IMF៖សេដ្ឋកិច្ចសកលឆ្នាំ ២០២៣មានភាពធន់ តែនៅបន្តផុយស្រួយ
នៅថ្ងៃអង្គារ ទី១០ តុលា មូលនិធិរូបិយវត្ថុអន្តរជាតិ IMF បានផ្សព្វផ្សាយទិន្នន័យស្តីពីស្ថានភាពសេដ្ឋកិច្ចក្នុងលោក។ តាមទិន្ន័យរបស់ IMF សេដ្ឋកិច្ចសកលក្នុងឆ្នាំ ២០២៣ មានភាពធន់ តែនៅបន្តផុយស្រួយ។ IMF បានព្យាករណ៍ពីកំណើនសេដ្ឋកិច្ចចំនួន ៣% សម្រាប់ឆ្នាំ ២០២៣ និង ចំនួន ២,៩% នៅឆ្នាំ ២០២៤។
ចុះផ្សាយនៅថ្ងៃ៖
ស្តាប់ - ០៣:២២
ប្រមុខសេដ្ឋវិទូរបស់ IMF លោក Pierre-Olivier Gourinchars បានថ្លែងនៅក្នុងសន្និសីទកាសែតថា IMF បានកត់សម្គាល់ឃើញពីស្ថានភាពសេដ្ឋកិច្ចមិនដូចគ្នានៅក្នុងចំណោមប្រទេសអភិវឌ្ឃ និងប្រទេសដែលកំពុងមានសេដ្ឋកិច្ចរីកលូតលាស់ខ្លាំង។ ខណៈដែលប្រទេសខ្លះកំពុងស្គាល់សេដ្ឋកិច្ចប្រសើរឡើង ស្រាប់តែមានប្រទេសខ្លះទៀតបែរជាកំពុងមានសេដ្ឋកិច្ចដើរយឺត ឬដើរថយក្រោយទៅវិញ ពិសេសប្រទេសនៅអឺរ៉ុប។ មូលហេតុជាពិសេស គឺការបន្តទទួលផលវិបាកកើតចេញពីសង្រ្គាមរុស្ស៊ីឈ្លានពានអ៊ុយក្រែន។ អត្រាអតិផរណាខ្ពស់អូសបន្លាយយូរបានបង្ខំឲ្យធនាគារកណ្តាលបន្តរឹតបន្តឹងនយោបាយរូបិយវត្ថុជាមួយនឹងអត្រាការប្រាក់ខ្ពស់។
នៅក្នុងន័យនេះ IMF បានព្យាករណ៍ពីអត្រាអតិផរណាខ្ពស់ជាងការព្យាករណ៍កាលពី ៣ខែមុន ពោលមាន ៦,៩% សម្រាប់ឆ្នាំ ២០២៣ និង ៥,៨% នៅឆ្នាំ ២០២៤ ខាងមុខ។ ក្នុងចំណោមប្រទេសអភិវឌ្ឃ អាល្លឺម៉ង់កំពុងបង្ហាញសញ្ញាគួរឲ្យបារម្ភខ្លាំងជាមួយនឹងសេដ្ឋកិច្ចដើរថយក្រោយ -០,៥% ក្នុងឆ្នាំ ២០២៣ និងអាចងើបឡើងវិញបន្តិចនៅឆ្នាំ ២០២៤ ជាមួយនឹងកំណើនសេដ្ឋកិច្ចចំនួន ០,៩%។ មានកត្តាសំខាន់ពីរបូកបញ្ចូលគ្នាដែលបានជំរុញឲ្យអាល្លឺម៉ង់ដែលជាមហាអំណាចសេដ្ឋកិច្ចទី១ របស់អឺរ៉ុបជួបស្ថានការណ៍របៀបនេះ ទី១ វិបត្តិថាមពលបង្កចេញពីសង្រ្គាមអ៊ុយក្រែនដែលអាល្លឺម៉ង់បានពឹងខ្លាំងលើឧស្ម័នរុស្ស៊ី និងទី២ ការរឹតបន្តឹងនយោបាយរូបិយវត្ថុ។
ក្រៅពីអាល្លឺម៉ង់មួយចេញ ប្រទេសអឺរ៉ុបផ្សេងទៀតត្រូវបាន IMF ព្យាករណ៍ពីការមានកំណើនសេដ្ឋកិច្ចក្នុងចន្លោះពី ០,៥% ទៅ ២,៥%។ នៅសហរដ្ឋអាមេរិក កំណើនសេដ្ឋកិច្ចឆ្នាំ ២០២៣ មាន ២,១% មុននឹងធ្លាក់ចុះនៅត្រឹម ១,៥% សម្រាប់ឆ្នាំ ២០២៤។ ចំណែកនៅក្នុងចំណោមប្រទេសធំៗដែលកំពុងមានសេដ្ឋកិច្ចរីកលូតលាស់ខ្លាំងវិញ IMF បានបញ្ជាក់ពីកំណើនសេដ្ឋកិច្ចចិនថយចុះនៅត្រឹម ៥% ក្នុងឆ្នាំ ២០២៣ និងធ្លាក់នៅត្រឹម ៤,២% សម្រាប់ឆ្នាំ ២០២៤ ខាងមុខ ខណៈដែលចិនកំពុងមានវិបត្តិក្នុងវិស័យអចលនទ្រព្យ។ តែ IMF បានព្រមានថា បើវិបត្តិមួយនេះនៅបន្តគ្មានច្រកចេញ សេដ្ឋកិច្ចចិននឹងធ្លាក់ចុះថែមទៀត។
ក្រៅពីចិន ប្រទេសដែលកំពុងមានសេដ្ឋកិច្ចរីកលូតលាស់ខ្លាំងផ្សេងទៀត ដូចយ៉ាងឥណ្ឌា ឬប្រេស៊ីលក៏មានកំណើនសេដ្ឋកិច្ចវិជ្ជមានដែរ។ ទាក់ទងនឹងប្រទេសរុស្ស៊ីត្រូវបាន IMF ព្យាករណ៍ពីការមានកំណើនសេដ្ឋកិច្ចចំនួន ២,២% ក្នុងឆ្នាំ ២០២៣ ពោលខុសពីការព្យាករណ៍កាលពី ១ឆ្នាំដែលថា រុស្ស៊ីនឹងមានសេដ្ឋកិច្ចដើរថយក្រោយខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ