ទីភ្នាក់ងារអាមេរិកអនុញ្ញាតឲ្យក្រុមហ៊ុនរបស់លោកElon Musk ធ្វើការសាកល្បងដាក់ឈីបក្នុងខួរក្បាលមនុស្ស
Neuralink ក្រុមហ៊ុន Start Upរបស់មហាសេដ្ឋីអាមេរិក លោក Elon Musk បានអះអាងថា ក្រុមហ៊ុនបានទទួលការអនុញ្ញាតពីទីភ្នាក់ងារចំណីអាហារ និងឱសថរបស់អាមេរិក FDA ដើម្បីធ្វើការសាកល្បង ដាក់បន្ទះឈីប ក្នុងខួរក្បាលរបស់មនុស្ស។ នៅក្នុងសារធ្វីតកាលពិថ្ងៃព្រហស្បតិ៍ ក្រុមហ៊ុន Neuralink សរសេរថា ការបើកភ្លើងខៀវរបស់ទីភ្នាក់ងារអាមេរិក ជាការបោះជំហានមួយសំខាន់ ដែលអនុញ្ញាតឲ្យក្រុមហ៊ុនអាចប្រើបច្ចេកវិទ្យាជួយស្តារកាយសម្បទារបស់មនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
ក្រុមហ៊ុនStart Up Neuralink ដែលធ្វើការស្រាវជ្រាវលើការដាក់បន្ទះឈីបក្នុងខួរក្បាល បានទទួលភ្លើងខៀវពីទីភ្នាក់ងារចំណីអាហារ និងឱសថអាមេរិក ដើម្បីធ្វើការសាកល្បងជាលើកទី១ទៅលើមនុស្ស។ បង្កើតឡើងនៅឆ្នាំ ២០១៦ ក្រុមហ៊ុនបច្ចេកវិទ្យាNeuralinkរបស់មហាសេដ្ឋី លោកElon Musk ចង់ប្រើបន្ទះឈីប ដាក់ក្នុងខួរក្បាល ដើម្បីជួយស្តារកាយសម្បទា របស់អ្នកពិការភ្នែក អ្នកមានបញ្ហាសរសៃប្រសាទ និងជួយខួរក្បាលរបស់អ្នកពិការផ្សេងទៀតឲ្យទាក់ទងផ្ទាល់ទៅនឹងកុំព្យូទ័រ។
តាមបទបង្ហាញរបស់លោកElon Musk កាលពីខែ ធ្នូចុងឆ្នាំ២០២២ ក្រុមហ៊ុនNeuralink ប្រើបច្ចេកវិទ្យា រ៉ូបូ ចោះលលាដ៍ក្បាលដាក់បន្ទះឈីប ដែលមានខ្សែបណ្តាញតភ្ជាប់ទៅនឹងប្រព័ន្ធប្រសាទ។ បន្ទះឈីបមានតួនាទី បកប្រែសញ្ញាដែលទទួលបានពីខួរក្បាល និងបញ្ជូនព័ត៌មានទៅកាន់ទូរស័ព្ទ ឬម៉ាស៊ីនអេឡិចត្រូនិក តាមរយៈBluetoothប្រគោលដៅរបស់Neuralink គឺតភ្ជាប់ខួរក្បាលទៅនឹងម៉ាស៊ីនកុំព្យូទ័រ
ក្រុមហ៊ុនNeuralink ធ្លាប់បានពិសោធន៍ដាក់បន្ទីបឈីប ប៉ុនកាក់ ទៅក្នុងលលាដ៍ក្បាលសត្វស្វា និងសត្វជ្រូក តាំងពីឆ្នាំ ២០១៨។ នៅដើមឆ្នាំ ២០២០ ក្រុមហ៊ុនបច្ចេកវិទ្យារបស់លោកElon Musk បានដាក់ពាក្យសុំទៅទីភ្នាក់ងារចំណីអាហារ និងឱសថដើម្បីពិសោធន៍សាកល្បងលើមនុស្ស ប៉ុន្តែ មិនបានសម្រេច។
តាមការចុះផ្សាយរបស់ទីភ្នាក់ងារព័ត៌មានអង់គ្លេស Reuters ទីភ្នាក់ងារចំណីអាហារ និងឱសថអាមេរិក ធ្លាប់បានទាត់ចោលពាក្យសុំរបស់ក្រុមហ៊ុនNeuralink ដោយសារក្តីបារម្ភ ទាក់ទងនឹងសុវត្ថិភាពរបស់អ្នកដែលត្រូវដាក់បន្ទះឈីបចូលក្នុងលលាដ៍ក្បាល។ តាមបុគ្គលិករបស់ក្រុមហ៊ុនNeuralink ដែល Reuters បានជួបសម្ភាសន៍ ទីភ្នាក់ងារចំណីអាហារ និងឱសថអាមេរិកបានទាមទារឲ្យក្រុមហ៊ុនបកស្រាយឲ្យបានច្បាស់ពីបញ្ហាសុវត្ថិភាព នៅមុនធ្វើការពិសោធន៍សាកល្បងទៅលើមនុស្ស។ បន្ទះឈីបដែលដាក់ក្នុងលលាដ៍ក្បាលមនុស្ស មានអាគុយធ្វើពីលីចូម។ ចំណុចចោទសួរមួយទៀត នៅត្រង់ថា តើនៅពេលគេដកបន្ទីបឈីបចេញពីក្នុងលលាដ៍ក្បាលមកវិញ តើបណ្តាញខ្សែតភ្ជាប់ឈីបទៅនឹងប្រព័ន្ធខួរក្បាលនឹងអាចទៅបំផ្លាញ ជាលិការបស់ខួរក្បាលដែរឬទេ។
នៅលើវិបសៃតិ៍របស់ក្រុមហ៊ុនNeuralink គេបានសន្យាចាត់ទុកសុវត្ថិភាព ជាអាទិភាព របស់ក្រុមហ៊ុន ជាពិសេស នៅក្នុងដំណាក់កាលដាក់បន្ទះឈីបក្នុងខួរក្បាល។
នៅក្រោយទទួលភ្លើងខៀវពីទីភ្នាក់ងារអាមេរិក ក្រុមហ៊ុនNeuralink បញ្ជាក់ថា គេនៅមិនទាន់ចាប់ផ្តើមបើកការចុះឈ្មោះ រើសអ្នកស្ម័គ្រចិត្តសម្រាប់ការងារសាកល្បងនៅឡើយទេ។ ប៉ុន្តែ នៅលើវិបសៃតិ៍ ក្រុមហ៊ុនបានបង្ហោះផ្សាយទម្រង់សុំចុះឈ្មោះរបស់អ្នកដែលចាប់អារម្មណ៍ចង់ដាក់បន្ទះឈីប ក្នុងខួរក្បាលរបស់Neuralink។
ទីភ្នាក់ងារអាមេរិកផ្តល់ការអនុញ្ញាតឲ្យ Neuralinkធ្វើការសាកល្បងដាក់បន្ទះឈីបក្នុងខួរក្បាលមនុស្ស នៅក្នុងខណៈដែលអ្នកស្រាវជ្រាវស្វ៊ីសទើបសម្រេចបានជោគជ័យ ប្រើបច្ចេកវិទ្យាស្រដៀងគ្នានេះដើម្បីជួយអ្នកពិការម្នាក់ឲ្យអាចងើបដើរឡើងវិញបាន ដោយគ្រាន់តែ នឹកគិតចង់ដើរតែប៉ុណ្ណោះ។ បុរសរូបនោះត្រូវអរគុណដល់ឈីបដាក់ក្នុងខួរក្បាលរបស់គេ ដែលបានជួយបញ្ជូនសញ្ញាពីខួរក្បាល ទៅបញ្ជាឲ្យជើងបោះជំហានដើរដូចធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ