អាមេរិកបានទាក់ទងជាមួយរុស្ស៊ី ដោយផ្ទាល់ ដើម្បីព្រមានកុំឱ្យប្រើអាវុធនុយក្លេអ៊ែរ
នៅក្នុងបទសម្ភាសន៍ជាមួយទូរទស្សន៍CBS News នាល្ងាចថ្ងៃអាទិត្យទី ២៥កញ្ញា លោក អង់តូនី ប្លីងកិន រដ្ឋមន្ត្រីក្រសួងការបរទេសអាមេរិកអះអាងថា សហរដ្ឋអាមេរិក បានទាក់ទងជាមួយរុស្ស៊ីជាលក្ខណៈឯកជន។ នាឱកាសនោះ អាមេរិកបានប្រាប់ឱ្យរុស្ស៊ីបញ្ឈប់ការគំរាមប្រើអាវុធនុយក្លេអ៊ែរ ក្នុងសង្គ្រាមនៅអ៊ុយក្រែន ដោយព្រមានថាការប្រើអាវុធប្រភេទនេះអាចនឹងបង្កមហន្តរាយធ្ងន់ធ្ងរខ្លាំងណាស់។
ចុះផ្សាយនៅថ្ងៃ៖
អាមេរិកមានសមត្ថភាពនិយាយទាក់ទងដោយផ្ទាល់ ជាមួយថ្នាក់ដឹកនាំជាន់ខ្ពស់រុស្ស៊ី ដើម្បីប្រាប់ដោយចំៗអំពីអ្វីដែលអាមេរិកចង់ឱ្យរុស្ស៊ីដឹងនិងឮ។ ទំនាក់ទំនងដោយផ្ទាល់ជាមួយរុស្ស៊ី កើតមានជាញឹកញាប់នារយៈពេលប៉ុន្មានខែចុងក្រោយនេះ និងទើបមានទៀតនៅប៉ុន្មានថ្ងៃមុននេះ។ នេះបើតាមប្រសាសន៍របស់លោក ជេក ស៊ូលីវ៉ាន់ ទីប្រឹក្សាសន្តិសុខជាតិរបស់សេតវិមាន ដែលដើម្បីការពារសុវត្ថិភាព មិនអាចបញ្ជាក់ថា តើបណ្តាញទាក់ទងឯកជននោះជាអ្វីឱ្យប្រាកដទេ។
បន្តិចក្រោយមក លោកប្រមុខការទូតអាមេរិក អង់តូនី ប្លីងកិន បានប្រកាស ថា នៅក្នុងការទាក់ទងដោយផ្ទាល់ជាមួយរុស្ស៊ី អាមេរិកបានព្រមានកុំឱ្យរុស្ស៊ីប្រើអាវុធនុយក្លេអ៊ែរ ដែលអាចបង្កមហន្តរាយសម្រាប់ប្រទេសអ្នកបាញ់ផ្ទាល់ផង និងមនុស្សជាតិជាច្រើនផ្សេងទៀតផង។ ទាំងជាសាធារណៈនិងទាំងជាលក្ខណៈឯកជន អាមេរិកបានបញ្ជាក់យ៉ាងច្បាស់លាស់ណាស់ជាមួយរុស្ស៊ីអំពីផលវិបាកនៃការប្រើប្រាស់អាវុធនុយក្លេអ៊ែរ ដើម្បីឱ្យរុស្ស៊ីបញ្ឈប់ការនិយាយគំរាមប្រើអាវុធប្រល័យលោកនេះទៀត។ នេះបើតាមសំដីរបស់លោក អង់តូនី ប្លីងកិន នៅក្នុងបទសម្ភាសន៍ជាមួយទូរទស្សន៍CBS News កាលពីយប់មិញ។
កាលពីថ្ងៃពុធ ទី ២១កញ្ញា ក្នុងសុន្ទរកថាតាមកញ្ចក់ទូរទស្សន៍ ទៅកាន់ប្រជាជាតិ លោកប្រធានាធិបតីរុស្ស៊ី វ្លាដេមៀ ពូទីន បានព្រលយថារុស្ស៊ីត្រៀមប្រើគ្រប់មធ្យោបាយ (រាប់ទាំងអាវុធនុយក្លេអ៊ែរ) ដោយពិតៗមិនបំផ្លើសក្នុងការធ្វើសង្គ្រាមប្រឆាំងនឹងបស្ចិមលោកដែលចង់បំផ្លាញរុស្ស៊ី។ នៅលើវេទិកាអង្គការសហប្រជាជាតិ ប្រមុខការទូតរុស្ស៊ី លោក ស៊ែរហ្គៃឡាវ្រូស បានបញ្ជាក់ថារុស្ស៊ីមានមនោគមវិជ្ជាយោធាស្តីពីសិទ្ធិប្រើអាវុធនុយក្លេអ៊ែរដើម្បីការពារប្រទេសនិងដែនដីរណបរុស្ស៊ី។
សហរដ្ឋអាមេរិកធ្លាប់បានព្រមានជាច្រើនលើកច្រើនសា និងដោយពាក្យកាន់តែធ្ងន់ឡើងៗ។ ប្រធានាធិបតីអាមេរិក លោក ចូ បៃដិន បានប្រាប់រុស្ស៊ីដោយចំៗ តាំងពីថ្ងៃទី ១៦កញ្ញា ថាកុំៗ កុំប្រើអាវុធនុយក្លេអ៊ែរ ! អាមេរិកសន្យាផ្តល់ចម្លើយបកវិញយ៉ាងចាស់ដៃ។ អាមេរិកនិងរុស្ស៊ីជាមហាអំណាចមានអាវុធនុយក្លេអ៊ែរដ៏ចម្បងគេបំផុតនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ