លោក ចូ បៃដិន ជំរុញការបង្កើតភាពជាដៃគូ ទូលំទូលាយ អាមេរិក-អាហ្វ្រិក
ក្នុងឱកាសជំនួបកំពូលនៅទីក្រុងវ៉ាស៊ីនតោន ដែលប្រមូលផ្តុំដោយប្រមុខរដ្ឋ-រដ្ឋាភិបាលនៃបណ្តាប្រទេសជាង៥០នៅទ្វីបអាហ្វ្រិក លោកប្រធានាធិបតីអាមេរិកចូ បៃដិន បានជុំវិញឱ្យបង្កើតភាពជាដៃគូទ្រង់ទ្រាយធំ រវាងសហរដ្ឋអាមេរិកនិងអាហ្វ្រិក។ សម្រាប់លោកបៃដិន នៅពេលណា អាហ្វ្រិកបានជោគជ័យ អាមេរិកមានជោគជ័យ ពិភពលោកក៏មានជោគជ័យដែរ។
ចុះផ្សាយនៅថ្ងៃ៖
ដោយបដិសេធថាមិនមែនជាការប្រកួតប្រជែងជាមួយចិន សហរដ្ឋអាមេរិកមិនលាក់បាំងឆន្ទៈចង់ពង្រឹងភាពជាដៃគូជាមួយអាហ្វ្រិកឡើយ បើទោះបីជាក្រុមប្រទេសនៅអាហ្វ្រិកចោទអាមេរិកថាបោះបង់ពួកគេក៏ដោយ។ នៅក្នុងសុន្ទរកថា ដែលមានរាយឈ្មោះការវិនិយោគអាមេរិកនៅអាហ្វ្រិក លោកចូបៃដិន បានអះអាងថា អាមេរិកមិនធ្វើជាចិត្តល្អទេ តែជាការពិត។ នៅពេលណាអាហ្វ្រិកបានជោគជ័យ អាមេរិកមានជោគជ័យ។ ពិភពលោកទាំងមូលក៏មានជោគជ័យ។
ជាមួយនឹងការជំរុញឱ្យបង្កើតភាពជាដៃគូទូលំទូលាយរវាងអាមេរិកនិងអាហ្វ្រិក រដ្ឋបាលលោកបៃដិន បានប្រកាសទម្លាប់កញ្ចប់ថវិកាចំនួន៥៥ពាន់លានដុល្លារសម្រាប់អាហ្វ្រិក ពីនេះទៅបីឆ្នាំខាងមុខ ក្នុងវិស័យជាច្រើន ដូចជា វិស័យឌីជីថល ហេដ្ឋារចនាសម្ព័ន្ធ សុខាភិបាល ឬអន្តរកាលថាមពល។ ដោយលម្អិត ក្នុងឱកាសជំនួបកំពូលនេះ មានការចុះកិច្ចសន្យាក្នុងវិស័យឯកជនអាមេរិកនិងអាហ្វ្រិក តម្លៃជិត១៥ពាន់លាន ក្នុងស្ទើរគ្រប់ផ្នែក រាប់ទាំងផ្នែកបច្ចេកវិទ្យាជាន់ខ្ពស់ផង។ អាមេរិកបានប្រកាសផ្តល់ចំណែកវិនិយោគ៣៥០លានសម្រាប់អភិវឌ្ឍឌីជីថលនៅទ្វីប។ ចំណែកក្រុមហ៊ុនMicrosoft ទទួលបន្ទុករៀបចំកម្មវិធីផ្កាយរណបដើម្បីសម្រួលមនុស្ស១០លាននាក់ក្នុងនោះពាក់កណ្តាលនៅអាហ្វ្រិកមានអ៊ីនធ័រនែតប្រើប្រាស់។ គម្រោងនេះក៏នឹងអនុញ្ញាតឱ្យតំបន់ដាច់ស្រយាលរបស់អេហ្ស៊ីប សេណេហ្កាល់ ឬអង់ហ្កោឡា មានអ៊ីនធ័រនែតប្រើជាលើកទីមួយ។
អាមេរិកក៏បានចូលរួមក្នុងពិធីចុះកិច្ចព្រមព្រៀងតម្លៃ៥០៤លាន ជាមួយបេណាំង និងនីហ្សេ តភ្ជាប់កំពង់ផែកូតូនូទៅរដ្ឋធានីអាមេរបស់នីហ្សេផង។ បើតាមលោកអង់តូនី ប្លីងកិន គម្រោងនេះជាលទ្ធផលនៃភាពជាដៃគូជាមួយអាមេរិក។
ក្រោមអធិបតីភាពលោកចូបៃដិនដដែល ជំនួបកំពូលអាមេរិក-អាហ្វ្រិក ថ្ងៃទីពីរ ត្រូវនឹងថ្ងៃព្រហស្បតិ៍នេះ នឹងឧទ្ទិសដល់វិបត្តិអស្ថិរភាពស្បៀងអាហារដែលធ្លាក់ធ្ងន់ធ្ងរ ដោយសង្គ្រាមអ៊ុយក្រែន។ ជំនួបកំពូលអាមេរិក-អាហ្វ្រិកក្នុងទម្រង់ប្រហាក់ប្រហែលធ្លាប់រៀបចំម្តងកាលពីឆ្នាំ២០១៤ ក្រោមរដ្ឋបាលលោកបារ៉ាក់ អូបាម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ