ហុងកុងប្តឹងជំទាស់អាមេរិកដែលទាមទារឲ្យផលិតផលហុងកុង ដាក់ឈ្មោះចិន
អាជ្ញាធរហុងកុង នៅថ្ងៃអង្គារម្សិលមមិញ បានផ្តើមនីតិវិធីតវ៉ា នៅអង្គការពាណិជ្ជកម្មពិភពលោក ដើម្បី ប្រឆាំងនឹងការសម្រេចរបស់អាមេរិក ដែលទាមទារឲ្យរាល់ផលិតផលទាំងអស់របស់ហុងកុង នាំចូលទៅអាមេរិក ត្រូវដាក់ស្លាកសញ្ញា ផលិតនៅប្រទេសចិន។ នៅពាក់កណ្តាលខែកក្កដា ប្រធានាធិបតី អាមេរិក លោកដូណាល់ ត្រាំ បានចេញក្រឹត្យ បិទបញ្ចប់លក្ខន្តិកៈពិសេស សម្រាប់ហុងកុង នៅបន្ទាប់ពី ប៉េកាំង ប្រកាសអនុវត្តច្បាប់សន្តិសុខជាតិ នៅទីក្រុងហុងកុង។
ចុះផ្សាយនៅថ្ងៃ៖
ស្តាប់ - ០២:៣២
ដោយបិទបញ្ចប់លក្ខន្តិកៈពិសេសសម្រាប់ ហុងកុង វ៉ាស៊ីនតោនសម្រេចចាត់ទុកថា អំណើះតទៅ ទីក្រុងហុងកុង គ្រាន់តែជាទីក្រុងមួយទៀត របស់ប្រទេសចិន ដែលមិនគួរបានអភ័យឯកសិទ្ធិពិសេសពីអាមេរិកនោះទេ។ នៅខែសីហា ពោល គឺនៅ មួយខែក្រោយការប្រកាសរបស់លោកដូណាល់ ត្រាំ បិទបញ្ចប់លក្ខន្តិកៈពិសេស ដែលហុងកុងតែងបានទទួលការអនុគ្រោះកន្លងមក ស្ថាប័នពន្ធដារអាមេរិកបានប្រកាសថា ដើម្បីអាចដាក់លក់នៅអាមេរិក រាល់ ទំនិញ ហុងកុង ដែលនាំចូលទៅអាមេរិក ត្រូវតែដាក់ស្លាកសញ្ញា ថា ផលិតនៅប្រទេសចិន។
សម្រាប់រដ្ឋមន្រ្តីពាណិជ្ជកម្មហុងកុង ការសម្រេចដោយឯកតោភាគី និងគ្មានការទទួលខុសត្រូវរបស់អាមេរិក ដើម្បីបំបាក់ទីក្រុងហុងកុង ឲ្យចុះខ្សោយ គឺជារឿងដែលមិនសមរម្យនោះទេ។ មួយវិញទៀត វិធានការរបស់អាមេរិកនឹងធ្វើឲ្យមានការយល់ច្រលំនៅទីផ្សារ និងជាពិសេស ប្រមាថមើលងាយ ច្បាប់ ដែលផ្អែក លើប្រព័ន្ធពហុពាណិជ្ជកម្ម។
ដោយសារហេតុផលនេះ ហុងកុង ដែលជាសមាជិកមួយរបស់អង្គការពាណិជ្ជកម្មពិភពលោកបានសម្រេចផ្តើមនីតិវិធី ដើម្បីដោះស្រាយជម្លោះ ជាមួយអាមេរិកតាមផ្លូវច្បាប់។ នៅថ្ងៃអង្គារ អង្គការពាណិជ្ជកម្មពិភពលោកបានសម្រេចដឹងលឺ បណ្តឹងរបស់ហុងកុង និងបានអនុញ្ញាត ឲ្យភាគីជម្លោះទាំងពីរ បើកការពិភាក្សាគ្នា ជាផ្លូវការ។ ជារួម អាមេរិកមានពេល រហូតដល់១ខែ ដើម្បីចរចា ជាមួយហុងកុង។ ប៉ុន្តែ ក្នុងករណី អាមេរិកមិនឆ្លើយតប ឬ ការចរចាមិនបានឈានដល់ការចុះសម្រុងគ្នា នោះ សំណុំរឿង ផលិត នៅហុងកុង ត្រូវបញ្ជូន ទៅក្រុមអ្នកជំនាញ ដែលមានបន្ទុកដោះស្រាយជម្លោះពាណិជ្ជកម្ម។
បណ្តឹងរបស់ហុងកុង ទៅអង្គការពាណិជ្ជកម្មពិភពលោក ធ្វើឡើង នៅមុនពេលដែលវិធានការរបស់អាមេរិកដែលតម្រូវឲ្យទំនិញហុងកុង ដាក់ស្លាកសញ្ញា ផលិតនៅប្រទេសចិន ត្រូវចូលជាធរមាន ចាប់ពីថ្ងៃទី១០វិច្ឆិកាខាងមុខ។
កន្លងមក ទាំងចិន និងអាជ្ញាធរហុងកុង ធ្លាប់អះអាងថា ទណ្ឌកម្មរបស់អាមេរិក នឹងមិនជះឥទ្ធិពលអាក្រក់ ដល់ សកម្មភាពធ្វើជំនួញ នៅហុងកុង ដែលជាមជ្ឈមណ្ឌលហិរញ្ញវត្ថុអន្តរជាតិដ៏សំខាន់នោះទេ។ សម្រាប់អាជ្ញាធរហុងកុង ទំនិញហុងកុង ដែលនាំចូលទៅអាមេរិក មានប្រមាណ តែ ៤៨០លានដុល្លារប៉ុណ្ណោះ ពោល គឺមិនដល់ ១ភាគរយ នៃផលិតផលនាំចេញសរុបរបស់ហុងកុងផង។
សូមបញ្ជាក់ថា អង្គការពាណិជ្ជកម្មពិភពលោក ដែលត្រូវបង្កើតឡើង នៅឆ្នាំ ១៩៩៥ មានស្ថាប័នទទួលបន្ទុកដោះស្រាយជម្លោះ ជាអ្នកទទួលបណ្តឹង និងជាអ្នកកាត់ក្តីនៅក្នុងជម្លោះពាណិជ្ជកម្មរវាងប្រទេសសមាជិក។ ប៉ុន្តែ ស្ថាប័នអន្តរជាតិមួយនេះ បានកា្លយជាផ្ទាំងស៊ីបនៃការវាយប្រហាររបស់លោកត្រាំដែលបានចោទប្រកាន់អង្គការពាណិជ្ជកម្មពិភពលោកថា លំអៀងទៅរកចិន និងតែងកាត់ក្តី ឲ្យអាមេរិកចាញ់ ច្រើនជាងឈ្នះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ