អង្គការពាណិជ្ជកម្មពិភពលោក ថាពន្ធអាមេរិកលើទំនិញចិន មិនស្របនឹងវិធានពាណិជ្ជកម្មអន្តរជាតិ
ការដាក់ទណ្ឌកម្មចិនដោយយកពន្ធបន្ថែមពីលើទំនិញចិន ដែលដើមហេតុនៃសង្គ្រាមពាណិជ្ជកម្មរវាងមហាអំណាចទាំងពីរ ជាទង្វើមិនសមស្របទៅនឹងវិធានពាណិជ្ជកម្មអន្តរជាតិទេ។ នេះបើតាមការអារកាត់សេចក្តីរបស់អង្គការពាណិជ្ជកម្មពិភពលោក ដែលបានផ្តល់អនុសាសន៍ឱ្យសហរដ្ឋអាមេរិកសម្របខ្លួនតាមច្បាប់អន្តរជាតិ។
ចុះផ្សាយនៅថ្ងៃ៖
ស្តាប់ - ០២:០៧
នៅថ្ងៃអង្គារទី ១៥កញ្ញាម្សិលមិញ អង្គការពាណិជ្ជកម្មពិភពលោក បានផ្តល់សាលក្រម តបទៅនឹងបណ្តឹងរបស់ប៉េកាំង កាលពីឆ្នាំ២០១៨ ប្រឆាំងនឹងសហរដ្ឋអាមេរិកដែលបានសម្រេចយកពន្ធនាំចូលលើទំនិញចិន ក្នុងទំហំសរុប ជាង ២០០ ០០០លានដុល្លារ។
នៅក្នុងសេចក្តីសម្រេចកម្រាស៧២ទំព័រ អង្គការបានសន្និដ្ឋានថា វិធានការរបស់អាមេរិកចំពោះចិន មិនស្របនឹងវិធានពាណិជ្ជកម្មអន្តរជាតិទេ។ អង្គការបានលម្អិតទៀតថា សហរដ្ឋអាមេរិកមិនបានផ្តល់សេចក្តី បំភ្លឺ គ្រប់គ្រាន់ និងមូលហេតុសមស្រប ដែលត្រូវយកពន្ធបន្ថែមពីលើផលិតផលចិនទេ។ អាមេរិកគួរតែធ្វើអ្វីឱ្យត្រូវតាមច្បាប់និងកាតព្វកិច្ច។ តែអង្គការក៏បានលើកទឹកចិត្តឱ្យភាគីទាំងពីរ បន្តប្រឹងប្រែងរកដោះស្រាយរួម។
“ជាសេចក្តីសម្រេចដ៏ត្រឹមត្រូវ ! សង្ឃឹមថាអាមេរិកនឹងគោរពតាមយ៉ាងពេញលេញ សេចក្តីសម្រេច របស់ក្រុមអ្នកជំនាញអង្គការពាណិជ្ជកម្មពិភពលោក”។ នេះជាប្រតិកម្មរបស់ចិន តាមរយៈចេញសេចក្តីថ្លែងការណ៍របស់អ្នកនាំពាក្យក្រសួងពាណិជ្ជកម្ម។
សហរដ្ឋអាមេរិក ដែលចាត់ទុកអង្គការថាគ្មានសម្មត្ថភាពបញ្ចប់សកម្មភាពរកស៊ីខុសច្បាប់របស់ចិន ក៏បានចេញសេចក្តីថ្លែងការណ៍មួយភ្លាមដែរ “ថ្វីបើក្រុមអ្នកជំនាញ មានភស្តុតាងជាច្រើនពីអាមេរិក ស្តីពី សកម្មភាពលួចកម្មសិទ្ធិបញ្ញា របស់ចិន ហើយក៏ដោយ ក៏អង្គការពាណិជ្ជកម្មពិភពលោក នៅតែផ្តល់ឱកាសឱ្យអ្នកខុសទៀត”។
ភាគីទាំងពីរ អាចធ្វើឧទ្ធរណ៍ប្រឆាំងនឹងសេចក្តីសម្រេចនេះបាន ប៉ុន្តែអង្គការមិនអាចបំពេញការងារបានទេ ដោយគ្មានចៅក្រមគ្រប់គ្រាន់។ ហើយម្យ៉ាងទៀត សម្រាប់រដ្ឋបាលលោកដូណាល់ ត្រាំ អង្គការពាណិជ្ជកម្ម លម្អៀង គ្មានសមត្ថភាព។ សហរដ្ឋអាមេរិកបានទាមទារឱ្យរំលាយរៀបចំអង្គការឡើងវិញ និងបានគំរាមដកខ្លួនចេញពី អង្គការនេះ ព្រមទាំងបានខ្ទប់ តាំងពីខែធ្នូមក មិនឱ្យមានការតែងតាំងចៅក្រមទេ។ ក្នុងពេលរង់ចាំ ចិន ព្រមទាំងបណ្តាប្រទេសជាសមាជិកផ្សេងទៀត មានអាទិ៍សហភាពអឺរ៉ុប បានដាក់ឱ្យដំណើរការតុលាការបណ្តោះអាសន្នមួយ គ្រាន់ដោះស្រាយវិវាទពាណិជ្ជកម្មអន្តរជាតិផ្សេងៗ។
អង្គការពាណិជ្ជកម្មមិនបានចេញស្តីអ្វីទាក់ទងនឹងសេចក្តីសម្រេចចិត្តរបស់ចិនដំឡើងពន្ធលើទំនិញអាមេរិកទេ ព្រោះអាមេរិកមិនបានប្តឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ