត្បូងបានប្រាប់ឲ្យដឹងថា កងទ័ពកំពុងស្វែងរកពីមូលហេតុនៃការបាញ់មិនបានសម្រេច។ បើតាមមើលទៅ ប្រហែលជាគ្រាប់មីស៊ីលអន្តរទ្វីបប្រភេទ Musudan។
ការសង្ស័យរបៀបនេះក៏ដោយសារថានាខែមេសាកន្លងទៅ កូរ៉េខាងជើងធ្លាប់បានព្យាយាមសាកល្បងបាញ់គ្រាប់មីស៊ីលអន្តរទ្វីបប្រភេទ Musudan នេះចំនួន ៣ដងមិនបានសម្រេច។ ជាប្រភេទមីស៊ីលអន្តរទ្វីបដែលអាចបាញ់បានចម្ងាយពី ២ ៥០០ ទៅ ៤ ០០០គីឡូម៉ែត្រ ពោលអាចទៅដល់ទឹកដីកូរ៉េខាងត្បូង និងជប៉ុន ព្រមទាំងឆ្លងចូលដល់មូលដ្ឋានទ័ពអាមេរិកលើកោះ Guam ទៀតផង។ ដូច្នេះឃើញថា អ្នកនិយាយចេះតែនិយាយទៅ ហើយអ្នកធ្វើក៏ចេះតែធ្វើទៅ។
កូរ៉េខាងជើង និងចិនត្រូវការគ្នាទៅវិញ ទៅមក
កូរ៉េខាងជើងមិនសូវខ្វល់ និងបារម្ភពីការព្រមានរបស់ចិន ហើយចិនខ្លួនឯងក៏ដឹងថា កូរ៉េខាងជើងក៏មិនស្តាប់តាមខ្លួនដែរ។ តែចិនត្រូវតែធ្វើក្នុងនាមជាចៅហ្វាយរបស់កូរ៉េខាងជើង និងដើម្បីបំពេញចិត្តសហគមន៍អន្តរជាតិ។ ចូរកុំភ្លេចថា កូរ៉េខាងជើង និងចិនត្រូវការគ្នាទៅវិញ ទៅមកដោយមិនអាចកាត់ផ្តាច់បានទេ។ កូរ៉េខាងជើងត្រូវការដង្ហើមចិនដើម្បីប្រយោជន៍សេដ្ឋកិច្ច តែចិនត្រូវកូរ៉េខាងជើងដើម្បីប្រយោជន៍សេដ្ឋកិច្ច និងប្រយោជន៍ភូមិសាស្រ្តនយោបាយនៅក្នុងតំបន់។
ដង្ហើមសេដកិច្ចកូរ៉េខាងជើងបានពឹងលើដង្ហើមសេចដ្ឋកិច្ចចិនសឹងតែទាំងស្រុង។ ជាក់ស្តែងក្នុងឆ្នាំ ២០១៤ ចិនស្រូបយកតែម្នាក់ឯងជាង ៩០% នៃពាណិជ្ជកម្មក្រៅប្រទេសរបស់កូរ៉េខាងជើង។ ក្នុងឆ្នាំ ២០១៥ កន្លងទៅថ្មីៗនេះ ចិនបាននាំចូលផលិតផលពីកូរ៉េខាងជើងមានទឹកប្រាក់ជាង ២ ៥០០លានដុល្លារ ក្នុងនោះជាង ១ ០០០លានដុល្លារជាផលិតផលរ៉ែធ្យូងថ្ម។ តែសម្រាប់ចិនវិញ ក្រៅពីប្រយោជន៍សេដ្ឋកិច្ចផ្តាច់មុខដែលខ្លួនទទួលបានពីកូរ៉េខាងជើង ចិនក៏មិនចង់ឃើញរបបកុម្មុយនិស្តស្ថិតជាប់ខ្លួនមួយនេះដួលរលំងាយៗដែរ។ សម្រាប់ប៉េកាំង ការស្លាប់កូរ៉េខាងជើងជាបើកទ្វារបន្ថែមឲ្យអាមេរិកបង្កើនឥទ្ធិពលនៅក្នុងតំបន់ចំពេលដែលអាមេរិកកំពុងមានមូលដ្ឋានយោធាស្រាប់នៅក្នុងទឹកដីកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ