តៃវ៉ាន់ជាប្រធានរឿងក្តៅនៃជំនួបទ្វេភាគីថ្នាក់រដ្ឋមន្រ្តីការបរទេសរវាងអាមេរិក និងចិនក្នុងក្រុងញូយ៉ក
នៅថ្ងៃសុក្រ ទី២៣ កញ្ញា ប្រមុខការទូតអាមេរិកលោកអង់តូនី ប្ល៊ីងកិន និងសមភាគីចិនលោកវ៉ាង យីជួបសន្ទនាគ្នាក្នុងទីក្រុងញូយ៉កនៅក្រៅក្របខណ្ឌនៃមហាសន្និបាតអង្គការសហប្រជាជាតិ។ ជំនួបនេះធ្វើឡើង ខណៈដែលតៃវ៉ាន់កំពុងក្លាយជាប្រធានរឿងចម្រូងចម្រាសខ្លាំងរវាងប្រទេសមហាអំណាចសេដ្ឋកិច្ចទាំងពីរក្នុងលោកនារយៈពេលចុងក្រោយនេះ។ នៅមួយថ្ងៃមុនជួបប្រមុខការទូតចិន លោកអង់តូនី ប៊្លីនកិនក៏បានជួបសន្ទនាជាមួយសមភាគីជប៉ុន និងកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:០៣
ក្នុងរយៈពេលចុងក្រោយនេះ តៃវ៉ាន់បានក្លាយជាផ្ទាំងស៊ីបនៃសង្រ្គាមពាក្យសម្តីយ៉ាងផុសផុលរវាងអាមេរិក និងចិន។ បន្ទាប់ពីដំណើរទស្សនកិច្ចរបស់ប្រធានសភាអាមេរិកលោកស្រីណាន់ស៊ី ប៉េឡូស៊ីនៅតៃវ៉ាន់ ប្រធានាធិបតីអាមេរិកលោកចូ បៃដិនបានបញ្ជាក់ដោយមិនអល់អែកនៅក្នុងបទសម្ភាសន៍ឲ្យកាណាល់ទូរទស្សន៍ CBS ក្នុងថ្ងៃអាទិត្យ ទី១៨ កញ្ញាថា អាមេរិកនឹងប្រើកម្លាំងទ័ពដើម្បីការពារតៃវ៉ាន់ ប្រសិនចិនហ៊ានបើកការវាយប្រហារមិនធ្លាប់មានលើតៃវ៉ាន់នោះ។ ការថ្លែងរបស់លោកបៃដិននេះត្រូវបានចិនឆ្លើយតបភ្លាមៗថា លោកបៃដិនបានបំពានធ្ងន់ធ្ងរលើការសន្យារបស់អាមេរិកដែលមិនគាំទ្រឯករាជ្យរបស់តៃវ៉ាន់ និងជាការបញ្ជូនសញ្ញាអាក្រក់ដល់ក្រុមសកម្មជនទាមទារឯករាជ្យនៅតៃវ៉ាន់។
នៅក្នុងសុន្ទរកថាថ្លែងនៅក្នុងមហាសន្និបាតអង្គការប្រជាជាតិ ប្រមុខការទូតចិនលោកវ៉ាង យីបានលើកឡើងជាថ្មីពីកំហឹងរបស់ចិនចំពោះអាមេរិកដែលបានគាំទ្រតៃវ៉ាន់។ « រឿងតៃវ៉ាន់ក្លាយជាប្រធានបទនៃភាពតានតឹងប្រកបដោយហានិភ័យខ្លាំងនៅក្នុងទំនាក់ទនងអាមេរិក ចិន » នេះជាការថ្លែងរបស់លោកវ៉ាង យី។ តែលោកវ៉ាង យីមិនភ្លេចបញ្ជាក់ថា អាមេរិក និងចិនមានបំណងធ្វើយ៉ាងណាឲ្យទំនាក់ទំនងរវាងគ្នាមានដំណើរទៅមុខយ៉ាងរលូនដោយគ្មានការប្រឈមមុខដាក់គ្នា។ ដូច្នេះ ការដែលភាគីទាំងពីរយល់ព្រមជួបគ្នាជាសញ្ញាមួយដែលបញ្ជាក់ពីភាពមិនពាក់មុខយក្សដាក់គ្នា។
មុននឹងជួបសមភាគីអាមេរិកលោកអង់តូនី ប៊្លីងកិនក្នុងថ្ងៃសុក្រ ទី២៣ កញ្ញា លោកវ៉ាង យីបានជួបសន្ទនាជាមួយប្រេសិតអាមេរិកទទួលបន្ទុកអាកាសធាតុលោកចន ឃែររីក្នុងថ្ងៃព្រហស្បតិ៍ ទី២២ កញ្ញា។ គួររម្លឹកថានៅក្រោយដំណើរទស្សនកិច្ចរបស់ប្រធានសភាអាមេរិកលោកស្រីណាន់ស៊ី ប៉េឡូស៊ីនៅតៃវ៉ាន់ ចិនបានព្យួរកិច្ចសហប្រតិបត្តិការក្នុងរឿងអាកាសធាតុជាមួយអាមេរិកដើម្បីជាការសងសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ