ចិនសម្ពោធ ដាក់ឲ្យប្រើប្រាស់ជាផ្លូវការ នាវាផ្ទុកយន្តហោះចម្បាំងទី២
កងទ័ពជើងទឹកចិន កាលពីថ្ងៃអង្គារម្សិលមិញ បានទទួលយកទៅប្រើប្រាស់ នាវាផ្ទុកយន្តហោះចម្បាំង នៅក្រោមអធិបតីភាពរបស់ប្រធានាធិបតីចិន ស៊ី ជីនពីង។ ផលិតឡើង ដោយ បច្ចេកវិទ្យាក្នុងស្រុកចិនសុទ្ធសាធ នាវាផ្ទុកយន្តហោះចម្បាំង ឈ្មោះ ស្ហានតុង Shandong ជានាវាផ្ទុកយន្តហោះចម្បាំងទី២ ដែលប្រទេសចិន មានសម្រាប់បំពាក់ឲ្យកងទ័ពជើងទឹករបស់ខ្លួន។
ចុះផ្សាយនៅថ្ងៃ៖
ស្តាប់ - ០៣:០៨
ពិធីប្រគល់នាវាផ្ទុកយន្តហោះចម្បាំងស្ហានតុង Shandong ធ្វើឡើងយ៉ាងអធិកអធមបំផុត នៅក្រោមអធិបតីភាពរបស់លោកប្រធានាធិបតី ស៊ី ជីនពីង នៅមូលដ្ឋានកងទ័ពជើងទឹក ចិន សាន់យ៉ាSanya ភាគខាងត្បូង កោះ ហៃណាន់។ ខេត្តកោះ ហៃណាន់ដែលស្ថិតនៅក្នុងសមុទ្រចិនខាងត្បូង ជាទីដែលចិន កំពុង មានជម្លោះដណ្តើមទឹកដីកោះ ជាមួយប្រទេសវៀតណាម ហ្វីលីពីន តៃវ៉ាន់ និងព្រុយណេ។
ចាប់តាំងពីឆ្នាំ ២០១២ ប្រទេសចិន មាននាវាផ្ទុកយន្តហោះចម្បាំង តែមួយគ្រឿងប៉ុណ្ណោះ ដែលផលិតឡើងដោយ សហភាពសូវៀត ប៉ុន្តែដែលចិនបានទិញ ពីអ៊ុយក្រែន យកមកកែច្នៃ ប្រើឡើងវិញ។ ជានាវាផ្ទុកយន្តហោះចម្បាំង ទី ២ របស់ចិន នាវាស្ហានតុង ដែលអាចដឹកយន្តហោះចម្បាំង ប្រមាណ ៤០គ្រឿង ត្រូវបានផលិតឡើងដោយស្នាដៃ បច្ចេកវិទ្យាចិន ទាំងស្រុង។
ដោយដាក់ឲ្យប្រើប្រាស់ជាផ្លូវការ នូវនាវាផ្ទុកយន្តហោះចម្បាំង មួយគ្រឿងបន្ថែមទៀត ចិនបានបង្ហាញមហិច្ឆតាយោធា នៅក្នុងបរិបទដែលកំពុងកើតមានភាពតានតឹងជាមួយ តៃវ៉ាន់ សហរដ្ឋអាមេរិក ហើយនិងជម្លោះជាមួយ ប្រទេសអាស៊ី នៅសមុទ្រចិនខាងត្បូង។ កាលពីវិច្ឆិកាកន្លងទៅ ទីក្រុងប៉េកាំងបានទទួលស្គាល់ថា ខ្លួនបានបញ្ជូននាវាផ្ទុកយន្តហោះចម្បាំង ស្ហានតុង ទៅក្បែរកោះតៃវ៉ាន់ ក្នុងក្របខ័ណ្ឌ សមយុទ្ធអចិន្រ្តៃយ៍របស់កងទ័ពជើងទឹកចិន។ សម្រាប់អ្នកជំនាញ (ប្រធានវិទ្យាស្ថានចិននៃសាលាសិក្សាពីភាគខាងកើត និងអាហ្រ្វិក ក្នុងទីក្រុងឡុងដ៍) នៅពេលចិន មានចំនួន នាវាផ្ទុកយន្តហោះកាន់តែច្រើន ប្រព័ន្ធការពារយោធារបស់កោះតៃវ៉ាន់ កាន់តែចុះខ្សោយ។
មាននាវាដឹកយន្តហោះចម្បាំង ដែលអនុញ្ញាតឲ្យចិនអាចបើកប្រតិបត្តិការយោធា នៅទីកន្លែងឆ្ងាយៗ ចិនបានចូលរួមក្នុងក្លិបប្រទេស ដែលមាននាវាផ្ទុកយន្តហោះចម្បាំង ដូចជាអាមេរិក បារាំង អង់គ្លេស និងរុស្ស៊ីជាដើម។ ប៉ុន្តែ តាមតួលេខផ្តល់ដោយវិទ្យាស្ថានការសិក្សាយុទ្ធសាស្រ្ត IISS ដោយនាំមុខបារាំង អង់គ្លេស រុស្ស៊ី ឥណ្ឌា ដែលមាននាវាដឹកយន្តហោះចម្បាំងតែមួយគ្រឿង ម្នាក់ៗ ចិន មាននាវាផ្ទុកយន្តហោះចម្បាំង ដល់ទៅ២គ្រឿង និងមានគម្រោងចង់សាងសង់ ១គ្រឿងបន្ថែមទៀត។ អតីត ប្រមុខកងទ័ពចិន លោក Luo Yuan ធ្លាប់បានប្រកាសថា ដើម្បី ការពារផលប្រយោជន៍ជាយុទ្ធសាស្រ្តរបស់ខ្លួន ចិនត្រូវការយ៉ាងហោច នាវាផ្ទុកយន្តហោះចម្បាំង ៣គ្រឿង។
កាលពីខែកក្កដាកន្លងទៅ ប្រទេសចិនបានបង្ហាញផែនការកសាង ធ្វើទំនើបកម្មបច្ចេកវិទ្យាជាន់ខ្ពស់ឲ្យកងទ័ពរបស់ខ្លួន។ បន្ទាប់ពីអាមេរិក ចិនជាមហាអំណាចយោធាធំទី២ ក្នុងលោក ដែលបានចំណាយថវិកា ប្រមាណ ១៧ម៉ឺនលានដុល្លារ សម្រាប់វិស័យកងទ័ព ឆ្នាំ ២០១៩។
ទោះចិនមានគម្រោង ចង់បង្កើនចំនួននាវាផ្ទុកយន្តហោះចម្បាំង ឲ្យដល់៣គ្រឿង ចិននៅតែស្ថិតនៅក្រោយ ឆ្ងាយណាស់ពីអាមេរិក ដែលមានរួចទៅហើយ នាវាផ្ទុកយន្តហោះចម្បាំង ទំនើបៗ ដល់ទៅ១១គ្រឿង។ សម្រាប់អ្នកវិភាគ ចិននៅមិនទាន់អាចប្រកួតប្រជែងជាមួយអាមេរិក ទាំងផ្នែកចំនួន និង សមត្ថភាព បច្ចេកវិទ្យា។ គេវាយតម្លៃថា នាវាផ្ទុកយន្តហោះចម្បាំងទី២ ដែលចិន កសាងឡើងដោយបច្ចេកវិទ្យាចិន សុទ្ធសាធ ដើរដោយប្រព័ន្ធថាមពលរុញច្រានធម្មតា ប៉ុន្តែ មិនមែន ដើរដោយថាមពលនុយក្លេអ៊ែរដូចនាវាផ្ទុកយន្តហោះចម្បាំងរបស់ប្រទេសដទៃនោះទេ។ មួយវិញទៀត វាអាចងាយនឹងរងការវាយប្រហារ ដោយមីស៊ីលរបស់នាវាមុជទឹករបស់សត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ