ការបណ្តេញពលរដ្ឋប៉ាឡេស្ទីន ៖ អ.ស.ប.ថាទង្វើអ៊ីស្រាអែលអាចជាបទឧក្រិដ្ឋកម្មសង្គ្រាម
បន្ទាប់ពីអឺរ៉ុប អង្គការសហប្រជាជាតិបានបញ្ចេញប្រតិកម្មនៅថ្ងៃសុក្រទី ៧ ឧសភា ជំរុញឱ្យអ៊ីស្រាអែលបិទបញ្ចប់រាល់គ្រប់ទម្រង់នៃការចង់បណ្តេញពលរដ្ឋប៉ាឡេស្ទីន ដោយបង្ខំ។ អង្គការប្រជាជាតិបានព្រមានទៀតថា សកម្មភាពពង្រីកដែនអាណានិគម ដោយបណ្តេញប្រជាពលរដ្ឋប៉ាឡេស្ទីនបែបនេះ អាចចាត់ទុកបានថា “ឧក្រិដ្ឋកម្មសង្គ្រាម”។
ចុះផ្សាយនៅថ្ងៃ៖
ស្តាប់ - ០២:៣៦
ថ្លែងទៅកាន់អ្នកសារព័ត៌មាន ពីទីក្រុងហ្សឺណែវ លោក Rupert Colville អ្នកនាំពាក្យឧត្តមស្នងការសិទ្ធិមនុស្សនៃអង្គការសហប្រជាជាតិ បានប្រកាស ទាមទារឱ្យអ៊ីស្រាអែលបញ្ឈប់ជាបន្ទាន់ ការបណ្តេញប្រជាពលរដ្ឋប៉ាឡេស្ទីន ដោយបង្ខំចេញពីក្រុងហ្សេរុយសាឡិមខាងកើត។
សម្រាប់អង្គការសហប្រជាជាតិ ហ្សេរុយសាឡិមខាងកើត នៅតែជាដែនដីរបស់ប៉ាឡេស្ទីនក្រោមអាណានិគមអ៊ីស្រាអែល ដែលស្ថិតក្រោមដែនអំណាចនៃច្បាប់មនុស្សធម៌អន្តរជាតិ។ ដូច្នេះ អ្នកមានអំណាចដាក់នឹមអាណានិគមមិនអាចរឹបអូសយកដីជាកម្មសិទ្ធិឯកជនរបស់ពលរដ្ឋណាម្នាក់ ក្នុងដែនដីនេះបានឡើយ។ នេះបើតាមការបញ្ជាក់បន្ថែមរបស់លោក Colville ដោយលម្អិតថា ការផ្ទេរជនស៊ីវិលក្នុងដែនដីក្រោមអាណានិគមពីសំណាក់អ្នកធ្វើអាណានិគមមាន ជាទង្វើខុសច្បាប់អន្តរជាតិ និងអាចចាត់ទុកបានជាបទឧក្រិដ្ឋកម្មសង្គ្រាម។
សូមបញ្ចាក់ថាប្រតិកម្មរបស់ឧត្តមស្នងការសិទ្ធិមនុស្សអង្គការសហប្រជាជាតិនេះ ធ្វើឡើង ក្នុងខណៈដែលពលរដ្ឋប៉ាឡេស្ទីនជាច្រើនគ្រួសារកំពុងប្រឈមនឹងការបណ្តេញពីផ្ទះសម្បែងរបស់ខ្លួន ក្រោមសេចក្តីសម្រេចរបស់តុលាការកំពូលអ៊ីស្រាអែល និងក្នុងខណៈដែលពលរដ្ឋប៉ាឡេស្ទីនជាច្រើននាក់ផ្សេងទៀតត្រូវបានចាប់ខ្លួន នៅក្នុងការប៉ះទង្គិចជាមួយភ្នាក់ងាររក្សាសន្តិសុខអ៊ីស្រាអែល ពេលប្រមូលផ្តុំគ្នាតវានៅមុខតុលាការកំពូលក្រុងហ្សេរុយសាឡិម។
ដើមហេតុបណ្តាលមកពី ការដណ្តើមគ្រប់គ្រងដែនដីជាកម្មសិទ្ធជនឯកជននៅទីក្រុងហ្សេរុយសាឡិមខាងកើត។ កាលពីដើមឆ្នាំ តុលាការអ៊ីស្រាអែលក្រុងហ្សេរុយសាឡិមបានកាត់ក្តីឱ្យគ្រួសារអ៊ីស្រាអែលមានសិទ្ធិកាន់កាប់និងក្លាយជាម្ចាស់ដីក្នុងក្រុងហ្សេរុយសាឡិមខាងកើតដែលជាទឹកដីរបស់ប៉ាឡេស្ទីនក្រោមអាណានិគមអ៊ីស្រាអែល។ បើតាមច្បាប់អ៊ីស្រាអែល ជនអ៊ីស្រាអែលណាអាចរកភស្តុតាងបញ្ជាក់ថាមានគ្រួសារធ្លាប់រស់នៅក្នុងក្រុងហ្សេរុយសាឡិមខាងកើតកាលពីមុនសង្គ្រាមឆ្នាំ១៩៤៨ (សង្គ្រាមអ៊ីស្រាអែលជាមួយអារ៉ាប) អាចទារយកកម្មសិទ្ធិដី នៅតំបន់ហ្សេរុយសាឡិមខាងកើត របស់ប៉ាឡេស្ទីនក្រោមអាណានិគមអ៊ីស្រាអែលបាន។ ប៉ុន្តែពុំមានច្បាប់បែបនេះ សម្រាប់ពលរដ្ឋប៉ាឡេស្ទីនដែលបាត់បង់ផ្ទះសម្បែង ក្នុងសម័យសង្គ្រាមនោះទេ។
សេចក្តីសម្រេចនេះបានបញ្ឆេះកំហឹងប៉ាឡេស្ទីន បង្កបង្កើតជាបាតុកម្មប្តឹងទៅតុលាការកំពូលដែលត្រូវបើកសវនការនៅសប្តាហ៍ក្រោយ អារកាត់សេចក្តីជុំវិញគម្រោងបណ្តេញគ្រួសារប៉ាឡេស្ទីនទាំងនោះ។
ហេតុដូច្នេះហើយបានជាអ្នកនាំពាក្យរបស់ឧត្តមស្នងការសិទ្ធិមនុស្សអង្គការសហប្រជាជាតិ ឆ្លៀតតើនរំលឹកអ៊ីស្រាអែលថា អ៊ីស្រាអែលមិនអាចអនុវត្តតាមច្បាប់ផ្ទាល់របស់អ៊ីស្រាអែលលើដែនដីក្រោមអាណានិគម និងក្រុងហ្សេរុយសាឡិមខាងកើតបានទេ។ អ៊ីស្រាអែលត្រូវតែគោរពសេរីភាពនៃការបញ្ចេញមតិ សេរីភាពនៃការជួបជុំ រាប់ទាំងបាតុកម្មប្រឆាំងនឹងការបណ្តេញគ្រួសារប៉ាឡេស្ទីនផង ដោយត្រូវបញ្ចៀសការប្រើកម្លាំងបែបហិង្សា។ នេះបើតាមប្រសាសន៍របស់លោក Colville ដដែល។ ថ្ងៃសុក្រទី ៧ឧសភានេះ អ្នកកាន់សាសនាអ៊ីស្លាម (ប៉ាឡេស្ទីន) រាប់សិបពាន់នាក់ត្រូវធ្វើពិធីតមអាហារនៅវិហារអ៊ីស្លាមនៃក្រុងហ្សេរុយសាឡិមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ