នីការ៉ាហ្កាផ្តាច់ទំនាក់ទំនងការទូតជាមួយតៃវ៉ាន់ និងងាកទៅទទួលស្គាល់ចិនតែមួយ
នៅថ្ងៃព្រហស្បតិ៍ ទី៩ ធ្នូ ប្រទេសនីការ៉ាហ្កាបានប្រកាសផ្តាច់ទំនាក់ទំនងការទូតជាមួយតៃវ៉ាន់ និងបានងាកទៅទទួលស្គាល់ចិនតែមួយ។ តៃវ៉ាន់តាមរយៈក្រសួងការបរទេសបានសម្តែងការសោកស្តាយចំពោះការសម្រេចចិត្តរបស់នីការ៉ាហ្កា។ ចំណែកអាមេរិកក៏បានបញ្ចេញប្រតិកម្មសោកស្តាយដូចគ្នា និងបានអំពាវនាវឲ្យក្រុមប្រទេសប្រជាធិបតេយ្យបង្កើនចំណងទាក់ទងជាមួយកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០១:៤៩
« ចាប់ពីពេលនេះតទៅ រដ្ឋាភិបាលនីការ៉ាហ្ការបស់ប្រធានាធិបតីលោក Daniel Ortega ផ្តាច់ទំនាក់ទំនងការទូតជាមួយតៃវ៉ាន់ និងបញ្ឈប់គ្រប់ការទាក់ទង ឬទំនាក់ទំនងផ្លូវការទាំងអស់ » នេះជាការថ្លែងរបស់រដ្ឋមន្រ្តីក្រសួងការបរទេសនីការ៉ាហ្កាលោក Denis Moncada នៅក្នុងសេចក្តីប្រកាសព័ត៌មានមួយ។ តាមលោក Moncada សាធារណរដ្ឋប្រជាមានិតចិនជារដ្ឋាភិបាលស្របច្បាប់តែមួយគត់ដែលតំណាងឲ្យចិនទាំងមូល ហើយតៃវ៉ាន់គ្រាន់ជាផ្នែកមួយរបស់ចិនដែលមិនអាចផ្តាច់ចេញបានទេ។ ចិនបានសាទរ និងបានបញ្ជាក់ពីការភ្ជាប់ទំនាក់ទំនងការទូតជាមួយនីការ៉ាហ្កាដោយគ្មានបង្អង់យូរ។
ចំណែកតៃវ៉ាន់បានបញ្ចេញប្រតិកម្មសោកស្តាយជាពន់ពេក។ ពីអាមេរិក ក្រសួងការបរទេសក៏បានសម្តែងការសោកស្តាយ និងបានលើកទឹកចិត្តឲ្យក្រុមប្រទេសប្រជាធិបតេយ្យបង្កើនទំនាក់ទំនងជាមួយតៃវ៉ាន់។ អ្វីជាការកត់សម្គាល់ ការប្រកាសផ្តាច់ទំនាក់ទំនងការទូតជាមួយតៃវ៉ាន់របស់នីការ៉ាហ្កាបានធ្វើឡើង មួយថ្ងៃក្រោយពីអាមេរិកបានពង្រឹងទណ្ឌកម្មប្រឆាំងប្រធានាធិបតីនីការ៉ាហ្កាលោក Daniel Ortega។ គួររម្លឹកថា ទំនាក់ទំនងដែលតៃវ៉ាន់មានជាមួយនីការ៉ាហ្កាច្រើននៅក្នុងវិស័យសុខភាព ឬកសិកម្ម។ តាំងពីទសវត្ស៩០ មានរោងចក្រ សហគ្រាសតៃវ៉ាន់ជាច្រើនបានបោះទីតាំងនៅនីការ៉ាហ្កា។
មែនទែនទៅ ការដោះដៃចោលចិនដីគោកទៅឱបចិនតៃវ៉ាន់ ឬមួយក៏ការដោះដៃចោលចិនតៃវ៉ាន់ទៅឲ្យចិនដីគោកមិនមានអ្វីគួរឲ្យភ្ញាក់ផ្អើលទេនៅនីការ៉ាហ្កា ព្រោះវាបានផ្លាស់ប្តូរទៅតាមការផ្លាស់ប្តូរថ្នាក់ដឹកនាំ។ ជាមួយនឹងការដោះដៃរបស់នីការ៉ាហ្កាពេលនេះ គឺនៅសល់តែ ១៤ប្រទេសប៉ុណ្ណោះដែលកំពុងបន្តទទួលស្គាល់កោះតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ