តុលាការចិនកាត់ទោស មេឈ្មួញជួញដូរភ្លុកដំរី ឲ្យជាប់ពន្ធនាគារ អស់មួយជីវិត
ទើបមានជាលើកទី១ នៅប្រទេសចិន មនុស្ស១៧នាក់ ត្រូវបានតុលាការក្រុងក្វាងចូវ ផ្តន្ទាទោសធ្ងន់ធ្ងរ ពីបទ ជួញដូរភ្លុកដំរី និងស្នែងរមាស ចូលទឹកដីចិន។ តាមសេចក្តីប្រកាសរបស់តុលាការ នៅ សប្តាហ៍នេះ មនុស្ស ២នាក់ ដែលជាមេក្លោងនៃបណ្តាញ ជួញដូរសត្វព្រៃខុសច្បាប់ ត្រូវកាត់ទោស ឲ្យជាប់ពន្ធនាគារអស់មួយជីវិត។
ចុះផ្សាយនៅថ្ងៃ៖ កែប្រែថ្ងៃទី៖
មនុស្សទាំង ១៧នាក់ដែល ត្រូវតុលាការក្រុងក្វាងចូវ សម្រេចដាក់ទោសដ៏ធ្ងន់ នៅសប្តាហ៍នេះ ជាសមាជិករបស់បណ្តាញជួញដូរ ភ្លុកដំរី ដ៏ធំ ដែលអាជ្ញាធរ ចិនទើបបំបែក ចាប់បាន។ ពួកគេមានចំណែកចូលរួម ក្នុងការជួញដូរខុសច្បាប់ ភ្លុកដំរី ប្រមាណ ២០តោន ពីឆ្នាំ ២០១៣ ដល់ឆ្នាំ ២០១៨។ ទំនិញភ្លុកដំរី ដែលមានតម្លៃ សរុប ១២៥លានអឺរ៉ូ និងមានប្រភពមកពីប្រទេសនីហ្សេរីយ៉ា និងប្រទេសមួយចំនួនទៀត ត្រូវបានដឹកឆ្លងកាត់សិង្ហបុរី និងកូរ៉េខាងត្បូង មុននឹងត្រូវលួចលាក់ នាំចូលទៅប្រទេសចិន។
តាមសេចក្តីប្រកាសរបស់តុលាការ នៅថ្ងៃព្រហស្បតិ៍ នេះជាការជួញដូរភ្លុកដំរី ដ៏ធំមិនធ្លាប់មានចាប់តាំងពីការកកើត សាធារណរដ្ឋប្រជាមានិតចិន នៅ ឆ្នាំ ១៩៤៩។
នៅក្នុងចំណោមពួកឈ្មួញ១៧នាក់ មាន១៥ នាក់ ត្រូវកាត់ទោស ឲ្យជាប់ពន្ធនាគារ ពី២ ទៅ ១៥ឆ្នាំ សម្រាប់បទចោទប្រកាន់ ជួញដូរខុសច្បាប់ ភ្លុក និងស្នែងរមាស។ ចំណែក ២នាក់ ដែលជាមេក្លោង របស់បណ្តាញជួញដូរ ភ្លុកដំរី ត្រូវទទួលទោសធ្ងន់ជាងគេ រហូតដល់ជាប់ពន្ធនាគារមួយជីវិត។
សម្រាប់លោកមេធាវី Li Zongsheng ដែលជំរុញ ឲ្យមានការពង្រឹងច្បាប់តឹងតែង ដើម្បីការពារសត្វព្រៃ ការដាក់ទោសឧក្រិដ្ឋជនជួញដូរសត្វព្រៃ ខុសច្បាប់ ឲ្យជាប់ពន្ធនាគារអស់មួយជីវិត ជារឿងមិនធ្លាប់មាននៅប្រទេសចិន។ កន្លងមក ឈ្មួញជួញដូរសត្វព្រៃ ដែលទទួលសារភាពកំហុស ត្រូវផ្តន្ទាទោសឲ្យជាប់ពន្ធនាគារ ពី ៥ទៅ ១០ឆ្នាំតែប៉ុណ្ណោះ។ ការផ្តន្ទាទោសឈ្មួញខុសច្បាប់ឲ្យជាប់ពន្ធនាគារអស់មួយជីវិត អាចជាសារមួយបង្ហាញថា អាជ្ញាធរចិន ពិតជាចង់លុបបំបាត់ ចោល ការជួញដូរភ្លុក ដំរី ខុសច្បាប់ ក្នុងប្រទេស។
ប្រទេសចិនធ្លាប់ជាទីផ្សារភ្លុកសត្វដំរី ធំជាងគេក្នុងពិភពលោក បានចាប់ហាមឃាត់មិនឲ្យនាំចូលភ្លុកដំរី នៅចុងឆ្នាំ ២០១៧។ តាមអង្គការការពារសត្វព្រៃ WWF សត្វដំរី ប្រមាណ ២ម៉ឺនក្បាល ត្រូវគេសម្លាប់ ក្នុងមួយឆ្នាំៗ ដើម្បីយកភ្លុក នៅមុនច្បាប់ហាមឃាត់របស់ប្រទេសចិន។ ការបិទទីផ្សារនៅប្រទេសចិន អាចកាត់បន្ថយបានខ្លះ ប៉ុន្តែ ការជួញដូរនៅតែមាន សម្រាប់ ផ្គត់ផ្គង់ទីផ្សារងងឹត និងទីផ្សារ បរទេស ដូចជានៅជប៉ុន ថៃ និងវៀតណាម ជាទីដែលប្រជាជនចិន ជីវភាព មធ្យមស្វែងរក ទិញ វត្ថុធ្វើពីភ្លុកដំរី ដូចជា ត្រា ចង្កឹះ ឬ រូបព្រះ សម្រាប់ការសន្សំទុក សមុច្ច័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ