FBIស្វែងរកចាប់ខ្លួន ស្រ្តីម្នាក់ ដែលលួចកុំព្យូទ័ររបស់ប្រធានរដ្ឋសភា ដើម្បី លក់ឲ្យរុស្ស៊ី
ប៉ូលិសសហព័ន្ធ FBIកំពុងស្វែងរកចាប់ខ្លួន ស្រ្តី អាមេរិកាំង ម្នាក់ ដែលប៉ូលិសសង្ស័យថា បានលួចយកកុំព្យូទ័ររបស់លោកស្រី Nancy Pelosi ប្រធានសភាអ្នកតំណាងរាស្រ្ត នៅក្នុងព្រឹត្តិការណ៍សម្រុកចូលវិមានកាពីតូល ពីសំណាក់ក្រុមគាំទ្រលោកដូណាល់ ត្រាំ កាលពីថ្ងៃទី ៦មករា។ តាមសាក្សី ដែលប៉ូលិស FBI បានស្រង់ក្នុងបណ្តឹង ដាក់ទៅ រដ្ឋអាជ្ញាក្រុងវ៉ាស៊ីនតោន កាលពី ថ្ងៃ អាទិត្យ ស្រ្តីអាមេរិកាំង វ័យ ២២ឆ្នាំ មានគំនិត ចង់លក់កុំព្យូទ័ររបស់ប្រធានបក្សប្រជាធិបតេយ្យ នៅ រដ្ឋសភាអាមេរិក ទៅឲ្យ ទីភ្នាក់ងារស៊ើបការណ៍សម្ងាត់របស់រុស្ស៊ី។
ចុះផ្សាយនៅថ្ងៃ៖
នៅក្នុងពាក្យបណ្តឹងទៅកាន់តុលាការក្រុងវ៉ាស៊ីនតោន កាលពី ថ្ងៃអាទិត្យ ប៉ូលិស FBI បានសុំដីកា តាមចាប់ ស្រ្តីអាមេរិកាំង ឈ្មោះ Riley June William ក្នុងបទចោទប្រកាន់ ឈ្លានពាន ដោយហិង្សា និងចូលទៅ បង្កអសណ្តាប់ធ្នាប់ នៅ ក្នុងវិមានកាពីតូល។ តាមកាសែត Washington Post អាជ្ញាធរសហព័ន្ធបានចាប់ខ្លួនស្រ្តីម្នាក់ នៅ ថ្ងៃចន្ទ ប៉ុន្តែ មិនបានបញ្ជាក់ព័ត៌មានលម្អិតនោះទេ។
នៅក្នុងបទចោទប្រកាន់របស់ប៉ូលិស FBI ស្រ្តីអាមេរិកាំង Riley June William អាយុ ២២ឆ្នាំ ដែលមានដើមកំណើតនៅ រដ្ឋPennsyvalnia ត្រូវបានសាក្សី ម្នាក់ ដែលជាអតីតសង្សារ ចង្អុរមុខថា មានគម្រោងបញ្ជូនកុំព្យូទ័រទៅឲ្យមនុស្សស្គាល់គ្នាម្នាក់ នៅ ទីក្រុងម៉ូស្គូ ដើម្បី លក់បន្តទៅ ឲ្យភ្នាក់ងារស៊ើបការណ៍សម្ងាត់រុស្ស៊ី។
សាក្សី ខាងលើបានរៀបរាប់ប្រាប់ប៉ូលិសថា គេបានឃើញវីដេអូជាច្រើន ដែលនៅក្នុងនោះ Riley June Williamបានលួចយក ម៉ាស៊ីនកុំព្យូទ័រ ឬ Hard disc នៅក្នុងការិយាល័យធ្វើការរបស់លោកស្រី Nancy Pelosy នៅក្នុងពេល ក្រុមគាំទ្រ លោកដូណាល់ ត្រាំ សម្រុកចូលវិមានកាពីតូល។ តាមសាក្សីដដែល Riley June Williamបរាជ័យ មិនអាចលក់កុំព្យូព័រ ដោយសារហេតុផលដែលគេមិនបានដឹងច្បាស់។ កុំព្យូទ័រ កំពុងស្ថិតក្នុងដៃរបស់Riley June William ឬត្រូវបានកម្ទេចចោល។
រហូតមកដល់ពេលនេះ គេនៅ មិនទាន់ដឹងច្បាស់ថា តើកុំព្យូទ័ររបស់ប្រធានក្រុមបក្សប្រជាធិបតេយ្យនៅរដ្ឋសភា ពិតជាត្រូវបានគេលួចមែនដែរឬទេ។ ប៉ូលិស FBI កំពុងស៊ើបអង្កេតពីរឿងនេះ ចំណែក ការិយាល័យរដ្ឋអាជ្ញារបស់ក្រុងវ៉ាស៊ីនតោន បានបដិសេធមិនអត្ថាធិប្បាយអ្វីទាំងអស់ជុំវិញ រឿងនេះ។
ចាប់តាំងពី កើតមានហេតុការណ៍ សម្រុកចូលដោយហិង្សារបស់ក្រុមគាំទ្រលោកដូណាល់ ត្រាំ ក្នុងវិមានកាពីតូល ប៉ូលិស FBI ដែលបានប្រើរូបភាពវីដេអូ និងសាក្សី បានកំណត់អត្តសញ្ញាណ និងតាមចាប់ខ្លួន មនុស្ស បានជិត ៧០នាក់ ក្នុងបទចោទប្រកាន់ពី កាន់កាប់អាវុធខុសច្បាប់ បង្កអសណ្តាប់ធ្នាប់សង្គម ហើយនិងយាយីធ្វើបាប ទីភ្នាក់ងាររក្សាសន្តិសុខរបស់រដ្ឋ។ ព្រឹត្តិការណ៍សម្រុកចូលវិមានកាពីតូល របស់ក្រុមគាំទ្រ លោកដូណាល់ ត្រាំ ដែលជាព្រឹត្តិការណ៍ប្រវត្តិសាស្រ្ត នៅ អាមេរិក បានជំរុញ ឲ្យពិធីស្បថចូលកាន់តំណែង របស់លោកប្រធានាធិបតី ចូ បៃដិន ត្រូវរៀបចំឡើង នៅក្រោម បរិយាកាស យាមការពារ ដ៏តឹងរ៉ឹង របស់ឆ្មាំជាតិ ដើម្បី ពង្រឹងសន្តិសុខសណ្តាប់ធ្នាប់ ទប់ស្កាត់ កុំឲ្យមានកុប្បកម្ម របស់ក្រុមគាំទ្រលោកដូណាល់ ត្រាំ ដូចកាលពីថ្ងៃទី ៦មករាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ