សមាគមជាច្រើនជំរុញឲ្យហ្វេសប៊ុកបិទលោកដូណាល់ ត្រាំពីបណ្តាញសង្គមនេះជាអចិន្ត្រៃយ៍
អតីតប្រធានាធិបតីអាមេរិកលោកដូណាល់ ត្រាំ កំពុងត្រូវព្រឹទ្ធសភាបន្តនីតិវិធីដកតំណែង ហើយការបោះឆ្នោតសម្រេចយ៉ាងណានោះក៏អាចនឹងធ្វើឡើងក្នុងពេលឆាប់ៗដែរ។ ទន្ទឹមគ្នានេះ មានអ្នកជំនាញនិងអ្នកតស៊ូមតិជាច្រើនបាននាំគ្នាអំពាវនាវផងដែរឲ្យក្រុមហ៊ុនហ្វេសប៊ុកបិទគណនីផ្ទាល់ខ្លួនរបស់លោកត្រាំជាអចិន្ត្រៃយ៍តែម្តង។
ចុះផ្សាយនៅថ្ងៃ៖
ស្តាប់ - ០២:១០
ក្រុមអ្នករិះគន់ក្រុមហ៊ុនបណ្តាញសង្គមហ្វេសប៊ុករួមជាមួយនឹងក្រុមអ្នកតស៊ូមតិជាច្រើនទៀត បានចេញមុខអំពាវនាវដល់ក្រុមប្រឹក្សាភិបាលត្រួតពិនិត្យរបស់ហ្វេសប៊ុកកុំអនុញ្ញាតឲ្យលោកត្រាំ ប្រើហ្វេសប៊ុកឡើងវិញឲ្យសោះ ក្រោយព្រឹត្តិការណ៍វាយប្រហារនាថ្ងៃទី ៦ ខែមករាលើវិមានកាពីតូលដែលជានិមិត្តរូបនៃលទ្ធិប្រជាធិបតេយ្យរបស់សហរដ្ឋអាមេរិក។
ការអំពាវនាជាសាធារណៈខាងលើធ្វើឡើងកាលពីថ្ងៃសុក្រម្សិលមិញ នៅក្នុងសំណើសុំរួមមានដែលមានអ្នកចុះហត្ថេលខាគាំទ្រចំនួន ៩ ០០០ នាក់។ នេះបើយោងតាមក្រុមប្រឹក្សាភិបាលហ្វេសប៊ុក។ ក្រុមហ៊ុនបណ្តាញសង្គមហ្វេសហ៊ុកខ្លួនឯងផ្ទាល់បានស្នើសុំឲ្យស្ថាប័នឯករាជ្យ ត្រួតពិនិត្យមើលឡើងវិញ នូវការបិទខ្ទប់លោកដូណាល់ ត្រាំ ទាំងស្រុងចេញពីសហគមន៍អនឡាញនេះ។
ក្រុមប្រឹក្សាត្រួតពិនិត្យដែលជាស្ថាប័នឯករាជ្យគឺជាអ្នកសម្រេចចុងក្រោយថាតើ ត្រូវបិខខ្ទប់ ឬក៏ត្រូវអនុញ្ញាតឲ្យលោកអតីតប្រធានាធិបតីអាមេរិកាំងដូណាល់ ត្រាំ អាចប្រើហ្វេសប៊ុក ដែលជាបណ្តាញសង្គមដ៏ធំបំផុតរបស់ពិភពលោក។ គេរំពឹងថាសេចក្តីសម្រេចរបស់ក្រុមប្រឹក្សាហ្វេសប៊ុក អាចនឹងធ្វើឡើងនៅខែមេសា ឆ្នាំ២០២១ ខាងមុខ។
ក្រុមអ្នករិះគន់មួយក្រុមមកពីអង្គការសមាគមមួយចំនួន បានសរសេរនៅក្នុងលិខិតមួយថាការអនុញ្ញាតឲ្យលោកដូណាល់ ត្រាំ អាចប្រើប្រាស់ហ្វេសប៊ុកបានឡើងវិញ គឺប្រៀបបីដូចជាបើកដៃឲ្យកើតមានអំពើហិង្សា ភាពស្អប់ខ្ពើម និងការផ្សព្វផ្សាយព័ត៌មានមិនពិត ដែលអាចនឹងធ្វើឲ្យប៉ះពាល់ដល់អាយុជីវីតមនុស្ស និងធ្វើឲ្យអន្តរាយដល់លទ្ធិប្រជាធិបតេយ្យ។ ដូច្នោះហើយ ពួកគេសង្ឃឹមថាក្រុមហ៊ុនហ្វេសប៊ុកនឹងគិតគូរពីបញ្ហានេះ ហើយនៅទីបំផុតទៅយល់ព្រមសម្រេចបិទជាអចិន្រ្តៃយ៍តែម្តងនូវគណនីផ្ទាល់ខ្លួនរបស់លោកដូណាល់ ត្រាំ។
នៅក្នុងលិខិតរបស់ខ្លួនផ្ញើទៅកាន់ក្រុមប្រឹក្សាភិបាលហ្វេសប៊ុក ក្រុមសកម្មជនបានរិះគន់ក្រុមហ៊ុនប្រព័ន្ធផ្សព្វផ្សាយសង្គមនេះថាបានជួលក្រុមប្រឹក្សាភិបាល ដើម្បីគេចវេសពីការទទួលខុសត្រូវ លើការសម្រេចចិត្តពាក់ព័ន្ធរឿងដែលលំបាក។ មិនតែប៉ុណ្ណោះ ពួកគេក៏បានអំពាវនាវផងដែរឲ្យមានច្បាប់ដើម្បីត្រួតពិនិត្យតាមដានប្រព័ន្ធផ្សព្វផ្សាយសង្គមយក្សដូចជាហ្វេសប៊ុកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ