អ្នកជំនាញថាយន្តហោះដឹកអ្នកដំណើរឥណ្ឌូណេស៊ីមានភាពមិនប្រក្រតីមុនពេលជួបគ្រោះថ្នាក់
យន្តហោះដឹកអ្នកដំណើររបស់ឥណ្ឌូណេស៊ីត្រូវបានគេរកឃើញថាមានបញ្ហាជាច្រើនពាក់ព័ន្ធនឹងប្រព័ន្ធបិទបើក។ យន្តហោះចំណាស់វ័យ ២៦ ឆ្នាំនេះទទួលការជួសជុលច្រើនដងមុននឹងជួបគ្រោះថ្នាក់ធ្លាក់ចូលសមុទ្ទ និងបាននាំយកទៅជាមួយផងដែរនូវជីវិតអ្នកដំណើរសរុបទាំងអស់ ៦២ នាក់ កាលពីមួយខែមុន។ យ៉ាងណាក៏ដោយ ក្រុមអ្នកស៊ើបអង្កេតបាននិយាយនៅថ្ងៃពុធ ទី១០ កុម្ភៈ ថា មូលហេតុពិតប្រាកដនៃការធ្លាក់យន្តហោះនៅតែមិនទាន់អាចកំណត់បាននៅឡើយទេ។
ចុះផ្សាយនៅថ្ងៃ៖
ស្តាប់ - ០២:០៦
ដំណើរការខុសប្រក្រតីនៃប្រព័ន្ធត្រួតពិនិត្យម៉ាស៊ីនយន្តហោះ របស់ក្រុមហ៊ុនអាកាសចរណ៍ស្រីវីចាយ៉ា (Sriwijaya Air) ត្រូវបានគូសបញ្ជាក់នៅក្នុងរបាយការណ៍ស៊ើបអង្កេតបឋមមួយស្តីពីការធ្លាក់យន្តហោះកាលពីខែមុន ពោលគឺធ្លាក់កាលពីថ្ងៃទី៩ មករា ឆ្នាំ២០២១។
យន្ដហោះវ័យ ២០ ឆ្នាំផ្លាយរបស់ឥណ្ឌូណេស៊ីបានធ្លាក់ចុះកម្ពស់ប្រមាណ ៣ពាន់ម៉ែត្រ ចូលក្នុងទឹកសមុទ្ទជ្វា ក្រោយហោះហើរចេញពីទីក្រុងហ្សាការតាបានរយៈពេលតែ ៤ នាទីប៉ុណ្ណោះ។ រហូតមកទល់នឹងពេលនេះ ក្រុមអ្នកមុជទឹកនៅតែព្យាយាមស្វែងរកឧបករណ៍ថតសំឡេងដែលមានបំពាក់ក្នុងយន្តហោះដើម្បីជួយដល់ដំណើរការស៊ើបអង្កេតឲ្យឆាប់ទទួលបានលទ្ធផល។
ដោយឡែក នៅថ្ងៃពុធ ទី១០ កុម្ភៈ ក្រុមអ្នកស៊ើបអង្កេតបាននិយាយថា ពួកគេកំពុងតាមដានស៊ើបអង្កេតពីប្រព័ន្ធបិទបើកស្វ័យប្រវត្តិ នៅពេលដែលពួកគេចេញផ្សាយលទ្ធផលស៊ើបអង្កេតបណ្តោះអាសន្ន និងថាមូលហេតុដែលបណ្តាលឲ្យយន្តហោះធ្លាក់ក៏អាចជាកំហុសរបស់មនុស្សដែរ។
យោងទៅតាមលទ្ធផលស៊ើបអង្កេតដដែលខាងលើ បុគ្គលិកយន្តហោះឥណ្ឌូណេស៊ីរបស់ក្រុមហ៊ុនអាកាសចរណ៍ស្រីវីចាយ៉ាបានឲ្យដឹងថាប្រព័ន្ធបិទបើកស្វ័យប្រវត្តិនេះត្រូវបានជួលជុលជាច្រើនដង មុនយន្តហោះជួបគ្រោះថ្នាក់ធ្លាក់ចូលសមុទ្ទ។
លោកនួរកាយូ អ៊ុតូម៉ូ (Nurcahyo Utomo) អ្នកស៊ើបអង្កេតម្នាក់របស់គណៈកម្មាធិការគ្រប់គ្រងផ្នែកសុវត្ថិភាពដឹកជញ្ជូនជាតិឥណ្ឌូណេស៊ីបានមានប្រសាសន៍ថា ផ្នែកខាងឆ្វេងនៃប្រព័ន្ធម៉ាស៊ីនបិទបើកបានធ្វើដំណើរថយក្រោយយ៉ាងខ្លាំង ខណៈប្រព័ន្ធម៉ាស៊ីនផ្នែកខាងស្តាំវិញនៅជាប់ជាំង គ្មានចលនាអ្វីទាំងអស់។
យ៉ាងណាក៏ដោយ លោកថា អាជ្ញាធរឥណ្ឌូណេស៊ី នៅមិនទាន់អាចសន្និដ្ឋានអ្វីបាននៅឡើយទេ ជុំវិញមូលហេតុដែលអាចបណ្តាលឲ្យមានបញ្ហាខុសធម្មតាបែបនេះ។ ហើយដើម្បីអាចកំណត់ពីមូលហេតុនៃការធ្លាក់យន្តហោះ អាជ្ញាធរឥណ្ឌូណេស៊ី កំពុងបន្តការស៊ើបអង្កេតយ៉ាងស្វិតស្វាញ និងដោយមានការចូលរួមផងដែរពីក្រុមការងារមកពីក្រុមប្រឹក្សាសុវត្ថិភាពដឹកជញ្ជូនជាតិសហរដ្ឋអាមេរិក រួមជាមួយនឹងបុគ្គលិកមកពីក្រុមហ៊ុនប៊ូអ៊ីង និងរដ្ឋបាលអាកាសចរណ៍សហព័ន្ធអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ