អាមេរិក ដាក់ទណ្ឌកម្ម អ្នកតំណាងក្រុមហ៊ុនទាហានស៊ីឈ្នួលរុស្ស៊ី នៅម៉ាលី
សហរដ្ឋអាមេរិក ដាក់ទណ្ឌកម្មសេដ្ឋកិច្ចនិងការទូត ប្រឆាំងនឹងអ្នកតំណាងក្រុមហ៊ុនទាហានស៊ីឈ្នួលរុស្ស៊ីប្រចាំប្រទេសម៉ាលី និងមន្ត្រីយោធាជាន់ខ្ពស់ម៉ាលី ចំពោះការលួចលាក់ទិញគ្រឿងសព្វាវុធពីប្រទេសតួកគី ដើម្បីទៅបំប៉នភ្នក់ភ្លើងសង្គ្រាមនៅ អ៊ុយក្រែន។ ទណ្ឌកម្មរបស់រដ្ឋាបាលទីក្រុងវ៉ាស៊ីនតោននេះ ដាក់ចេញកាលពីថ្ងៃព្រហស្បតិ៍ ទី២៥ឧសភា ហើយក្រសួងការបរទេសអាមេរិក ក៏បានបញ្ជាក់ដែរ ពីការរឹតបន្តឹងទិដ្ឋាការ ចំពោះ ប្រធានាធិបតីម៉ាលី និងមេបញ្ជាការកងទ័ពម៉ាលី។
ចុះផ្សាយនៅថ្ងៃ៖
ស្តាប់ - ០២:២១
ទណ្ឌកម្មទាំងនោះ ដាក់ចេញ គឺបន្ទាប់ពី ក្រុមស៊ើបការណ៍សម្ងាត់សហរដ្ឋអាមេរិក បានរកឃើញថា រដ្ឋាភិបាលម៉ាលីដឹកនាំដោយពួកយោធា បានចុះកិច្ចសន្យា ជាមួយប្រទេស តួកគី ដើម្បីទិញគ្រឿងសព្វាវុធ ហើយអាវុធទាំងនោះ ត្រូវបញ្ជូនបន្តទៅឲ្យរុស្ស៊ី ហើយ ម៉ាលី ទទួលបានប្រាក់កម្រៃជើងសារ ក្នុងអំពើទិញដូរអាវុធនេះ។ ការឃុបឃិតនេះ ជាប់ពាក់ព័ន្ធនឹង អ្នកតំណាងជាន់ខ្ពស់ក្រុមហ៊ុន Wagner នៅប្រទេសម៉ាលី និងថ្នាក់ដឹកនាំធំៗរបស់រដ្ឋាភិបាលម៉ាលីផ្ទាល់តែម្តង។ នេះបើតាមប្រភពមន្ត្រីជាន់ខ្ពស់អាមេរិក លោក Brian Nelson។
អាស្រ័យហេតុដូច្នេះ រដ្ឋាភិបាលសហរដ្ឋអាមេរិក តាមរយៈក្រសួងសេដ្ឋកិច្ច បានដាក់ទណ្ឌកម្ម បង្កកទ្រព្យសម្បត្តិ និងដាក់ទណ្ឌកម្មប្រឆាំងបុគ្គល បន្ថែមទៀត ទៅលើអ្នកពាក់ព័ន្ធ។ ជនជាតិរុស្ស៊ី លោក Ivan Aleksandrovich Maslov អ្នកតំណាងជាន់ខ្ពស់ក្រុមហ៊ុន Wagner នៅប្រទេសម៉ាលី ហើយនិង ក្រុមគ្រួសាររបស់បុគ្គលនេះ គឺ ត្រូវ សហរដ្ឋអាមេរិក បង្កក និងរឹបអូសទ្រព្យសម្បត្តិទាំងអស់ដែលមាននៅអាមេរិក។ ទណ្ឌកម្មនេះ ក៏ប៉ះពាល់ដែលក្រុមហ៊ុនដៃគូដែលរកស៊ីជាមួយលោក Ivan Aleksandrovich Maslov ដែរ។ ចំពោះថ្នាក់ដឹកនាំរដ្ឋាភិបាលម៉ាលីវិញ គឺ ប្រធានាធាធិបតី Moustapha Sangaré និង លោក Lassine Togola មេបញ្ជាការកម្លាំងកងទ័ពពិសេសម៉ាលី ក៏ត្រូវជាប់ទណ្ឌកម្មអាមេរិក និងត្រូវរឹតបន្តឹងជាទីបំផុតចំពោះការសុំទិដ្ឋាការឆ្លងដែន។
ម៉ាលី កាន់តែងាកខិតទៅ រុស្ស៊ី និងតួកតី។ ពួកយោធាម៉ាលី ឡើងកាន់អំណាច នៅខែតុលាឆ្នាំ២០២០ ហើយប៉ុន្មានឆ្នាំចុងក្រោយនេះ រដ្ឋាភិបាលយោធាម៉ាលី ពឹតតែធ្វើនយោបាយដឹកនាំប្រទេសឃ្លាតឆ្ងាយពីក្រុមប្រទេសលោកខាងលិច និងថែមទាំងបាន បណ្តាញទាហានបារាំងចេញពីប្រទេសទៀតផង។ តាមទិន្នន័យរបស់វិទ្យាស្ថានស្រាវជ្រាវអន្តរជាតិដើម្បីសន្តិភាពនៅក្រុងស្កុកខុម ចន្លោះឆ្នាំ២០២១ និង២០២២ គឺ មាលី បានទទួលជំនួយយោធា យន្តហោះចម្បាំង ឧទ្ធម្ភាគចក្រ និងប្រព័ន្ធវ៉ាដា ពីប្រទេសរុស្ស៊ី។ ប្រទេស តួកគី ក៏បានផ្តល់ យន្តហោះដ្រូន និងយន្តហោះប្រមាញ់ ទៅឲ្យ ម៉ាលី ដែរ។
ប្រភពពីសហរដ្ឋអាមេរិក ពួកទាហានស៊ីឈ្នួលរុស្ស៊ី មានចំនួនកើនឡើងៗ នៅម៉ាលី ហើយពួកនេះ ធ្វើព្យុះធ្វើភ្លៀងខ្លាំងនៅតំបន់អាហ្វ្រិក នៅអាហ្វ្រិកកណ្តាល នៅស៊ីរី និង លីប៊ី ដែរ។
នៅចុងឆ្នាំ២០២២ សហរដ្ឋអាមេរិក ក៏ធ្លាប់បានចោទប្រកាន់ ប្រទេសកូរ៉េខាងជើង ថាបានផ្តល់ មីស៊ីល និង គ្រាប់រ៉ុក្កែត ឲ្យក្រុមហ៊ុនទាហានស៊ីឈ្នួលរុស្ស៊ី Wagner ដើម្បីយកទៅច្បាំងនៅ អ៊ុយក្រែន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ