លោកបៃដិន និងលោកម៉ាក្រុងបង្ហាញជំហរគាំទ្រអ៊ុយក្រែន តែមានវិធីសាស្រ្តខុសគ្នាដើម្បីនិយាយជាមួយលោកពូទីន
ថ្ងៃសុក្រ ទី២ ធ្នូជាថ្ងៃទី៣ និងជាថ្ងៃចុងក្រោយនៃដំណើរទស្សនកិច្ចផ្លូវរដ្ឋរបស់ប្រធានាធិបតីបារាំងលោកម៉ាក្រុងនៅសហរដ្ឋអាមេរិក។ នៅក្នុងជំនួបទ្វេភាគីនាថ្ងៃព្រហស្បតិ៍ ទី១ ធ្នូនៅសេតវិមាន លោកម៉ាក្រុង និងសមភាគីអាមេរិកលោកបៃដិនបានជជែកគ្នាលើប្រធានរឿងជាច្រើន មានទាំងទំនាក់ទំនងរវាងអាមេរិក បារាំង ទំនាក់ទំនងរវាងអាមេរិក អឺរ៉ុប ឬមួយក៏សង្រ្គាមរុស្ស៊ីឈ្លានពានអ៊ុយក្រែន។ ថ្លែងនៅក្នុងសន្និសីទកាសែតរួមគ្នា លោកម៉ាក្រុង និងលោកបៃដិនបានបង្ហាញជំហររួមគ្នាក្នុងការបន្តគាំទ្រអ៊ុយក្រែនទោះត្រូវចំណាយពេលយូរប៉ុនណាក៏ដោយ។ ជំហរនេះធ្លាប់ត្រូវបានប្រមុខរដ្ឋទាំងពីរប្រកាសច្រើនដងតាំងពីដំបូងមកម្ល៉េះ។ តែមានចំណុចមួយដែលលោកម៉ាក្រុង និងលោកបៃដិនហាក់យល់ឃើញមិនដូចគ្នា នោះគឺការសន្ទនាជាមួយប្រធានាធិបតីរុស្ស៊ីលោកពូទីន។ សម្រាប់លោកម៉ាក្រុង គេត្រូវបន្តនិយាយជាមួយលោកពូទីន។ តែលោកបៃដិនបដិសេធ និងបានដាក់លក្ខខណ្ឌមួយចំនួនដើម្បីអាចឲ្យលោកអង្គុយនិយាយទល់មុខលោកពូទីនបាន។
ចុះផ្សាយនៅថ្ងៃ៖
ស្តាប់ - ០១:៤៧
« មានវិធីមួយដើម្បីបិទបញ្ចប់សង្រ្គាមនៅអ៊ុយក្រែន ជាវិធីសមហេតុសមផល។ មុនដំបូង ពូទីនដកខ្លួនចេញពីអ៊ុយក្រែន។ តែបើតាមមើលទៅ គាត់នឹងមិនធ្វើទេ។ គាត់បង់ថ្លៃខ្ពស់ខ្លាំងណាស់ដោយមិនព្រមដកខ្លួនចេញពីអ៊ុយក្រែននេះ។ តែពូទីនកំពុងធ្វើបាប ដាក់ទោស និងសម្លាប់ពលរដ្ឋស៊ីវិលអ៊ុយក្រែនដែលមិនគួរឲ្យជឿ ដោយបានទម្លាក់គ្រាប់បែក គ្រាប់មីស៊ីលលើកន្លែងមើលក្មេង លើមន្ទីរពេទ្យ លើកន្លែងស្នាក់នៅរបស់ក្មេង។
អ្វីដែលពូទីនធ្វើជារឿងឆ្កួតលីលា។ ការពិតគឺថា ខ្ញុំគ្មានគម្រោងទាក់ទងពូទីនភ្លាមៗទេ។ ពូទីនជា ……………ខ្ញុំនឹងជ្រើសរើសពាក្យសម្តីរបស់ខ្ញុំដោយមានការថ្លឹងថ្លែង និងប្រយ័ត្នប្រយែងជាទីបំផុត។ ខ្ញុំត្រៀមខ្លួនរួចជាស្រេចដើម្បីនិយាយជាមួយពូទីន ប្រសិនបើគាត់បង្ហាញឲ្យឃើញពិតប្រាកដនូវការសម្រេចចិត្តក្នុងការស្វែងរកមធ្យោបាយដើម្បីបិទបញ្ចប់សង្រ្គាមមួយនេះ។ គាត់មិនទាន់បានធ្វើនៅឡើយទេ។
តែបើពូទីនយល់ព្រមធ្វើមែន ខ្ញុំពិគ្រោះយោបល់ជាមួយមិត្តបារាំងរបស់ខ្ញុំ និងមិត្តនៅក្នុងអង្គការអូតង់របស់ខ្ញុំ ហើយខ្ញុំនឹងរីករាយក្នុងការអង្គុយនិយាយជាមួយពូទីនដើម្បីចង់ដឹងពីអ្វីដែលគាត់ចង់បាន និងមាននៅក្នុងក្បាលរបស់គាត់។ គាត់មិនទាន់បានធ្វើនៅឡើយទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ