សហភាពអឺរ៉ុបចង់បង្កើតតុលាការអន្តរជាតិ ដើម្បីជំនុំជម្រះឧក្រិដ្ឋកម្មរុស្ស៊ីនៅអ៊ុយក្រែន
ការចង់បង្កើត តុលាការពិសេស នេះ គឺផ្អែកតាមការអះអាងរបស់ ប្រធានគណៈកម្មការអឺរ៉ុប អ្នកស្រី អួរស៊ូឡា វ៉ុនឌែរ ឡេយែន នៅថ្ងៃទី ៣០ វិច្ឆិកា។ ដើម្បីនឹងបង្កើតសាលាជម្រះក្តីពិសេសនិងខ្នាតធំនេះបាន អ្នកស្រីប្រធានគណៈកម្មការអឺរ៉ុប បានប្រកាសបញ្ជាក់ថាចង់ឲ្យមានគាំទ្រដោយអង្គការសហប្រជាជាតិ និង តុលាការព្រហ្មទណ្ឌអន្តរជាតិ ព្រមទាំងការគាំទ្រពីសហគមអន្តរជាតិ បន្ថែមទៀត។
ចុះផ្សាយនៅថ្ងៃ៖
ស្តាប់ - ០២:១៧
តុលាការពិសេស ដែល សហភាពអឺរ៉ុប ចង់បង្កើតនេះ គឺដើម្បីស៊ើបអង្កេត និង កាត់ទោសឧក្រិដ្ឋកម្មភ្លើងសង្គ្រាម ដែល រុស្ស៊ី បង្កាត់ឲ្យឆេះឡើង នៅលើដីអ៊ុយក្រែន។ អ៊ុយក្រែន តាមរយៈប្រធានាធិបតី វ៉ូឡូឌីមៀរ ហ្សេឡេនស្គី គឺទាមទារចង់បាន អង្គជំនុំជម្រះ បែបនេះជាយូរមកហើយ។
ទន្ទឹមនឹងគ្នានេះ អ្នកស្រី អួរស៊ូឡា វ៉ុនឌែរ ឡេយែន អះអាងថាកំពុងតាមដានយ៉ាងដិតដល់ចំពោះផលវិបាកដែលរុស្ស៊ីកំពុងតែប្រឈម ក្រោយពីពេល សហភាពអឺរ៉ុប ជាមួយសហការដៃគូផ្សេងទៀត បានបង្កកទ្រព្យសម្បត្តិរបស់មហាសេដ្ឋីរុស្ស៊ីនិងថ្នាក់ដឹកនាំស្អិតនឹងវិមានក្រេមឡាំង។
តាមសេចក្តីថ្លែងការណ៍ គឺចាប់ពីផ្ទុះសង្គ្រាមឈ្លានភាពរុស្ស៊ីលើអ៊ុយក្រែន នាចុងខែកុម្ភៈមក សហភាពអឺរ៉ុប បានបង្កកហិរញ្ញវត្ថុពីធនាគារកណ្តាលរុស្ស៊ី ចំនួន ៣០០ ពាន់លានអឺរ៉ូ ហើយនិង បង្កកទ្រព្យសម្បត្តិរបស់មហាសេដ្ឋីរុស្ស៊ី ចំនួន ១៩ ពាន់លានអឺរ៉ូ។ ក្នុងរយៈពេលខ្លី សហភាពអឺរ៉ុប ប្រើប្រាស់លុយសន្ធឹកសន្ធាប់នេះ ដើម្បីវិនិយោគ និងផ្តល់ជំនួយដល់អ៊ុយក្រែន ដែលរងគ្រោះដោយសង្គ្រាម។
តាមទិន្នន័យរបស់សហភាពអឺរ៉ុប តាំងពីផ្ទុះសង្គ្រាមមក ពលរដ្ឋស៊ីវិលអ៊ុយក្រែន ជាង២ម៉ឺននាក់ស្លាប់ ហើយទាហានអ៊ុយក្រែន ជាង១០ម៉ឺននាក់ ពលីជីវិត ហើយផលខូចខាតព្រោះតែសឹកចម្បាំង គិតជាមធ្យម ៦០០ ពាន់លានអឺរ៉ុប។ អ្នកស្រី ប្រធានគណៈកម្មការអឺរ៉ុប សង្គត់ធ្ងន់ថា រុស្ស៊ីគឺត្រូវសងសំណងខូចខាតនេះ។
ក្នុងកិច្ចប្រជុំពីរថ្ងៃ ជាមួយប្រមុខទូតនៃរដ្ឋសមាជិកអូតង់ នៅប្រទេសរូម៉ានី លោកអគ្គលេខាធិការអង្គការសម្ព័ន្ធមិត្តអូតង់ បានលើកឡើងថា ក្រៅពីគ្រឿងសព្វាវុធសម្លាប់ផ្តាច់ជីវិតដោយផ្ទាល់ ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រើអាវុធមួយទៀត គឺ«ភាពត្រជាក់នៃរដូវរងា» ដើម្បីសម្លាប់កងទ័ពនិងពលរដ្ឋអ៊ុយក្រែន ពីព្រោះថា រុស្ស៊ី បានកម្ទេចហេដ្ឋារចនាសម្ព័ន្ធរបស់អ៊ុយក្រែន អស់យ៉ាងច្រើនសន្ធឹក។
ក្នុងដំណាក់កាលបន្ទាន់នេះ ប្រទេសជាច្រើន រួមទាំងបារាំងនិងសហរដ្ឋអាមេរិកជាដើម បានបញ្ចូនជំនួយ ម៉ាស៊ីនភ្លើង និងម៉ាស៊ីនកម្តៅជាច្រើនរយគ្រឿង តាមរយៈរូម៉ានី ទៅឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ