អាហ្សង់ទីនមានប្រធានាធិបតីដែលមិនចង់ទាក់ទងជាមួយប្រទេសកុម្មុយនិស្ត ដូចជាចិន
អាហ្សង់ទីនបែរក្បាលម៉ាស៊ីនដឹកនាំរដ្ឋាភិបាល បន្ទាប់ពី បេក្ខជនថ្មីស្រឡាង លោក Javier Milei មកពីខាងគណបក្សស្តាំនិយមជ្រុល ទទួលជ័យជំនះដ៏ធំធេង នៅក្នុងការបោះឆ្នោតប្រធានាធិបតី កាលពីថ្ងៃអាទិត្យ ទី ១៩វិច្ឆិកា។ ក្រៅពីការអបអរភ្លូកទឹកភ្លូកដី របស់អ្នកគាំទ្រប្រេស៊ីល ជ័យជំនះរបស់លោក Javier Milei បានទទួលសំឡេងស្វាគមផ្សេងៗគ្នាពីសហគមន៍អន្តរជាតិ។ ខណៈពេលដែលអតីតប្រធានាធិបតីអាមេរិក និងប្រេស៊ីល មកពីក្រុមស្តាំនិយមជ្រុល អបអរជ័យជំនះរបស់លោកJavier Milei ចិនវិញព្រមានអនាគតរដ្ឋាភិបាលអាហ្សង់ទីនថ្មី បន្ទាប់ពីលោក Javier Mileiធ្លាប់បាននិយាយថា លោកនឹងកាត់ផ្តាច់ទំនាក់ទំនងជាមួយប្រទេសចិនកុម្មុយនិស្ត និងប្រេស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៨
ប្រតិកម្មអន្តរជាតិបានធ្លាក់ជាបន្តបន្ទាប់ នៅក្រោយពីបេក្ខជនសេរីស្តាំនិយមជ្រុល លោក Javier Mileiទទួលជ័យជំនះដ៏ធំធេង នៅក្នុងការបោះឆ្នោតប្រធានាធិបតីអាហ្សង់ទីន កាលពីយប់ថ្ងៃអាទិត្យទី១៩វិច្ឆិកា។ ខណៈពេលអឺរ៉ុប អាមេរិក ឥណ្ឌា និងប្រទេសជាប់របងអាហ្សង់ទីន ប្រកាសស្វាគមជ័យជំនះរបស់លោក Javier Milei មហាអំណាចចិន តាមរយៈអ្នកនាំពាក្យក្រសួងការបរទេសបានព្រមានអនាគតរដ្ឋាភិបាលថ្មីរបស់អាហ្សង់ទីន ពីកំហុសឆ្គងធ្ងន់ធ្ងរ បើសិនហ៊ានកាត់ផ្តាច់ទំនាក់ទំនងជាមួយចិន។
ប្រតិកម្មព្រមានរបស់មហាអំណាចចិនធ្វើឡើង បន្ទាប់ពីលោក Javier Milei បេក្ខជនសេរីស្តាំនិយមជ្រុលធ្លាប់ប្រកាសនៅក្នុងយុទ្ធនាការបោះឆ្នោតថា បើសិនលោកឈ្នះឆ្នោត នោះរដ្ឋាភិបាលរបស់លោកគ្មានចេតនានឹងបន្តធ្វើជំនួញជាមួយប្រទេសកុម្មុយនិស្ត ដូចជាចិន និងប្រេស៊ីល។ ដោយមិននិយាយចំឈ្មោះ លោក Javier Milei ប្រធានាធិបតីប្រេស៊ីល លោកលូឡា ផ្ញើសារអបអរជ័យជំនះរបស់បេក្ខជន និងថា ប្រេស៊ីលត្រៀមខ្លួនធ្វើការជាមួយបងប្អូនអាហ្សង់ទីន។
មានអាយុ ៥៣ឆ្នាំ និងជាអ្នកជំនាញសេដ្ឋកិច្ច លោក Javier Milei បានប្រមូលសំឡេងឆ្នោតគាំទ្រដល់ទៅ ៥៥,៩% វ៉ាដាច់ គូប្រជែងដែលជាអតីតរដ្ឋមន្រ្តីសេដ្ឋកិច្ច ដែលទទួលបានសំឡេងតែ ៤៤%។ ទើបប្រលូកចូលក្នុងនយោបាយអាហ្សង់ទីន បាន៣ឆ្នាំ លោក Javier Mileiអាចទទួលជ័យជំនះ នៅក្នុងការបោះឆ្នោតជុំទី២ ដោយមកពីមានការគាំទ្ររបស់គណបក្សស្តាំនិយម ដែលបរាជ័យធ្លាក់ទឹក នៅក្នុងការបោះឆ្នោតជុំទី១។
នៅអាហ្សង់ទីនដែលស្ថិតក្រោមការដឹកនាំរបស់រដ្ឋាភិបាលកណ្តាល ឆ្វេងនិយម ជាង១ទសវត្សរ៍ ជ័យជំនះរបស់លោក Javier Milei ដែលជាបេក្ខជនថ្មីស្រឡាង និងមាននិន្នាការសេរី ស្តាំនិយមជ្រុល សបញ្ជាក់ពីការធុញទ្រាន់ នឿយណាយរបស់ប្រជាជន នៅក្នុងប្រទេសមួយដែលអត្រាអតិផរណាកើនឡើងខ្ពស់កប់ពពក ១៤៣% ក្នុងមួយឆ្នាំៗ ចំណែកប្រជាជន៤០% រស់នៅក្នុងភាពក្រីក្រ។
ដោយបោះឆ្នោតជ្រើសរើសលោក Javier Milei ឲ្យធ្វើជាប្រធានាធិបតី ប្រជាជនអាហ្សង់ទីនដាក់ក្តីសង្ឃឹមលើមេដឹកនាំថ្មីដែលធ្លាប់ប្រកាសសន្យាកសាងអាហ្សង់ទីនឡើងវិញ ដើម្បីក្លាយជាប្រទេសសេរី និងមហាអំណាចដូចអាមេរិក។
ប៉ុន្តែ អាហ្សង់ទីនក្រោមការដឹកនាំរបស់លោក Javier Milei ដែលជាអ្នកនយោបាយប្រឆាំងនឹងប្រព័ន្ធរៀបចំសង្គមបានបណ្តាលឲ្យមានការចោទសួរផងដែរ ពីសមត្ថភាពដឹកនាំរបស់រដ្ឋាភិបាលថ្មីរបស់អាហ្សង់ទីន។ ជាប់ឈ្មោះជាបេក្ខជនដែលចូលចិត្តលើកបង្ហាញ ម៉ាស៊ីនអារ នៅក្នុងពេលចុះឃោសនាបោះឆ្នោត លោក Javier Milei ធ្លាប់បានប្រកាសថា លោកនឹងកាត់តម្រឹមចោលគ្រប់ការចំណាយ ឲ្យដូចម៉ាស៊ីនអារដើមឈើ ដែលលោកមាននៅក្នុងដៃ។ នៅក្នុងវីដេអូឃោសនាកាលពីពេលថ្មីៗនេះ លោក Javier Mileiធ្លាប់អះអាងថា នៅពេលឈ្នះឆ្នោត ក្លាយជាប្រធានាធិបតី លោកនឹងលុបចោល ក្រសួងជាច្រើន ដូចជា ក្រសួងទេសចរណ៍ ក្រសួងវប្បធម៌ បរិស្ថាន និងការអភិវឌ្ឍ ក្រសួងការងារ ក្រសួងដឹកជញ្ជូន ក្រសួងសុខាភិបាល និងក្រសួងកិច្ចការនារី ជាដើម ដោយទុកតែក្រសួងការពារជាតិ ក្រសួងមហាផ្ទៃ ក្រសួងការបរទេស និងក្រសួងយុត្តិធម៌តែប៉ុណ្ណោះ។
តាំងខ្លួនជាជនសេរី មូលធននិយម លោក Javier Milei ធ្លាប់បង្ហាញចេតនាចង់ឈប់ប្រើលុយជាតិ ដោយងាកទៅប្រើលុយដុល្លារអាមេរិកជំនួសវិញ កាត់បន្ថយការចំណាយសាធារណៈ ហាមស្រ្តីមិនឲ្យរំលូតកូន ការលក់អាវុធដោយសេរី ដូចនៅអាមេរិក និងកាត់ផ្តាត់ទំនាក់ទំនងការទូតជាមួយប្រទេសកុម្មុយនិស្ត ចិន និងប្រេស៊ីល។
ប៉ុន្តែ គោលនយោបាយរុះរើកសាងអាហ្សង់ទីនឡើងវិញ របស់លោក Javier Mileiនឹងពិបាកចេញជារូបរាង ព្រោះយ៉ាងណាក៏ដោយ លោក Javier Mileiគ្មានសំឡេងភាគច្រើន នៅព្រឹទ្ធសភា និងខ្វះសំឡេងគាំទ្រពីអភិបាលខេត្ត នៅក្នុងអនាគតរដ្ឋាភិបាលចម្រុះរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ