តើនាវាមុជទឹកឥណ្ឌូណេស៊ីបានបាត់ខ្លួនទៅទីណា?
អាជ្ញាធរឥណ្ឌូណេស៊ីនៅបន្តរុករក នាវាមុជទឹករបស់ខ្លួន មួយគ្រឿង ដែលបានបាត់ខ្លួន កាលពីថ្ងៃពុធ ទី ២១ មេសា។ តាមអ្នកនាំពាក្យរបស់កងទ័ព ជើងទឹកឥណ្ឌូណេស៊ី នាវាមុជទឹក ដែលមាន ក្រុមធ្វើការ ចំនួន ៥៣នាក់ បានដាច់ការទាក់ទង នៅអំឡុងពេលធ្វើសមយុទ្ធយោធា នៅភាគខាងជើងកោះបាលី។ បារាំង អាមេរិក អូស្ត្រាលី បានជួយបេសកកម្ម រុករករបស់រដ្ឋាភិបាលឥណ្ឌូណេស៊ី ចំណែក សិង្ហបុរី និងម៉ាឡេស៊ី ប្រទេសជិតខាងឥណ្ឌូណេស៊ីត្រូវបញ្ជូន កប៉ាល់ជួយសង្រ្គោះ ទៅក្នុងតំបន់ទឹក ជាទីដែលនាវាមុជទឹកឥណ្ឌូណេស៊ី បាត់ខ្លួន កាលពីថ្ងៃពុធ។
ចុះផ្សាយនៅថ្ងៃ៖
ស្តាប់ - ០២:៥២
តើនាវាមុជទឹកឥណ្ឌូណេស៊ី បានបាត់ខ្លួនទៅណា? មានប្រវែង ជាង ៦០ម៉ែត្រ នាវាមុជទឹក ដែលផលិតឡើងនៅ ប្រទេសអាល្លឺម៉ង់ នៅឆ្នាំ ១៩៧៨ បានបាត់ខ្លួន ជាមួយ សមាជិក៥៣នាក់ កាលពី ថ្ងៃពុធ។ តាមមេបញ្ជាការកងទ័ពជើងទឹកឥណ្ឌូណេស៊ី នាវាមុជទឹក ឈ្មោះ KRI Naggala លេខ ៤០២ បានដាច់ការទាក់ទងជាមួយ កងទ័ពឥណ្ឌូណេស៊ី នៅពេល វាត្រូវសាកល្បង បាញ់គ្រាប់ នៅក្នុងសមយុទ្ធយោធា ក្បែរកោះបាលី។
ភ្លាមៗ ហ្សាកាតាបានបញ្ជូន នាវាចម្បាំង ទៅក្នុងតំបន់ទឹកដែលនាវាមុជទឹក លេខ ៤០២បានបាត់ខ្លួន។ នៅក្រោយ បញ្ជូននាវាមុជទឹក ២គ្រឿង នាវាចម្បាំង ៤គ្រឿង និងឧទ្ធម្ភាគចក្រមួយគ្រឿង ទៅកាន់កន្លែង ដែល គេកំណត់បានសញ្ញាចុងក្រោយរបស់ នាវាមុជទឹក លេខ ៤០២ កងទ័ពជើងទឹកឥណ្ឌូណេស៊ីបានអះអាង ថា គេបានរកឃើញ ដានប្រេងហៀរ នៅលើតំបន់ទឹកដែលស្ថិតនៅចម្ងាយ ៩៥គីឡូម៉ែត្រពីកោះបាលី។ នៅ ថ្ងៃព្រហស្បតិ៍ កប៉ាល់ និងក្រុមទាហានជួយសង្រ្គោះ ប្រមាណ ៤០០នាក់ ត្រូវបានបញ្ជូនបន្ទាន់ ទៅកាន់តំបន់ទឹក ដែលគេសង្ស័យថា នាវាមុជទឹកបាត់ខ្លួន។
បាត់ខ្លួនដោយសារបញ្ហាបច្ចេកទេស ឬដោយសារការវាយប្រហារពីខាងក្រៅ?
តាមអ្នកនាំពាក្យរបស់របស់កងទ័ពជើងឥណ្ឌូណេស៊ី ប្រេងហៀរចេញ អណ្តែតលើទឹក អាចជាសញ្ញាថា នាវាមុជទឹក អាចមានបញ្ហា លេចធ្លាយធុងប្រេង ឬមួយជាសញ្ញាទាញអាសន្ន ដែលក្រុមធ្វើការក្នុងនាវាមុជទឹក បញ្ជូនចេញមកក្រៅ។ នៅក្នុងពេលគេមិនទាន់ដឹងពីមូលហេតុដែលធ្វើឲ្យនាវាមុជទឹក បាត់ខ្លួន ឥណ្ឌូណេស៊ី ខ្នះខ្នែង ដៃជើង ស្វែងរកនាវាមុជទឹក ដើម្បី ជួយសង្រ្គោះ បុគ្គលិកធ្វើការ ក្នុងនោះ ឲ្យបានមុន ពេលខ្យល់អុកស៊ីសែន ត្រូវដាច់អស់ នៅព្រឹកថ្ងៃសៅរ៍ស្អែក។ មេបញ្ជាការកងទ័ពជើងទឹកឥណ្ឌូណេស៊ីឯណោះវិញ និយាយថា នាវាមុជទឹក អាចស្ថិតក្នុងជម្រៅទឹក ៧០០ម៉ែត្រ។
អ្នកជំនាញបរទេសខាងកងទ័ពជើងទឹក គ្មានសុទិដ្ឋិនិយមនោះទេ។ សម្រាប់អ្នកជំនាញ អូស្ត្រាលី ខាងទាហានជើងទឹក ស្ថិតក្នុងជម្រៅទឹក ៧០០ម៉ែត្រ លទ្ធភាពជួយសង្រ្គោះជីវិតមនុស្សក្នុងនាវាមុជទឹក ស្តួចស្តើងខ្លាំងណាស់។ មេបញ្ជាការរងកងទ័ពជើងទឹកបារាំង លោក Antoine Beaussant បាននិយាយប្រាប់ទីភ្នាក់ងារព័ត៌មានបារាំង AFP ថា ដើម្បីអាធានាថា បុគ្គលិកក្នុងនាវាមុជទឹក អាចនៅ មានជីវិត ប្រភេទនាវាមុជទឹកឥណ្ឌូណេស៊ី អាចចុះក្នុងជម្រៅទឹក ២៥០ម៉ែត្រប៉ុណ្ណោះ។ ប៉ុន្តែ បើសិន វាធ្លាក់ចុះជ្រៅរហូតដល់ ទៅ ៧០០ម៉ែត្រ មានឱកាសច្រើនណាស់ ដែលថា នាវាមុជទឹក អាចប្រេះបាក់ ជាពីរ ដោយសារសម្ពាធទឹកសមុទ្រ។ នៅ ក្នុងបទសម្ភាសន៍ជាមួយ ទូរទស្សន៍ អូស្ត្រាលី ABC រដ្ឋមន្រ្តីការបរទេសឥណ្ឌូណេស៊ីបាននិយាយថា រដ្ឋាភិបាលមានក្តីបារម្ភខ្លាំងពីអាយុជីវិត របស់អ្នកធ្វើការនៅក្នុងនាវាមុជទឹក។ នេះជាស្ថានភាពអាសន្ន សម្រាប់ទាំងគ្រួសាររបស់ពួកគេ ហើយនិងសម្រាប់ កងទ័ពជើងទឹកឥណ្ឌូណេស៊ី។
នេះជាលើកទី១ ដែលឥណ្ឌូណេស៊ី ជួបប្រទះ បញ្ហា បាត់នាវាមុជទឹក។ ឥណ្ឌូណេស៊ី ដែលជាភាគីមួយនៃជម្លោះដណ្តើមដែនទឹកនៅ សមុទ្រចិនខាងត្បូង បានពង្រឹង សមត្ថភាព កងទ័ពជើងទឹករបស់ខ្លួន នៅប៉ុន្មានឆ្នាំចុងក្រោយនេះ តាមរយៈ ការបំពាក់នាវាមុជទឹក ៦គ្រឿង ឲ្យកងទ័ពរបស់ខ្លួន ដែលនៅក្នុងនោះ ៥គ្រឿងផលិតនៅអាល្លឺម៉ង់ និងមួយគ្រឿងទៀតនៅ កូរ៉េខាងត្បូង។ នាវាមុជទឹក៤០២ដែលបាត់ខ្លួន នៅថ្ងៃពុធ ជានាវាមុជទឹកផលិត នៅអាល្លឺម៉ង់ នៅឆ្នាំ ១៩៧៨ មុននឹងត្រូវជួសជុល កែលម្អ ធ្វើទំនើបកម្ម ២ដង ដោយកងទ័ពជើងទឹកឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ