អាមេរិកមានសន្ទុះសេដ្ឋកិច្ចឡើងវិញ តែដំណើរសេដ្ឋកិច្ចដើរថយក្រោយនៅមិនឆ្ងាយ
បន្ទាប់ពីអាប់អួរអស់ពីរត្រីមាសជាប់គ្នា សេដ្ឋកិច្ចអាមេរិកចាប់មានសន្ទុះឡើងវិញ និងល្អប្រសើរជាងការព្យាករណ៍ទៅទៀត នៅត្រីមាសទីបីឆ្នាំ២០២២។ នេះជាដំណឹងល្អ សម្រាប់លោកប្រធានាធិបតីចូ បៃដិន និងបក្សប្រជាធិបតេយ្យអាមេរិកទាំងមូល ក្នុងឱកាសបោះឆ្នោតពាក់កណ្តាលអាណត្តិនៅសប្តាហ៍ក្រោយ។ ប៉ុន្តែដំណើរសេដ្ឋកិច្ចដើរថយក្រោយ មិនទៅណាឆ្ងាយឡើយ គ្រាន់តែយូរឬឆាប់តែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៦
អ្នកវិភាគព្យាករត្រឹមតែ ២,៣%ទេ តែបើតាមរបាយការណ៍របស់ក្រសួងពាណិជ្ជកម្មចេញផ្សាយនៅថ្ងៃព្រហស្បតិ៍ទី ២៧តុលា ពីខែកក្កដាដល់ខែកញ្ញា ២០២២ ផលិតផលសរុបក្នុងស្រុកប្រចាំឆ្នាំរបស់អាមេរិកបានកើនឡើង ២,៦%។ នេះជាលើកទីមួយហើយសម្រាប់ឆ្នាំ២០២២ ដែលមហាអំណាចសេដ្ឋកិច្ចទីមួយពិភពលោក ស្គាល់សន្ទុះកំណើនសេដ្ឋកិច្ចឡើងវិញ ហើយជាសន្ទុះដ៏ខ្លាំងជាងការរំពឹងទុកនោះ។
នៅត្រីមាសទីមួយនិងទីពីរ ផលិតផលសរុបក្នុងស្រុកអាមេរិកបានថយចុះ១,៦% បន្ទាប់មក០,៦% តែសម្រាប់រដ្ឋបាលលោកបៃដិន និងអ្នកជំនាញសេដ្ឋកិច្ចមួយចំនួនធំ អាមេរិកពេលនោះមិនធ្លាក់ក្នុងវិបត្តិសេដ្ឋកិច្ចដើរថយក្រោយ ដូចនិយមន័យទេ ព្រោះទីផ្សារការងារអាមេរិកនៅរឹងមាំខ្លាំង ដែលអាចជួយទ្រទ្រង់ប្រទេសមិនឱ្យធ្លាក់ក្នុងវិបត្តិបាន។ ស្ថានភាពសេដ្ឋកិច្ចជាតិបែបនេះ បានធ្វើបក្សប្រជាធិបតេយ្យពិបាកងើបមុខយ៉ាងខ្លាំងនៅក្នុងការស្ទង់មតិ។ ក្រុមលោកចូបៃដិន បានស្តារកិត្តិយសឡើងវិញបន្តិច តាមរយៈលទ្ធផលនៃកំណើនសេដ្ឋកិច្ច នៅត្រីមាសទីបី ដែលប្រកាសឡើងនៅ១០ថ្ងៃមុនការបោះឆ្នោតពាក់កណ្តាលអាណត្តិ។ ការបោះឆ្នោតដែលបក្សកាន់អំណាចអាចនឹងបាត់បង់សំឡេងភាគច្រើននៅក្នុងសភាផង។
ប៉ុន្តែទោះជាយ៉ាងណាក៏ដោយ ក៏អាមេរិកទំនងជាមិនអាចគេចរួច ពីវិបត្តិសេដ្ឋកិច្ចដើរថយក្រោយបានឡើយ នៅប៉ុន្មានខែខាងមុខនេះ។ លោកប្រធានាធិបតី ចូបៃដិនផ្ទាល់ បានទទួលស្គាល់កាលពីដើមខែរួចហើយ អំពីលទ្ធភាពអាមេរិកមានសេដ្ឋកិច្ចដើរថយក្រោយ បន្តិច។ មូលហេតុគឺបណ្តាលមកពីវិបត្តិអតិផរណា ដ៏ខ្ពស់ខ្លាំង (៨,២%) ជិតដល់កំរិតខ្ពស់បំផុតនៅសហរដ្ឋអាមេរិកក្នុងរយៈពេល៤០ឆ្នាំមកនេះ។ នៅពេលទំនិញឡើងថ្លៃ លទ្ធភាពចាយវាយរបស់ពលរដ្ឋត្រូវធ្លាក់ចុះ ការប្រាក់ឡើង វិនិយោគថយ សេដ្ឋកិច្ចត្រូវតែបន្ថយល្បឿន។ ដើម្បីប្រយុទ្ធប្រឆាំងនឹងអតិផរណា ធនាគារកណ្តាលអាមេរិកបានដំឡើងអត្រាការប្រាក់បួនដងហើយ ហើយអាចនឹងសម្រេចដំឡើងអត្រាការប្រាក់ជាថ្មីទៀត នៅថ្ងៃអង្គារនិងពុធខាងមុខ។
សេដ្ឋកិច្ចអាចនឹងបន្ថយល្បឿនកំរិតពិភពលោក បូកនឹងអតិផរណាខ្ពស់មាននៅស្ទើរគ្រប់ទិសទីទៀត ប្រទេសជឿនលឿនជាច្រើនផ្សេងទៀត ដូចយ៉ាង អាល្លឺម៉ង់ឬអ៊ីតាលី ក៏អាចនឹងធ្លាក់ក្នុងវិបត្តិសេដ្ឋកិច្ចដើរថយក្រោយដែរនៅឆ្នាំ២០២៣។ នេះបើតាមការព្រមានរបស់អង្គការមូលនិធិរូបិយវត្ថុអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ