មហាសេដ្ឋីElon Muskគំរាមប្តឹងMetaដែលបង្កើតបណ្តាញសង្គមThreadsមកប្រជែងជាមួយ Twitter
មេក្រុមហ៊ុនបច្ចេកវិទ្យាអាមេរិកចាប់ផ្តើមផ្ទុះសង្រ្គាមពាក្យសំដីដាក់គ្នា នៅក្រោយការបង្កើតបណ្តាញសង្គមថ្មីឈ្មោះ Threads។ នៅថ្ងៃព្រហស្បតិ៍ម្សិលមិញ ប្រធានក្រុមហ៊ុនTwitter លោកElon Muskបានគំរាមប្តឹងក្រុមហ៊ុនMetaរបស់លោកMark Zuckerberg ដែលបានបង្កើត Threadsមកប្រជែងជាមួយ បណ្តាញសង្គមTwitter។ តាមប្រធានក្រុមហ៊ុនMeta ក្នុងរយៈពេលតែ ២៤ម៉ោង គណនីជាង៣០លានត្រូវបានបង្កើតឡើងនៅក្នុងបណ្តាញសង្គមថ្មីThreads។
ចុះផ្សាយនៅថ្ងៃ៖
ស្តាប់ - ០២:៤១
អ្វីៗបានប្រព្រឹត្តដោយលឿនរហ័ស។ បង្កើតឡើងដោយក្រុមហ៊ុនMetaនៅថ្ងៃពុធ ទី៥ កក្កដា បណ្តាញសង្គមThreads ដែលត្រូវគេមើលឃើញថា ជាគូប្រជែងរបស់បណ្តាញTwitter មានអ្នកចុះឈ្មោះបង្កើតគណនីចំនួនជាង ៣០លាននៅក្នុងរយៈពេលតែមួយថ្ងៃ។
នៅក្នុងសារThreads នៅព្រឹកថ្ងៃសុក្រនេះ ម្ចាស់ក្រុមហ៊ុនបច្ចេកវិទ្យា Meta លោក Mark Zuckerbergសំដែងការភ្ញាក់ផ្អើលនឹងតួលេខដែលលោកចាត់ទុកថា ពិសេស កម្រនឹងមាន និងថា ក្រុមហ៊ុនមានកិច្ចការត្រូវធ្វើច្រើនទៀតដើម្បីកសាងបណ្តាញសង្គម Threads ដែលជាកម្មវិធីសន្ទនាដូច Instagram ប៉ុន្តែ ជាសន្ទនាតាមសំណេរ។
នៅមុនបង្ហោះសារ អបអរការឡើងកូដរបស់បណ្តាញសង្គមThreads ប្រធានក្រុមហ៊ុន Metaលោក Mark Zuckerbergនៅបានសរសេរឌឺដង ចាក់ដោតលោកElon Musk ដែលជាគូប្រជែង។ តាមប្រធានក្រុមហ៊ុនMeta បណ្តាញសង្គមThreadsនឹងអាចមានប្រើប្រាស់យ៉ាងហោច ១ពាន់លាននាក់។ តាម Zuckerberg ក្រុមហ៊ុនTwitterមានឱកាស ប៉ុន្តែខកខានមិនបានធ្វើវាឲ្យបានសម្រេច។ ប៉ុន្តែ Metaវិញសង្ឃឹមថានឹងជោគជ័យ។
ការឡើងកូដប្រជាប្រិយភាពរបស់កម្មវិធី Threads មិនបានធ្វើឲ្យលោកElon Muskនៅស្រណុកស្រួល។ ក្រៅពីសើចចំអករូបកម្មវិធី Threads ដែលមានរូបរាងដូចដង្កូវ ប្រធានក្រុមហ៊ុន Twitterគំរាមប្តឹងក្រុមហ៊ុនMetaទៅតុលាការអាមេរិក។ នៅក្នុងលិខិតរបស់មេធាវីក្រុមហ៊ុន Twitter លោកElon Muskបានចោទប្រកាន់ក្រុមហ៊ុនMeta ថាបានរំលោភច្បាប់កិច្ចការសម្ងាត់ឧស្សាហកម្ម និងច្បាប់កម្មសិទ្ធិបញ្ញា។ ប្រធានក្រុមហ៊ុនTwitter នៅបានចោទក្រុមហ៊ុនMeta របស់លោក Mark Zuckerbergថាបានរើសបញ្ចូលអតីតបុគ្គលិករបស់ក្រុមហ៊ុន Twitter។
នៅក្នុងសារធ្វីត ម្ចាស់ក្រុមហ៊ុន Twitter លោកElon Muskសរសេរថា ការប្រកួតប្រជែងមិនមែនជាបញ្ហា ប៉ុន្តែ បញ្ហាគឺការលួចបន្លំ។ អ្នកនាំពាក្យរបស់ក្រុមហ៊ុនMeta បានទាត់ចោលការលើកឡើងរបស់លោកElon Musk និងថា វិស្វករ បុគ្គលិកទាំងអស់របស់បណ្តាញសង្គមThreads គ្មានប្រវត្តិជាអតីតបុគ្គលិករបស់ក្រុមហ៊ុនTwitter។
ក្រុមហ៊ុនMeta របស់លោក Zuckerbergបានបង្កើតកម្មវិធីThreadsនៅប៉ុន្មានថ្ងៃក្រោយដែលក្រុមហ៊ុន Twitterកាន់តែធ្លាក់កូដប្រជាប្រិយមួយកម្រិតទៀត ដោយសារនយោបាយថ្មីរបស់លោក Elon Muskដែលទើបប្រកាសកាលពីចុងសប្តាហ៍មុន ពីការកំណត់ចំនួនសារសរសេរ និងបង្ហោះសម្រាប់អ្នកប្រើប្រាស់នៅក្នុងមួយថ្ងៃ។ សម្រាប់អ្នកជំនាញ តាំងពីស្ថិតក្រោមការគ្រប់គ្រងរបស់លោកElon Muskដែលបានចំណាយលុយ៤៤ពាន់លានដុល្លារទិញក្រុមហ៊ុនTwitter កាលពីឆ្នាំ២០២២ Twitterបានធ្លាក់កូដប្រជាប្រិយខ្លាំងហៅមិនលឺ។ អ្នកប្រើប្រាស់បណ្តាញសង្គមរូបចាបពណ៌ខៀវកាន់តែអស់សង្ឃឹម លែងជឿទុកចិត្តលើបណ្តាញសង្គមចាប់តាំងពីលោកElon Musk បណ្តេញបុគ្គលិកដែលត្រួតពិនិត្យខ្លឹមសារផ្សាយនៅលើបណ្តាញ ឬការតម្រូវឲ្យមានការបង់ថ្លៃសេវាប្រើប្រាស់។ កម្មវិធី Threadsរបស់ក្រុមហ៊ុនMeta អាចជាច្រកផ្លូវដង្ហើមថ្មីសម្រាប់អ្នកប្រើប្រាស់ដែលចង់ងាកចេញពីបណ្តាញTwitter៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ