ឥណ្ឌូណេស៊ី និងម៉ាឡេស៊ី ទាមទារឲ្យអាស៊ានកោះប្រជុំបន្ទាន់ដើម្បីនិយាយពីអំពើហិង្សានៅភូមា
ពីមួយថ្ងៃទៅមួយថ្ងៃ ភូមាកាន់តែលង់ខ្លួនទៅក្នុងវិបត្តិនយោបាយដែលកើតចេញមកពីរដ្ឋប្រហារយោធា ទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី។ នៅថ្ងៃសៅរ៍នេះ បាតុករដើម្បីប្រជាធិបតេយ្យភូមា នៅតែបន្តចុះថ្នល់ ធ្វើបាតុកម្ម និងប្តេជ្ញារួចហើយថា ពួកគេនឹងបន្តតស៊ូរហូតដល់ដំណាក់កាលចុងក្រោយ ទោះមានការបង្ក្រាបសម្លាប់មនុស្សពីសំណាក់កងទ័ពភូមា។ អំពើហិង្សាសម្លាប់បាតុករភូមាបានធ្វើឲ្យប្រទេសសមាជិកអាស៊ានមួយចំនួន ដូចជា ឥណ្ឌូណេស៊ី និងម៉ាឡេស៊ី ចេញមុខ ថ្កោលទោស និងជំរុញឲ្យមានការកោះប្រជុំបន្ទាន់ ដើម្បី និយាយពី វិបត្តិនៅភូមា។
ចុះផ្សាយនៅថ្ងៃ៖
ប្រទេសសមាជិកអាស៊ានដែលប្រកាន់ទម្លាប់មិនលូកដៃចូលកិច្ចការផ្ទៃក្នុងរបស់ប្រទេសសមាជិកដទៃទៀត នៅទីបំផុតបានបញ្ចេញ សំឡេងរបស់ខ្លួន ទាក់ទងនឹងអំពើហិង្សានៅប្រទេសភូមា។ នៅថ្ងៃសុក្រ ប្រធានាធិបតីឥណ្ឌូណេស៊ី បានចេញមុខ ទាមទារឲ្យគេស្តារឡើងវិញ លទ្ធិប្រជាធិបតេយ្យ សន្តិសុខ និងបិទបញ្ចប់អំពើហិង្សា នៅភូមា។
លោកប្រធានាធិបតីឥណ្ឌូណេស៊ី ហ្សូកូ វីដូដូអះអាងដែរថា លោកនឹងទាក់ទងទៅព្រះចៅ ស៊ុលតង់ ព្រុយណេ ដែលជាប្រធានផ្លាស់វេនអាស៊ាននៅឆ្នាំនេះ ឲ្យកោះប្រជុំបន្ទាន់ដើម្បីនិយាយពីបញ្ហានៅភូមា។
នាយករដ្ឋមន្រ្តីម៉ាឡេស៊ី លោក Muhyiddin Yassin វិញបានថ្លែងថា លោកគាំទ្រឲ្យអាស៊ានកោះប្រជុំបន្ទាន់ ព្រោះថា ម៉ាឡេស៊ី និងសហគមន៍អាស៊ានមិនអាចឱបដៃ ឈរមើលប្រទេសបងប្អូនជិតខាងរង្គោះរង្គើ ជួបអស្ថិរភាព ដោយសារតែកណ្តាប់ដៃរបស់មនុស្សមួយក្រុមតូចនោះទេ។ មនុស្សមួយក្រុមតូចដែលគិតតែចង់ ចម្រើនផលប្រយោជន៍ផ្ទាល់ខ្លួន។ នេះបើតាមប្រសាសន៍របស់លោកនាយករដ្ឋមន្រ្តីម៉ាឡេស៊ី។
ចាប់តាំងពីកងទ័ពធ្វើរដ្ឋប្រហារចូលកាន់អំណាចនៅភូមា ភូមាបានធ្លាក់ខ្លួនកាន់តែឯកោរ ចំណែកកងទ័ពភូមាជាប់ រងទណ្ឌកម្មកាន់តែច្រើនពី ប្រទេសលោកខាងលិច។ បន្ទាប់ពីអាមេរិក សម្រេចដាក់ទណ្ឌកម្មសេដ្ឋកិច្ច ទៅលើមេដឹកនាំទ័ពភូមា សហភាព អឺរ៉ុប ត្រូវប្រកាសនៅថ្ងៃចន្ទ សប្តាហ៍ក្រោយ បញ្ជីឈ្មោះ មេទ័ពភូមា ១១រូបដែលត្រូវជាប់ទណ្ឌកម្មរបស់អឺរ៉ុប ដោយសារ បានចូលរួម បង្រ្កាប ទៅលើបាតុករស៊ីវិល នៅភូមា។
តាមប្រភពមន្រ្តីទូតអឺរ៉ុប ដែលដកស្រង់ដោយទីភ្នាក់ងារព័ត៌មានបារាំង AFP សហភាពអឺរ៉ុបនឹងចាត់វិធានការផងដែរ ដើម្បី រឹតបន្តឹងផលប្រយោជន៍សេដ្ឋកិច្ចផ្ទាល់ខ្លួនរបស់សមាជិករបបសឹកភូមា។
អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរក៍បានសរសេរសារទ្វីតនៅថ្ងៃសៅរ៍នេះ ទាមទារឲ្យអន្តរជាតិ ចាត់វិធានការខ្លាំង និងរួមគ្នាមួយដើម្បី ដោះស្រាយវិបត្តិភូមា។ សម្រាប់អគ្គលេខាធិការអង្គការសហប្រជាជាតិ ការសម្លាប់បាតុករសន្តិភាព គ្មានអាវុធក្នុងដៃ ការចាប់ខ្លួនមនុស្សក្រៅផ្លូវច្បាប់ ដែលនៅក្នុងនោះមានផងដែរ អ្នកកាសែត ឯករាជ្យ គឺជារឿងដែលគេមិនអាចទទួលយកបាននោះទេ។
អ្នកកាសែតភូមា ម្នាក់ ដែលធ្វើការឲ្យទូរទស្សន៍ អង់គ្លេសBBC ត្រូវបានទាហានភូមាចាប់ឃាត់ខ្លួន ចំណែក អ្នកនាំពាក្យរបស់គណបក្សរបស់លោកស្រី អ៊ុងសាន ស៊ូជី ក៏ត្រូវទាហានចាប់ឃុំខ្លួនដែរ នៅថ្ងៃសុក្រ។ តាមអ្នកសម្របសម្រួលរបស់អង្គការសហប្រជាជាតិ ប្រចាំនៅភូមា យ៉ាងតិចមនុស្សជាង ២៤០០នាក់ ត្រូវអាជ្ញាធរភូមាចាប់ខ្លួនចំណែកតុល្យការជនរងគ្រោះស្លាប់ដោយសារការបង្រ្កាប និងអំពើហិង្សា របស់កងទ័ពភូមា បានកើនឡើងដល់ យ៉ាងតិច ២៣០នាក់ គិតចាប់តាំងពីថ្ងៃធ្វើរដ្ឋប្រហារនៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ