អ្នកវិភាគ៖អាមេរិកសម្រាលទណ្ឌកម្មលើវ៉េណេស៊ុយអេឡាជាបរាជ័យយុទ្ធសាស្រ្តរបស់អាមេរិកចំពោះវ៉េណេស៊ុយអេឡា
នៅថ្ងៃសៅរ៍ ទី២៦ វិច្ឆិកា អាមេរិកបានប្រកាសពីការសម្រាលទណ្ឌកម្មលើវិស័យប្រេងវ៉េណេស៊ុយអេឡាដោយបានអនុញ្ញាតឲ្យក្រុមហ៊ុនប្រេងអាមេរិកឈ្មោះ Chevron ធ្វើសកម្មភាពបូមប្រេងជាថ្មីនៅក្នុងទឹកដីវ៉េណេស៊ុយអេឡា។ ការបន្ធូរបន្ធយទណ្ឌកម្មលើប្រេងវ៉េណេស៊ុយអេឡាបានធ្វើឡើង ក្រោយពីបក្សកាន់អំណាច និងបក្សប្រឆាំងរបស់វ៉េណេស៊ុយអេឡាបានចុះហត្ថលេខាក្នុងប្រទេសម៉ិចស៊ិកលើកិច្ចព្រមព្រៀងមួយដើម្បីបង្កើតឲ្យមានមូលនិធិការពារសង្គមសម្រាប់ពលរដ្ឋវ៉េណេស៊ុយអេឡា។ ក៏ប៉ុន្តែ កាយវិការរបស់អាមេរិកបានធ្វើឡើងនៅក្នុងបរិបទនៃវិបត្តិថាមពលអន្តរជាតិ ពិសេសសង្រ្គាមរុស្ស៊ីឈ្លានពានអ៊ុយក្រែន។ គួរបញ្ជាក់ថា រុស្ស៊ីដែលជាសម្ព័ន្ធមិត្តរបស់វ៉េណេស៊ុយអេឡាក៏កំពុងមានឥទ្ធិពលខ្លាំងនៅវ៉េណេស៊ុយអេឡាដែរ។ តែអ្នកជំនាញអាមេរិកឡាទីនលោកតេមៀរ ប៉ូរ៉ាសបានមើលឃើញថា ការដែលអាមេរិកបានសម្រាលទណ្ឌកម្មលើវ៉េណេស៊ុយអេឡាមិនមែនដើម្បីប្រឆាំងនឹងឥទ្ធិពលរបស់រុស្ស៊ីទេ តែជាបរាជ័យយុទ្ធសាស្រ្តរបស់អាមេរិកចំពោះវ៉េណេស៊ុយអេឡាតាំងពីច្រើនឆ្នាំ។
ចុះផ្សាយនៅថ្ងៃ៖
ស្តាប់ - ០១:៥០
« ស្ថានភាពប្រេង និងឧស្ម័នរបស់ប្រទេសវ៉េណេស៊ុយអេឡាជាផ្ទាំងស៊ីបនៃការសម្រេចចិត្តរបស់អាមេរិក មានន័យថា រដ្ឋបាលក្រុងវ៉ាស៊ីនតោនបានសម្រេចចិត្តខ្ទប់ដង្ហើមសេដ្ឋកិច្ចវ៉េណេស៊ុយអេឡាតាមរយៈការដាក់ទណ្ឌកម្មលើវិស័យប្រេង។ ក៏ប៉ុន្តែឥឡូវនេះ ប្រេង និងឧស្ម័នកំពុងក្លាយជាផលិផលចាំបាច់ជាងពេលណាៗទាំងអស់។ តម្រូវការប្រេង និងឧស្ម័ននៅលើទីផ្សារអន្តរជាតិកំពុងកើនឡើងខ្លាំង។ ហេតុផលនេះ រួមទាំងបរាជ័យយុទ្ធសាស្រ្តរបស់អាមេរិកចំពោះវ៉េណេស៊ុយអេឡាបានរុញអាមេរិកឲ្យរំកិលខិតរកវ៉េណេស៊ុយអេឡា។
គេពិតជាអាចនិយាយបានថា ការដែលអាមេរិកបានងាកទៅរកវ៉េណេស៊ុយអេឡាពេលនេះគឺដើម្បីប្រឆាំងនឹងឥទ្ធិពលរបស់រុស្ស៊ី ឬអាចនិយាយថា អាមេរិកចង់ជំនួសកន្លែងរុស្ស៊ីនៅវ៉េណេស៊ុយអេឡា។ ពិតណាស់នៅក្នុងអតីតកាល មានវត្តមានក្រុមហ៊ុនប្រេងរុស្ស៊ីយ៉ាងសំខាន់នៅលើទឹកដីវ៉េណេស៊ុយអេឡា។ តែលែងមានទៀតឡើយនាពេលសព្វថ្ងៃនេះ ព្រោះរុស្ស៊ីកំពុងប្រឈមនឹងបញ្ហាផ្ទាល់ខ្លួនដែលត្រូវដោះស្រាយ និងមិនសូវមានវិធានការដើម្បីគិតគូរពីវត្តមានរបស់ខ្លួនលើទឹកដីវ៉េណេស៊ុយអេឡាទេ។
ដូច្នេះ ជាការរកិលរបស់អាមេរិកទៅរកវ៉េណេស៊ុយអេឡា តែជាមួយនឹងរដ្ឋាភិបាលវ៉េណេស៊ុយអេឡាមួយដែលកំពុងមានប្រៀបនៅក្នុងការត តាំងទល់នឹងអាមេរិក ហើយមិនញញើតដាក់ចេញនូវលក្ខខណ្ឌរបស់ខ្លួនជាមួយអាមេរិកដើម្បីទាញបានប្រយោជន៍បន្ថែម ទទួលបានការធ្វើវិនិយោគបន្ថែមលើវិស័យប្រេង ការធ្វើអាជីវកម្មលើអណ្តូងប្រេងផ្សេងទៀត ហើយក៏ជាឱកាសសម្រាប់វិស័យឧស្ម័នដែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ