អ្នកជំនាញ៖ភេរវកម្មនៅឥណ្ឌូណេស៊ីមិនមែនជាសញ្ញាកើនឡើងនៃចលនាអ៊ីស្លាមជ្រុលនិយមទេ
នៅក្នុងប្រទេសឥណ្ឌូណេស៊ី មួយថ្ងៃក្រោយការវាយប្រហារភេរវកម្មអត្តឃាតប្រឆាំងនឹងវិហារសាសនាកាតូលិកមួយក្នុងខេត្តស៊ូឡាវ៉េស៊ីនាប៉ែកខាងកើតប្រទេសមក ប៉ូលិសបានប្រកាសពីអត្តសញ្ញាណរបស់សពភេរវជនដែលមានបុរសម្នាក់ និងស្រ្តីម្នាក់ ហើយជនដៃដល់ទាំងពីរនាក់នេះជាសមាជិករបស់ចលនាអ៊ីស្លាមជ្រុលនិយមឈ្មោះ Jamaah Ansharut Daulah ដែលមានទំនោររកអង្គការរដ្ឋអ៊ីស្លាម។ សូមរម្លឹកថា ភេរវជនអត្តឃាតទាំងពីរនាក់បានជិះម៉ូតូសំដៅទៅក្លោងទ្វារវិហារ រួចទាញបំផ្ទុះគ្រាប់បែបជាប់នឹងខ្លួនគេនៅពេលដែលក្រុមគ្រិស្តបរិស័ទកំពុងដើរចេញពីវិហារ។ តែសំណាងល្អ មានតែអ្នករងរបួសយ៉ាងតិច ២០នាក់។ ប្រធានាធិបតីឥណ្ឌូណេស៊ីលោកយ៉ូកូ វីដូដូបានថ្លែងថា ភេរវកម្មជាឧក្រិដ្ឋកម្មប្រឆាំងមនុស្សជាតិ និងបានអំពាវនាវឲ្យទាំងអស់គ្នាប្រឆាំងនឹងភេរវកម្ម និងមនោគមន៍វិជ្ជាជ្រុលនិយម។ ដោយឡែក លោករ៉េមី ម៉ាឌីនីយេ អ្នកស្រាវជ្រាវបារាំង និងជាអ្នកជំនាញប្រវត្តិសាស្រ្តអ៊ីស្លាមឥណ្ឌូណេស៊ីបានយល់ឃើញថា ការវាយប្រហារប្រភេទនេះមិនមែនជាសញ្ញានៃកំណើនចលនាអ៊ីស្លាមនិយមជ្រុលនៅឥណ្ឌូណេស៊ីទេ។
ចុះផ្សាយនៅថ្ងៃ៖
« គេបានមើលឃើញជារួមថានៅដើមទសវត្ស ២០០០ ឥណ្ឌូណេស៊ីបានទទួលរងនូវរលកវាយប្រហារភេរវកម្មក្នុងទ្រង់ទ្រាយធំគួរឲ្យកត់សម្គាល់។ តែតាំងពីពេលនោះមក ចំនួនការវាយប្រហារភេរវកម្មបានធ្លាក់ចុះយ៉ាងខ្លាំង។ ក្រុមចលនាជ្រុលនិយមបានចុះខ្សោយ ចំនួនសមាជិកក៏មានកាន់តែតិចឡើង រចនាសម្ព័ន្ធក៏មិនសូវមានការរៀបចំល្អ ហើយតាក់តិចនៃការវាយប្រហារក៏មិនសូវមានប្រសិទ្ធិភាពប៉ុន្មានដែរ។
ទន្ទឹមគ្នានេះ កម្លាំងប៉ូលិសតែងបានទប់ស្កាត់មុន និងបង្ក្រាបបានមុនជានិច្ចនូវគម្រោងវាយប្រហារភេរវកម្ម។ បន្ទាប់មក ភេរវជនដែលបានរៀបចំគម្រោងវាយប្រហារភេរវកម្ម និងត្រៀមធ្វើសកម្មភាពក៏ត្រូវបានកម្លាំងប៉ូលិសចាប់ខ្លួន ឬមួយក៏បាញ់សម្លាប់ចោលតែម្តង។ ចំណាត់ការរបស់កម្លាំងប៉ូលិសទទួលបានការគាំទ្រពីប្រជាជន និងមានការចូលរួមពីប្រជាជន។
ការចាប់ខ្លួនភេរវជនធ្វើឡើង ក្រោយពីមានការរាយការណ៍របស់ប្រជាជន របស់អ្នកជិតខាង។ ដូច្នេះខ្ញុំអាចនិយាយបានថា ប្រជាជនគ្មានការអត់ឱនឲ្យចំពោះពួកជីហាតនៅឥណ្ឌូណេស៊ីទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ