ថៃ៖តុលាការបានផ្តល់ភ្លើងខៀវឲ្យក្រុមហ៊ុនអាកាសចរណ៍ Thai Airways ផ្តើមធ្វើកំណែទម្រង់
នៅថ្ងៃចន្ទ ទី១៤ កញ្ញា តុលាការថៃបានផ្តល់ភ្លើងខៀវឲ្យក្រុមហ៊ុនអាកាសចរណ៍ Thai Airways ផ្តើមធ្វើកំណែទម្រង់ស៊ីជ្រៅ។ ផែនការកំណែទម្រង់នេះជាសំណើរបស់ក្រុមហ៊ុន Thai Airway ដែលកំពុងមានប្រាក់បំណុលដល់ទៅ ៩ ០០០លានអឺរ៉ូ។ តាមរយៈគម្រោងកំណែទម្រង់មួយនេះ ក្រុមហ៊ុន Thai Airway ដែលប្រើបុគ្គលិកជាង ២០ ០០០នាក់នឹងពិនិត្យមើលឡើងវិញលើចំនួនបុគ្គលិក និងកាត់បន្ថយជើងហោះហើរដែលភាគច្រើនជាជើងហោះហើរអន្តរជាតិ។ គួររម្លឹកថា អស់ជាច្រើនឆ្នាំកន្លងមកដែលក្រុមហ៊ុន Thai Airway បានរកស៊ីខាត តែការខាតបង់មានកាន់តែធ្ងន់ធ្ងរខ្លាំងនៅក្នុងសម័យជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០២:៣៣
ផែនការកំណែទម្រង់ដែល Thai Airway ត្រៀមធ្វើភ្លាមជាបន្ទាន់នាពេលខាងមុខ គឺស្វែងរកប្រាក់កម្ចីចំនួន ១ ៥០០លានអឺរ៉ូសម្រាប់ការចំណាយទូទៅ និងបើកប្រាក់ខែឲ្យបុគ្គលិក នេះបើតាមព័ត៌មានចុះផ្សាយដោយកាសែតក្នុងស្រុក។ បន្ទាប់មកនៅប៉ុន្មានឆ្នាំខាងមុខ គម្រោងកំណែទម្រង់ផ្តើមគិតគូរពីការដំឡើងប្រាក់ទុនជាង ២ ០០០លានដុល្លារ។ តែស្របពេលនឹងការដំឡើងប្រាក់ទុន ក្រុមហ៊ុនផ្តើមកាត់បន្ថយចំនួនបុគ្គលិកដែលសព្វថ្ងៃមានជាង ២០ ០០០នាក់ និងកាត់បន្ថយចំនួនជើងហើរហោះដែលភាគច្រើនជាជើងហោះហើរអន្តរជាតិ។ តែដើម្បីអាចផ្តើមកំណែទម្រង់នេះបាន Thai Airway ត្រូវបញ្ជូនផែនការកំណែទម្រង់លំអិតទៅឲ្យម្ចាស់បំណុល និងត្រូវមានការយល់ព្រមពីម្ចាស់បំណុល។
គួរបញ្ជាក់ថា ផែនការកំណែទម្រង់ដែលជាសំណើរបស់ Thai Airway ពេលនេះបានធ្វើឡើង បន្ទាប់ពីរដ្ឋបានកាត់បន្ថយភាគហ៊ុនរបស់ខ្លួន និងបន្ទាប់ពីក្រុមហ៊ុនអាកាសចរណ៍មួយនេះទើបបាត់បង់លក្ខន្តិកជាក្រុមហ៊ុនរដ្ឋ។ តាមពិតទៅ Thai Airway ដែលមានអាយុ ៦០ឆ្នាំ ក្នុងឆ្នាំ ២០២០ និងធ្លាប់ជាប់ចំណាត់ថ្នាក់ទី២ ជាក្រុមហ៊ុនប្រសើរជាងគេលើលោកក្នុងឆ្នាំ ២០០៧ បានរកស៊ីខាតអស់ជាច្រើនឆ្នាំ។ តែការខាតបង់រឹតតែធ្ងន់ ក នៅក្នុងសម័យកូវីដ-១៩ ដែលមានជាង ៧៥០លានអឺរ៉ូនៅឆមាសទី១ ឆ្នាំ ២០២០ ហើយបើសរុបទៅមកដល់ពេលនេះ Thai Airway មានបំណុលដល់ទៅ ៩ ០០០លានអឺរ៉ូ។
ហេតុអ្វីបានជា Thai Airway រកស៊ីខាត?។ មានចម្លើយច្រើនចំពោះសំណួរនេះដោយផ្តើមចេញពីការគ្រប់គ្រងមិនល្អ និងអំពើពុករលួយ ស៊ីសំណូកសូកប៉ាន់។ របាយការណ៍ស៊ើបអង្កេតមួយផ្សព្វផ្សាយជាសាធារណៈក្នុងខែសីហាបង្ហាញថា ប្រហែលមានការសូកប៉ាន់នៅពេលទិញយន្តហោះ Airbus ចំនួន ១០គ្រឿងកាលពីឆ្នាំ ២០០០ តម្លៃសំបុត្រយន្តហោះខ្លះនៅក្នុងវិក័យប័ត្រជាតម្លៃមិនពិត ពោលថោកជ្រុល ឬមួយក៏ឲ្យលុយច្រើនពេកសម្រាប់អ្នកធ្វើការលើសម៉ោង។ ការទទួលបានភ្លើងខៀវពីតុលាការឲ្យធ្វើកំណែទម្រង់ពេលនេះបានធ្វើឲ្យតម្លៃភាគហ៊ុន Thai Airway ស្ទុះឡើងជាង ១០%។
ទោះជាយ៉ាងនេះក្តី ចក្ខុវិស័យនៅបន្តស្រពិចស្រពិលសម្រាប់ Thai Airway ព្រោះវិបត្តិជំងឺកូវីដ-១៩ បានធ្វើឲ្យចរាចរណ៍ផ្លូវអាកាសក្នុងលោកជាប់គាំងសឹងតែទាំងស្រុង។ ក្រុមអ្នកជំនាញក្នុងវិស័យនេះបានមើលឃើញថា គេត្រូវរង់ចាំដល់ឆ្នាំ ២០២៤ ទើបចរាចរណ៍ផ្លូវអាកាសអាចត្រឡប់ទៅរកភាពប្រក្រតីដូចនៅមុនការផ្ទុះជំងឺកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ