សភាអ្នកតំណាងរាស្រ្តអាមេរិកអនុម័តច្បាប់ផ្តល់ជំនួយ១៤ពាន់លានដុល្លារទៅអ៊ីស្រាអែល
សភាអ្នកតំណាងរាស្រ្តអាមេរិកបានបោះឆ្នោត កាលពីថ្ងៃព្រហស្បតិ៍ ទី ២វិច្ឆិកា អនុម័តកញ្ចប់ថវិកា ១៤ពាន់លានដុល្លារសម្រាប់ជួយអ៊ីស្រាអែលក្នុងគ្រាមានសង្រ្គាមជាមួយក្រុមហាម៉ាសប៉ាឡេស្ទីន។ ប៉ុន្តែ ច្បាប់ថវិកាគាំទ្រដោយសំឡេងភាគច្រើនរបស់ក្រុមសាធារណរដ្ឋ នៅសភាអ្នកតំណាងរាស្រ្តនឹងអាចស្លាប់មុនកើត ព្រោះថា ប្រធានាធិបតីអាមេរិក លោកចូ បៃដិនបានសន្យាហើយថា នឹងវេតូប្រឆាំងច្បាប់ថវិកាដែលគ្មានរាប់បញ្ចូលកញ្ចប់ជំនួយសម្រាប់អ៊ុយក្រែន។
ចុះផ្សាយនៅថ្ងៃ៖
ស្តាប់ - ០៣:០៥
ជាមួយសំឡេងគាំទ្រ ២២៦ និងសំឡេងប្រឆាំងចំនួន ១៩៦ សភាអ្នកតំណាងរាស្រ្តអាមេរិក ដែលគ្រប់គ្រងដោយសំឡេងភាគច្រើនរបស់បក្សសាធារណរដ្ឋ បោះឆ្នោតអនុម័តកញ្ចប់ថវិកា១៤ពាន់លានដុល្លារសម្រាប់ជួយអ៊ីស្រាអែល ដែលកំពុងជាប់ដៃធ្វើសង្រ្គាមជាមួយក្រុមហាម៉ាសប៉ាឡេស្ទីន។
សម្រាប់ប្រធានសភាអ្នកតំណាងរាស្រ្ត មកពីបក្សសាធារណរដ្ឋ វាជារឿងបន្ទាន់ ដែលគេត្រូវអនុម័តច្បាប់ផ្តល់ជំនួយថវិកា ជួយអ៊ីស្រាអែល ក្នុងគ្រាមានសង្រ្គាម។ យ៉ាងណាក៏ដោយ កញ្ចប់ជំនួយ១៤ពាន់លានដុល្លារ មាននិយាយពីប្រព័ន្ធខែលមីស៊ីល និងសព្វាវុធអាមេរិកសម្រាប់ជួយកងទ័ពអ៊ីស្រាអែលនៅក្នុងសមរភូមិហ្កាហ្សា ដែលសភាអ្នកតំណាងរាស្រ្តបោះឆ្នោត កាលពីថ្ងៃព្រហស្បតិ៍ ទំនងមិនអាចលេចចេញរូបរាងបានឡើយ ពោល គឺស្លាប់មុនកើត ព្រោះថា ព្រឹទ្ធសភា រួមទាំងលោកប្រធានាធិបតី អាមេរិក ចូ បៃដិនបានសន្យាហើយថា នឹងវេតូប្រឆាំង មិនចុះហត្ថលេខាដាច់ខាត ច្បាប់ស្តីពីការផ្តល់ជំនួយសម្រាប់អ៊ីស្រាអែល។
លោកចូ បៃដិនផ្ទាល់ធ្លាប់គាំទ្រឲ្យមានកញ្ចប់ថវិកាជួយអ៊ីស្រាអែល ក៏ប៉ុន្តែ លោកចង់ឲ្យគេដាក់បញ្ចូលកញ្ចប់ថវិកាជួយអ៊ីស្រាអែល ទៅក្នុងចង្កោមកញ្ចប់ជំនួយសរុបរបស់អាមេរិកសម្រាប់បរទេសតម្លៃ ១០៦ពាន់លានដុល្លារ ដែលមានតាំងពីកញ្ចប់ជំនួយយោធាសម្រាប់អ៊ុយក្រែន ជំនួយមនុស្សធម៌សម្រាប់ប្រជាជនប៉ាឡេស្ទីន នៅហ្កាហ្សា។
លោកចូ បៃដិននៅចង់បាន កញ្ចប់ថវិកាសម្រាប់អភិវឌ្ឍនាវាមុជទឹក និងគម្រោងការសេដ្ឋកិច្ច ដើម្បីប្រកួតប្រជែងជាមួយគម្រោងរបស់ចិន នៅតាមបណ្តាប្រទេសកំពុងអភិវឌ្ឍ។
ប៉ុន្តែ ប្រធានសភាអ្នកតំណាងរាស្រ្ត លោក Mike Johnson មកពីគណបក្សសាធារណរដ្ឋ ធ្វើថ្លង់ មិនលឺការទាមទារចង់បានរបស់លោកចូ បៃដិន ដោយផ្គើនបោះឆ្នោតអនុម័តកញ្ចប់ថវិកាជួយតែអ៊ីស្រាអែល។ សម្រាប់Mike Johnson គេមិនត្រូវខាតពេលជជែកច្រើនឡើយ។ ជំនួយសម្រាប់អ៊ីស្រាអែលជាអាទិភាពរបស់អាមេរិក ចំណែក ជំនួយហិរញ្ញវត្ថុសម្រាប់សម្ព័ន្ធមិត្តផ្សេងទៀតរបស់អាមេរិកនឹងអាចត្រូវយកមកជជែក នៅពេលក្រោយ។
បើតាមប្រធានសភាអ្នកតំណាងរាស្រ្តអាមេរិក មានបញ្ហាច្រើននៅក្នុងពិភពលោក ប៉ុន្តែ អាមេរិកត្រូវខ្វល់ យកចិត្តទុកដាក់មុនគេ បញ្ហាដែលកំពុងកើត នៅក្នុងទឹកដីខ្លួន។
នៅត្រង់ចំណុចនេះ លោក Mike Johnsonសន្យាថា ការបោះឆ្នោតលើកក្រោយ នឹងផ្តោតលើកញ្ចប់ថវិកា សម្រាប់ពង្រឹងសន្តិសុខនៅព្រំដែនជាមួយម៉ិចស៊ិក និងកញ្ចប់ជំនួយសម្រាប់អ៊ុយក្រែន។ ជាប្រទេសផ្តល់ជំនួយច្រើនជាងគេសម្រាប់អ៊ុយក្រែន ប្រមាណ ១១៣ពាន់លានដុល្លារ គិតចាប់តាំងពីរុស្ស៊ីធ្វើសង្រ្គាមឈ្លានពានអ៊ុយក្រែន អាមេរិកក្នុងអាណត្តិរបស់លោកចូ បៃដិនទើបបានសន្យា ជាមួយប្រធានាធិបតីអ៊ុយក្រែន កាលពីខែ កញ្ញាទៅថា នឹងផ្តល់ជំនួយយោធាបន្ថែម សម្រាប់ជួយអ៊ុយក្រែន នៅក្នុងសមរភូមិប្រយុទ្ធទល់នឹងរុស្ស៊ី។ ការបោះឆ្នោតរបស់សភាអ្នកតំណាងរាស្រ្ត អនុម័តកញ្ចប់ថវិកាជំនួយសម្រាប់តែអ៊ីស្រាអែល ប៉ុន្តែ គ្មានអ៊ុយក្រែន កំពុងបំផ្លាញការសន្យារបស់ប្រធានាធិបតីអាមេរិកសម្រាប់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ