នៅអាមេរិក វិធានការបិទទីក្រុងដោយសារកូវីដ បំផ្លាញ ការងារជាង ២០លានក្នុងរយៈពេលតែមួយខែ
កូវីដ ១៩បានធ្វើឲ្យសេដ្ឋកិច្ចអាមេរិកបាត់បង់ការងារ ដ៏ច្រើនសន្ធឹកសន្ធាប់ ជាងពេលណាៗទាំងអស់។ សេចក្តីប្រកាសរបស់ក្រសួងការងារ អាមេរិក កាលពីថ្ងៃសុក្រម្សិលមិញ បានបង្ហាញថា ការងារប្រមាណ ២០លាន ត្រូវបានបំផ្លាញ ក្នុងរយៈពេលតែមួយខែ មេសា ដោយសារវិធានការបិទទីក្រុង បិទក្រុមហ៊ុន នៅក្នុងកាលៈទេសៈកើតជំងឺរាតត្បាត កូវីដ ១៩។ អត្រាអ្នកអត់ការងារធ្វើវិញ បានកើនឡើង ១៤,៧% គឺច្រើនជាង៣ដង បើប្រៀបធៀបនឹងខែមីនា ដែលមានត្រឹម៤,៤%ប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២៦
សេដ្ឋកិច្ចអាមេរិកមិនដែលបំផ្លាញ ការងារដ៏ច្រើនសន្ធឹកសន្ធាប់ ក្នុងរយៈពេលដ៏ខ្លីបែបនេះ ទេ ពីមុនមក។ នៅឆ្នាំ២០០៩ វិបត្តិហិរញ្ញវត្ថុសកល បានបំផ្លាញ ការងារប្រមាណ ១០លាន ក្នុងរយៈពេល ២ឆ្នាំ។ ប៉ុន្តែ វិធានការបិទទីក្រុង ដោយសារវិបត្តិកូវីដ បានបំផ្លាញការងារ ដល់ទៅ ២០លាន ក្នុងរយៈពេលតែមួយខែមេសា។
ប្រតិកម្មទៅនឹងតួលេខរបស់ក្រសួងការងារ ប្រធានាធិបតីអាមេរិក លោកដូណាល់ ត្រាំ ដែលចង់ផ្តោតលើសេដ្ឋកិច្ចរឹងមាំក្នុងអាណត្តិទី១ របស់លោក ទៅធ្វើជាគន្លឹះសំខាន់សម្រាប់យុទ្ធនាការឃោសនាបោះឆ្នោត បាននិយាយបង្រួមបញ្ហាដោយថា តួលេខបាត់បង់ការងារ ជាតួលេខដែលគេបានរំពឹងទុករួចហើយ។ លោកបានសន្យាផងដែរថា នឹងស្តារយកការងារនេះមកវិញ។
ជាការពិត ការបាត់បង់ការងារ ចំនួន ២០លាន មានតិចជាងការព្យាករទុកមុនរបស់អ្នកវិភាគដែលព្យាករថា អាមេរិកអាចបាត់បង់ការងារ ដល់ទៅ ២៨លាន ចំណែក អត្រាអ្នកគ្មានការងារធ្វើ នៅខែមេសា នឹងអាចមាន ពី១៦ទៅ ២០%។
តាមក្រសួងការងារអាមេរិក ចំនួនអ្នកគ្មានការងារធ្វើ បានហក់ កើនឡើងពី ១៥,៩លាន ទៅ ២៣លាននាក់ នៅខែមេសា។ នៅមុន វិបត្តិកូវីដ ចំនួនអ្នកមកចុះឈ្មោះ គ្មានការងារធ្វើ មានប្រមាណ ជាង ២សែន ក្នុងមួយសប្តាហ៍ ប៉ុន្តែ នៅប៉ុន្មានសប្តាហ៍នេះ មនុស្សចុះឈ្មោះ គ្មានការងារ មានចំនួនច្រើនជាង ១លាន រហូត ដល់ ៣លាននាក់ ក្នុងមួយសប្តាហ៍។
ខែមេសា ឆ្លុះបញ្ចាំងពីកម្រិតប៉ះពាល់របស់វិបត្តិកូវីដ ទៅលើសេដ្ឋកិច្ចអាមេរិក។ ឆ្លើយតបនឹងវិបត្តិ ជំងឺរាតត្បាត កូវីដ មហាអំណាចសេដ្ឋកិច្ចពិភពលោកលេខ១ បានបិទទីក្រុង បិទក្រុមហ៊ុន ដែលធ្វើឲ្យសេដ្ឋកិច្ចត្រូវឈប់គាំង ដ៏គំហុក។ គិតចាប់តាំងពីមានវិធានការបិទទីក្រុង កាលពីពាក់កណ្តាលខែមីនា ការផ្អាកសកម្មភាពសេដ្ឋកិច្ច សឹងទាំងស្រុង បានធ្វើឲ្យមនុស្ស ៣៣,៥លាននាក់ បាត់ការងារធ្វើ។
តាមក្រសួងការងារអាមេរិក ការងារក្នុងគ្រប់វិស័យ រងប៉ះពាល់ ដោយសារវិធានការដាក់មនុស្សក្នុងផ្ទះ។ ផ្នែកទេសចរណ៍កំសាន្ត និងសណ្ឋាគារ រងប៉ះពាល់ធ្ងន់ធ្ងរជាងគេ។ រដ្ឋបាលលោកដូណាល់ ត្រាំ និងសភា ទើបបានបញ្ចេញថវិកាជាង ៦៦៩ ពាន់លានដុល្លារ សម្រាប់ឲ្យក្រុមហ៊ុនធុនតូច និងមធ្យមខ្ចី យកទៅប្រើដើម្បីបើកប្រាក់ខែឲ្យបុគ្គលិក។
នៅចុងខែមេសាកន្លងទៅ រដ្ឋាភិបាលអាមេរិកទើបសម្រេច ផ្តល់ប្រាក់សំណង ដល់អ្នកគ្មានការងារធ្វើ ប្រមាណ ២២,៦លាននាក់។ ជាចំនួនដ៏ច្រើន ព្រោះថា ចំនួនអ្នកដែលបានទទួលប្រាក់សំណងនេះ មានប្រមាណ តែ ជាង ១លាននាក់ប៉ុណ្ណោះ នៅមុន វិបត្តិរាតត្បាតរបស់ជំងឺកូវីដ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ