អាមេរិក៖ចាប់ខ្លួនវិស្វករ និងប្រពន្ធក្នុងបទលក់ព័ត៌មានសម្ងាត់ទាក់ទងនឹងនាវាមុជទឹកនុយក្លេអ៊ែរទៅឲ្យបរទេស
នៅអាមេរិក ក្រសួងយុត្តិធម៌បានប្រកាសក្នុងថ្ងៃអាទិត្យ ទី១០ តុលាពីការចាប់ខ្លួនវិស្វករទ័ពជើងទឹក និងប្រពន្ធក្នុងរដ្ឋវើជីញ៉ាខាងលិចពីបទលក់ព័ត៌មានសម្ងាត់ទាក់ទងនឹងនាវាមុជទឹកដើរដោយនុយក្លេអ៊ែរទៅឲ្យបរទេស។ តាមក្រសួងយុត្តិធម៌អាមេរិក រឿងរ៉ាវមួយនេះបានកើតមានជិតមួយឆ្នាំកន្លងមក។ គួររម្លឹកថាថ្មីៗនេះ នាវាមុជទឹកអាមេរិកដើរដោយនុយក្លេអ៊ែរជាប្រធានបទនៃវិបត្តិការទូតរវាងអាមេរិក និងប្រទេសបារាំងនៅពេលដែលប្រទេសអូស្រ្តាលីបានលុបកុងត្រាទិញនាវាមុជទឹកបារាំង ហើយងាកទៅទិញនាវាមុជទឹកអាមេរិកវិញ។
ចុះផ្សាយនៅថ្ងៃ៖
ស្តាប់ - ០២:០១
តាមក្រសួងយុត្តិធម៌អាមេរិក គឺព័ត៌មានសម្ងាត់ស្តីពីការសាងសង់នាវាមុជទឹកដើរដោយនុយក្លេអ៊ែរដែលវិស្វករទ័ពជើងទឹកឈ្មោះចូណាថាន ថេប៊ី (Jonathan Toebbe) អាយុ ៤២ឆ្នាំ និងប្រពន្ធឈ្មោះឌីយ៉ាណា (Diana) អាយុ ៤៥ឆ្នាំបានលក់ទៅឲ្យបរទេស។ តែក្រសួងមិនបានបញ្ជាក់ពីប្រទេសណាមួយទេ។ តាមពិតទៅ ប្តី ប្រពន្ធទាំងពីរនាក់បានធ្វើការងារមួយនេះជាមួយមនុស្សម្នាក់ដែលពួកគេគិតថា ជាអ្នកតំណាងឲ្យប្រទេសមហាអំណាចមួយ។ តែការពិត រូបមនុស្សនោះគឺជាភ្នាក់ងាររបស់ FBI ដែលលាក់អត្តសញ្ញាណទេតើ។ គឺតាមរយៈវត្តមានរបស់ភ្នាក់ងារ FBI លាក់អត្តសញ្ញាណរូបនេះដែលនាំឲ្យមានការបែកធ្លាយរឿងរ៉ាវរបស់ប្តី ប្រពន្ធទាំងពីរនាក់ និងឈានដល់ការចាប់ខ្លួនពួកគេ។
តាមបណ្តឹងរបស់រដ្ឋអាជ្ញាក្នុងរដ្ឋវើជីញ៉ាខាងលិច ប្តី ប្រពន្ធទាំងពីរនាក់បានបញ្ជូនឯកសារយោធាសម្ងាត់ស្តីពីការសាងសង់ម៉ាស៊ីនប្រតិកម្មនុយក្លេអ៊ែរសម្រាប់បំពាក់ឲ្យនាវាមុជទឹក រួមទាំងរចនាសម្ព័ន្ធរបស់នាវាមុជទឹកកាលពីថ្ងៃទី២៦ មិថុនា ឆ្នាំ ២០២១។ នៅចន្លោះខែមិថុនា និងខែសីហា ប្តី ប្រពន្ធទាំងពីរនាក់បានទទួលប្រាក់ជាលុយឌីជីថលចំនួន ១០០ ០០០ដុល្លារជាថ្នូរនឹងការលក់ព័ត៌មានសម្ងាត់ស្តីពីការសាងសង់ម៉ាស៊ីនប្រតិកម្មនុយក្លេអ៊ែររបស់នាវាមុជទឹក។ ព័ត៌មានសម្ងាត់ទាំងនេះត្រូវបានដាក់នៅក្នុងកាត SD និងបង្កប់នៅក្នុងនំប៉័ងដាក់សាច់ ឬនៅក្នុងប្រអប់ស្ករកៅស៊ូ រួចវិចខ្ចប់យកទៅដាក់នៅទីកន្លែងដែលបានកំណត់ និងណាត់ជួបមុនក្នុងរដ្ឋវើជីញ៉ាខាងលិច។
តែគឺទើបនៅថ្ងៃសៅរ៍ ទី៩ តុលាដែលប្តី ប្រពន្ធទាំងពីរត្រូវបានចាប់ខ្លួន បន្ទាប់ពីពួកគេបានយកកាត SD ទៅដាក់ម្តងទៀតនៅកន្លែងណាត់ជួប។ ជាប់ចោទពីបទរំលោភលើច្បាប់ថាមពលបរមាណូ ប្តី ប្រពន្ធទាំងពីរនាក់នឹងត្រូវបង្ហាញខ្លួននៅក្នុងតុលាការរដ្ឋវើជីញ៉ាខាងលិចនាថ្ងៃអង្គារ ទី១២ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ