លោក ដូណាល់ ត្រាំ ថាលោកអាចនឹងត្រូវសមត្ថកិច្ច«ចាប់ឃាត់ខ្លួន» នៅថ្ងៃអង្គារខាងមុខ
លោក ដូណាល់ ត្រាំ អតីតប្រធានាធិបតីសហរដ្ឋអាមេរិក បានប្រកាសថា លោកអាចនឹងត្រូវ«ចាប់ឃាត់ខ្លួន» នៅថ្ងៃអង្គារ ខាងមុខ និងថា សូមឲ្យអ្នកគាំទ្ររូបលោក នាំគ្នាងើបឈរបាតុកម្ម មុននឹងហេតុការណ៍ដូច្នោះមកដល់។ ដំណឹងនិងសេចក្តីអំពាវនាវនេះ ធ្វើឡើងនៅក្នុងបណ្តាញសង្គមផ្ទាល់ខ្លួនរបស់លោក ដូណាល់ ត្រាំ ហើយចំណែក រឿងក្តីក្តាំដែលទំនងជាអាចឈានទៅដល់ការ«ឃាត់ខ្លួន»រូបលោក គឺពាក់ព័ន្ធនឹងអាស្រូវផ្លូវភេទមួយ ដែលបានផ្ទុះឡើងកាលពីឆ្នាំ២០១៦។
ចុះផ្សាយនៅថ្ងៃ៖
ស្តាប់ - ០២:៣៣
លើបណ្តាញសង្គមរបស់ខ្លួនពីថ្ងៃសុក្រ លោក ដូណាល់ ត្រាំ សរសេរជាទម្រង់អក្សរធំៗក្នុងសេចក្តីថា «បេក្ខជនគណបក្សសាធារណរដ្ឋដ៏មានប្រជាប្រិយភាពជាងគេ និងជាអតីតប្រធានាធិបតីសហរដ្ឋអាមេរិកផង នឹងអាចត្រូវចាប់ឃាត់ខ្លួន នៅថ្ងៃអង្គារ៍ សប្តាហ៍ខាងមុខ។ សូមបាតុកម្ម! បាតុកម្មកាន់កាប់ជោគវាសនាជាតិយើង។»
បើតាមទីភ្នាក់សារព័ត៌មានបារាំងAFP នេះជាសញ្ញាណដែលបញ្ជាក់កាន់ទៅលើដំណឹងលេចឮច្រើនថ្ងៃមកហើយ ដែលថា លោក ដូណាល់ ត្រាំ អាចនឹងត្រូវជាប់បទចោទប្រកាន់ក្នុងសំណុំរឿងទោសព្រហ្មទណ្ឌ។ ជាការចោទប្រកាន់តបតាមការស៊ើបអង្កេតរបស់រដ្ឋអាជ្ញាក្រុង Manhattan Alvin Bragg មាននិន្នាការគាំទ្រគណបក្សប្រជាធិបតេយ្យ ហើយចំពោះការសម្រេចចោទប្រកាន់ក្នុងសំណុំរឿងនេះ ត្រូវសម្រេចដោយបណ្តាចៅក្រមមេប្រយោគ ដែលមានពលរដ្ឋស៊ីវិលសាមញ្ញចូលរួមសម្រេចចិត្ត (un grand jury)។ Joseph Tacopina មេធាវីម្នាក់ របស់លោក ត្រាំ ប្រាប់អ្នកកាសែតថា កូនក្តីរបស់ខ្លួន នឹងបន្តប្តឹងទៅតុលាការរដ្ឋញូវយ៉ក ប្រសិនបើ កូនក្តីត្រូវជាប់ចោទព្រហ្មទណ្ឌមែននោះ។
អតីតប្រធានាធិបតីសហរដ្ឋអាមេរិក លោក ដូណាល់ ត្រាំ មានជាប់ពាក់ព័ន្ធនឹងបណ្តឹងប្តឹងផ្តល់និងរឿងអាស្រូវជាច្រើន។ លើកនេះ គឺពាក់ព័ន្ធរឿងអាស្រូវផ្លូវភេទ ជាមួយនាងតារាថតកុនកូនជ្រូក ឈ្មោះ Stormy Daniels (នាមដើមពិត Stephanie Clifford)។ នៅឆ្នាំ២០១៦ លោក ដូណាល់ ត្រាំ បានផ្ទេរលុយ ១៣០ ០០០ ដុល្លារ ឲ្យរូបនាង ជាថ្នូរនឹងការបិទមាត់ស្ងាត់ស្ងៀម ក្នុងបញ្ហាទាក់ទងផ្លូវភេទជាមួយរូបលោក។
អតីតមេធាវីរបស់លោក ដូណាល់ ត្រាំ គឺស្មាក្តី Michael Cohen ពីមុនជាមនុស្សស្និទ្ធនឹងលោកត្រាំ ហើយក្រោយមកបែរជាសត្រូវ គឺមេធាវីរូបនេះត្រូវតុលាការកាត់ទោសឲ្យជាប់ពន្ធនាគារ ៣ឆ្នាំ ក្រោយពីលោកមេធាវីសារភាពទទួលស្គាល់ថា ប្រព្រឹត្តខុសល្មើសច្បាប់។ លោកស្មាក្តីបានផ្តល់សាក្សី នៅថ្ងៃចន្ទ ថាខ្លួនពិតជាបានសម្របសម្រួលផ្ទេរលុយកាក់ឲ្យស្រីតារាសម្តែងរឿងអាសអាភាសម្នាក់នោះ ពិតមែន។ លោកធ្វើនេះក៏ព្រោះតែធ្វើតាមបញ្ជាររបស់លោក ត្រាំ។
អ្វីដែលគេបារម្ភនៅពេលនេះ គឺតាមរយៈការអំពាវនាវឲ្យធ្វើបាតុកម្មរបស់លោក ដូណាល់ ត្រាំ ទំនងជាអាចនាំឲ្យចលាចលជាថ្មីចំពោះស្ថាប័នសាធារណៈអាមេរិក ដ្បិតថា លើកមុន ដើមឆ្នាំ២០២១ នៅពេលចាញ់ការបោះឆ្នោតប្រធានាធិបតី គ្រានោះ លោក ត្រាំ អំពាវនាវបាតុកម្មប្រឆាំង ដែលបានធ្វើឲ្យផ្ទុះអំពើហិង្សានៅរដ្ឋសភា វិមានកាពីតូល រហូតមានស្លាប់មនុស្សផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ