កាណាដាដាក់ទណ្ឌកម្មប្រឆាំងអ៊ីរ៉ង់ រុស្ស៊ី និងភូមាក្នុងបទរំលោភសិទ្ធិមនុស្សយ៉ាងកម្រោល
នៅថ្ងៃសុក្រ ទី៩ ធ្នូ ប្រទេសកាណាដាបានប្រកាសដាក់ទណ្ឌកម្មប្រឆាំងប្រទេសអ៊ីរ៉ង់ រុស្ស៊ី និងប្រទេសភូមា។ ទណ្ឌកម្មបានសំដៅលើមនុស្សចំនួន ៦៧នាក់ និងស្ថាប័នចំនួន ៩ ពីបទបានរំលោភសិទ្ធិមនុស្សជាប្រចាំ និងយ៉ាងកម្រោល។ រដ្ឋមន្រ្តីក្រសួងការបរទេសកាណាដាលោកស្រីមេឡានី ចូលីបានចេញមុខការពារទណ្ឌកម្មរបស់កាណាដាដោយបញ្ជាក់ថា សេចក្តីថ្លៃថ្នូរ សេរីភាព និងយុត្តិធម៌ជាសសរគ្រឹះនៃនយោបាយការបរទេសរបស់កាណាដា។
ចុះផ្សាយនៅថ្ងៃ៖
ស្តាប់ - ០២:២៧
វិធានការទណ្ឌកម្មរបស់កាណាដាត្រូវបានប្រកាសឡើងនៅក្នុងឱកាសទិវាសិទ្ធិមនុស្សអន្តរជាតិ និងយុទ្ធនាការប្រឆាំងអំពើពុករលួយ។ នៅក្នុងចំណោមមនុស្សទាំង ៦៧នាក់ និងស្ថាប័នទាំង ៩ស្ថាប័នដែលជាប់ទណ្ឌកម្មកាណាដា មានអ្នកទទួលខុសត្រូវជាន់ខ្ពស់ក្នុងស្ថាប័នតុលាការអ៊ីរ៉ង់ចំនួន ២២នាក់ និង ២ស្ថាប័ន គឺប្រព័ន្ធពន្ធនាគារ និងកងឆ្មាំបដិវត្តន៍អ៊ីរ៉ង់។ សម្រាប់ប្រទេសរុស្ស៊ី ទណ្ឌកម្មរបស់កាណាដាបានសំដៅលើអតីតអ្នកទទួលខុសត្រូវ និងអ្នកទទួលខុសត្រូវសរុបចំនួន ៣៣នាក់ និងស្ថាប័នចំនួន ៦ស្ថាប័នពីបទបានវាយបង្រ្កាបលើពលរដ្ឋដែលក្រោកឈរបរិហារលើសង្រ្គាមរុស្ស៊ីឈ្លានពានអ៊ុយក្រែន និងនយោបាយប្រឆាំងប្រជាធិបតេយ្យរបស់ក្រុងក្រឹមឡាំង។
សម្រាប់ប្រទេសភូមា ទណ្ឌកម្មរបស់កាណាដាបានសំដៅលើអ្នកទទួលខុសត្រូវរបបសឹកចំនួន ១២នាក់ និងស្ថាប័នចំនួន ៣ស្ថាប័នដែលបានអនុញ្ញាតឲ្យរបបសឹកវាយបង្រ្កាបលើជនស៊ីវិល និងបានជួយសម្រួលក្នុងការបញ្ជូនអាវុធឲ្យរបបសឹក។ រដ្ឋមន្រ្តីក្រសួងការបរទេសកាណាដាលោកស្រីមេឡានី ចូលីបានចេញមុខការពារទណ្ឌកម្មរបស់កាណាដាដោយបញ្ជាក់នៅក្នុងសេចក្តីប្រកាសព័ត៌មានថា សេចក្តីថ្លៃថ្នូរ សេរីភាព និងយុត្តិធម៌ជាសសរគ្រឹះនៃនយោបាយការបរទេសរបស់កាណាដា។ តាមលោកស្រីចូលី ពិភពលោកជាសាក្សីដែលបានឃើញផ្ទាល់ភ្នែកនូវការជាន់ឈ្លីសិទ្ធិមនុស្សនៅរុស្ស៊ី អ៊ីរ៉ង់ និងភូមា។
គួរបញ្ជាក់ថា បស្ចិមលោកកំពុងតាមដាន និងសម្តែងក្តីបារម្ភខ្លាំងចំពោះស្ថានការណ៍នៅអ៊ីរ៉ង់ ពិសេសតាំងពីផ្ទុះបាតុកម្មប្រឆាំងរដ្ឋាភិបាលនៅក្រោយការស្លាប់នារីម៉ាសា អាមីនីក្នុងថ្ងៃទី១៦ កញ្ញា។ គឺជាបាតុកម្មដែលត្រូវបានរដ្ឋអំណាចវាយបង្រ្កាបយ៉ាងហិង្សាដោយបណ្តាលឲ្យមានមនុស្សស្លាប់ជាង ៤០០នាក់។ នៅក្នុងសេចក្តីថ្លែងការណ៍រួម អាមេរិក និងកាណាដាបានបញ្ជាក់ថា ម្នាក់ៗមានសិទ្ធិក្នុងការបញ្ចេញមតិ និងជួបជុំដោយសន្តិវិធី ហើយបានទាមទារឲ្យរបបអ៊ីរ៉ង់បញ្ឈប់អំពើហិង្សាប្រឆាំងនឹងពលរដ្ឋខ្លួនឯង។ ចំណែកសហភាពអឺរ៉ុបត្រៀមដាក់បញ្ជូលស្ថាប័នអ៊ីរ៉ង់ចំនួន ១ស្ថាប័ន និងអ្នកទទួលខុសត្រូវអ៊ីរ៉ង់ចំនួន ២០នាក់ទៅក្នុងបញ្ជីខ្មៅរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ