អង្គការសហប្រជាជាតិថា របបសឹកកាត់ទោសប្រហារជីវិតនិស្សិតភូមា៧នាក់
គណៈកម្មការសិទ្ធិមនុស្សរបស់អង្គការសហប្រជាជាតិបានបរិហាថ្កោលទោស របបសឹកភូមា ដែលបានសម្រេចកាត់ទោសប្រហារជីវិតនិស្សិត៧នាក់ កាលពីថ្ងៃពុធ។ ក្នុងសេចក្តីថ្លែងការណ៍ចេញផ្សាយ នៅចុងសប្តាហ៍នេះ អង្គការសហប្រជាជាតិ បានចោទប្រកាន់របបសឹកថា បានប្រើប្រាស់ទោសប្រហារជីវិតជាឧបករណ៍សម្រាប់បំបាក់ បង្រ្កាប ក្រុមអ្នកប្រឆាំង។
ចុះផ្សាយនៅថ្ងៃ៖
ស្តាប់ - ០២:១៨
តាមសេចក្តីថ្លែងការណ៍របស់គណៈកម្មការសិទ្ធិមនុស្សរបស់អង្គការសហប្រជាជាតិ តុលាការសឹកភូមាបានកាត់ទោសប្រហារជីវិតនិស្សិតភូមា ៧រូប នៅក្នុងសវនាការបិទទ្វារមួយ កាលពីថ្ងៃពុធ។ ការណ៍នេះនឹងធ្វើឲ្យចំនួនមនុស្សដែលកំពុងស្ថិតនៅក្នុងជួររង់ចាំ ការប្រហារជីវិតនៅភូមា កើនឡើងដល់១៣៩នាក់។
តាមកាសែតក្នុងស្រុកភូមា មនុស្ស៧នាក់ ដែលត្រូវតុលាការសឹកកាត់ទោស ប្រហារជីវិត កាលពីថ្ងៃពុធ ជានិស្សិតនៅសកលវិទ្យាល័យ ទីក្រុងរ៉ង់ហ្គូន។ ពួកគេត្រូវបានចាប់ខ្លួនកាលពីខែមេសា ក្នុងបទចោទប្រកាន់ថា បានចូលរួមក្នុងការបាញ់ប្រហារទៅលើធនាគារ។
នៅក្នុងសេចក្តីថ្លែងការណ៍ នៅថ្ងៃសៅរ៍ សហជីពនិស្សិតនៃសកលវិទ្យាល័យ Dagon បានសំដែងការសោកស្តាយ និងចាត់ទុកការសម្រេចផ្តន្ទាទោសប្រហារជីវិតទៅលើនិស្សិតថា ជាការសងសឹករបស់ក្រុមយោធាភូមា។
ទាក់ទងនឹងដំណឹងកាត់ទោសប្រហារជីវិតក្រុមនិស្សិត អ្នកនាំពាក្យរបស់របបសឹកភូមាមិនបានឆ្លើយសំណួររបស់ទីភ្នាក់ងារ ព័ត៌មានបារាំង AFP។ តាមលោកVolker Turk មន្រ្តីសិទ្ធិមនុស្សរបស់អង្គការសហប្រជាជាតិ កងទ័ពភូមាបន្តរៀបចំនីតិវិធី នៅក្នុងតុលាការសម្ងាត់ ដោយបានរំលោភច្បាប់ជាមូលដ្ឋាន និងការទទួលបានការជំនុំជម្រះដោយស្មើភាព។ ជាក់ស្តែង សវនាការនៅក្នុងតុលាការសម្ងាត់ ប្រព្រឹត្តទៅតែប៉ុន្មាននាទី ប៉ុណ្ណោះ។ ជាទូទៅ អ្នកត្រូវចោទប្រកាន់គ្មានមេធាវី ឬបានជួបគ្រួសារនោះទេ។
ដំណឹងផ្តន្ទាទោស ប្រហារជីវិតនិស្សិត ភូមា កើតមាន នៅតែប៉ុន្មានខែក្រោយ ដែលរបបសឹកត្រលប់មកប្រហារជីវិត មនុស្សជាលើកទី១ បន្ទាប់ពីអាក់ខានអស់ ៣០ឆ្នាំ។ នៅខែកក្កដា មនុស្ស៤នាក់ ដែលនៅក្នុងនោះ១នាក់ ជាអតីតសមាជិកសភា និងជាមនុស្សជំនិត របស់លោកស្រីអ៊ុងសាន ស៊ូជី រួមជាមួយសកម្មជនដើម្បីប្រជាធិបតេយ្យ ១នាក់ទៀតត្រូវរបបសឹកប្រហារជីវិត ក្នុងបទចោទប្រកាន់ប្រព្រឹត្តអំពើភេរវកម្ម៕
សម្រាប់មន្រ្តីជាន់ខ្ពស់របស់គណៈកម្មការសិទ្ធិមនុស្សរបស់អង្គការសហប្រជាជាតិ ជាថ្មីម្តងទៀត របបសឹកបានប្រើទោសប្រហារជីវិតជាឧបករណ៍នយោបាយដើម្បីវាយបំបាក់អ្នកប្រឆាំងនឹងខ្លួន។ ជាថ្មីម្តងទៀត ក្រុមដឹកនាំយោធាភូមា បានផ្គើន ទាត់ចោលការប្រឹងប្រែងរបស់អាស៊ាននិងសហគមន៍អន្តរជាតិ ដែលចង់ជួយបិទបញ្ចប់អំពើហិង្សានៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ