តុលាការជប៉ុនចេញដីកាចាប់ខ្លួន ភរិយាលោកការឡូស ហ្គោន
នៅថ្ងៃអង្គារទី ៧ មករា ២០២០ អាយ្យការជប៉ុន បានប្រកាសថា ខ្លួនទើបបានទទួលដីការឲ្យតាមចាប់ ភរិយា របស់លោកការឡូស ហ្គោន គឺលោកស្រី ការ៉ូល ហ្គោន ដែលអាជ្ញាធរជប៉ុនចោទថា បានផ្តល់សក្ខីកម្មក្លែងក្លាយ នៅក្នុងសំណុំរឿងចោទប្រកាន់ ស្វាមីរបស់លោកស្រី។ តុលាការជប៉ុនចេញដីការ តាមចាប់ភរិយារបស់ ការឡូស ហ្គោន ធ្វើឡើង នៅក្រោយ អតីតអគ្គនាយកក្រុមហ៊ុនរថយន្ត រឺណូ នីសាន់ បានលួចរត់គេចខ្លួនពីប្រទេសជប៉ុន ទៅកាន់ប្រទេស លីបង់ កាលពីថ្ងៃទី ២៩ ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
នៅក្នុងសេចក្តីថ្លែងការណ៍ របស់អាយ្យការជប៉ុន លោកស្រី ការ៉ូល ហ្គោន ភរិយារបស់លោកការឡូស ហ្គោន ត្រូវជាប់សង្ស័យថា បានផ្តល់ព័ត៌មានមិនពិត ទៅកាន់តុលាការជប៉ុន កាលពីខែ មេសា ឆ្នាំមុន។ នៅក្នុងការសួរដេញដោលរបស់ចៅក្រមស៊ើបអង្កេត លោកស្រី ការ៉ូល ហ្គោន បានអះអាងប្រាប់តុលាការជប៉ុនថា លោកស្រី មិនបានស្គាល់ ឬមានទំនាក់ទំនង ជាមួយ មនុស្សធ្វើការនៅក្រុមហ៊ុនឯកជនមួយ ដែលមាននាទី ទទួលប្រាក់ខែពីក្រុមហ៊ុននីសាន់ ម៉ូទ័ មុននឹងបង្វែរ ផ្ទេរទៅកាន់គណនីធនាគាររបស់លោកការឡូស ហ្គោន។
អាយ្យការជប៉ុនវិញ សង្ស័យថា លោកស្រី ការ៉ូល មានទំនាក់ទំនងផ្ទាល់ជាមួយជនជាប់សង្ស័យផ្សេងទៀត បន្ទាប់ពីក្រុមអ្នកស៊ើបអង្កេតបានរឹបអូស ទូរស័ព្ទ និងលិខិតឆ្លងដែនមួយច្បាប់របស់លោកស្រី កាលពីខែមេសា កន្លងទៅ។
រងការចោទប្រកាន់ចំនួន ៤ បទល្មើស ដែលនៅក្នុងនោះ មានការកេងបន្លំ មិនប្រកាសប្រាក់ខែ ដើម្បីគេចមិនបង់ពន្ធរដ្ឋ ហើយនិងការរំលោភសេចក្តីទុកចិត្ត លោកការឡូស ហ្គោន អតីតអគ្គនាយកក្រុមហ៊ុនរឺណូ នីសាន់ ធ្លាប់ត្រូវបានតុលាការ ជប៉ុន ចាប់ឃាត់ខ្លួនជាង ៤ខែ មុននឹងត្រូវដោះលែង ឲ្យនៅក្រៅឃុំបណ្តោះអាសន្ន ប៉ុន្តែ ត្រូវស្ថិត នៅទីក្រុងតូក្យូ ក្នុងពេលរង់ចាំសវនាការ។ ប៉ុន្តែ លោកការឡូស ហ្គោន ដែលមានសញ្ជាតិដល់ទៅ ៣ប្រទេស និងកាន់លិខិតឆ្លងដែន បារាំង បានលួចរត់ គេចខ្លួនពីប្រទេសជប៉ុន ទៅកាន់លីបង់ កាលពីចុងខែ ធ្នូកន្លងទៅ។ នៅក្នុងសារTwitter ដែលលោក បង្ហោះផ្សាយ នៅក្រោយទៅដល់ប្រទេសលីបង់ លោកការឡូស ហ្គោន បានអះអាងថា លោកមិនបានលួចគេចពីសំណាញ់ច្បាប់ទេ ប៉ុន្តែ រត់គេចចេញ ពីប្រព័ន្ធតុលាការជប៉ុនដ៏អយុត្តិធម៌។
អ្នកនាំពាក្យរបស់ប្តីប្រពន្ធត្រកូលហ្គោន បានចាត់ទុក ដីការចាប់ខ្លួន ភរិយារបស់លោកការឡូស ហ្គោន ថា ជារឿងគួរឲ្យសង្វេគ ព្រោះថា លោកស្រី ការ៉ូល ធ្លាប់បានស្ម័គ្រចិត្ត ទៅផ្តល់សក្ខីកម្មផ្ទាល់ នៅទីក្រុងតូក្យូ ជាទី រាជអាជ្ញាជប៉ុន បានសម្រេច មិនចាប់ដាក់ឃុំលោកស្រីទេ កាលពីខែមេសា ឆ្នាំមុន។
នៅប្រទេសលីបង់វិញ ជាទីដែលលោកការឡូស ហ្គោន កំពុងស្ថិតនៅ និងត្រៀមធ្វើសន្នីសិទកាសែត នៅថ្ងៃ ពុធនេះ រដ្ឋមន្រ្តីយុត្តិធម៌លីបង់អះអាងថា គេបានទទួលរួចហើយ និវេទក្រហមពីប៉ូលិសអាំងទែរប៉ូល ក្នុងការតាមចាប់ខ្លួន លោកការឡូស ហ្គោន ប៉ុន្តែ គ្មានទេ ដីការចាប់ខ្លួន លោកស្រី ការ៉ូល ភរិយារបស់លោកការឡូសហ្គោន។ ទៅតាមនិវេទក្រហម ប្រទេសដែលពាក់ព័ន្ធត្រូវចាប់ឃុំខ្លួនបណ្តោះអាសន្ន ជនល្មើស ក្នុងពេលរង់ចាំការធ្វើបត្យាប័ន។ អាជ្ញាធរលីបង់ រហូតមក មិនដែលធ្វើបត្យាប័ន ចាប់បញ្ជូនចេញ ជនជាតិរបស់ខ្លួនម្នាក់ណាទេ។
នៅក្នុងសេចក្តីថ្លែងការណ៍កាលពីថ្ងៃអង្គារក្រសួងយុត្តិធម៌លីបង់បានបញ្ជាក់សាជាថ្មីថា លោកការឡូស ហ្គោន ជាជនជាតិលីបង់ ដែលមានសិទ្ធិទទួលបានការយកចិត្តទុកដាក់ដូចប្រជាជនលីបង់ទូទៅ។ ម្យ៉ាងទៀត ការវិលត្រលប់ចូលទឹកដីលីបង់ របស់លោកការឡូស ហ្គោន ធ្វើឡើងដោយស្របច្បាប់។ ឯកអគ្គរាជទូតជប៉ុនប្រចាំលីបង់វិញ បានអំពាវនាវសុំឲ្យប្រធានាធិបតីលីបង់ សហការជាមួយតុលាការជប៉ុន ដើម្បី រក្សាទំនាក់ទំនង ល្អជាមួយ ទីក្រុងតូក្យូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ