នាវាមុជទឹកឥណ្ឌូណេស៊ីលិច រកឃើញបំណែកខ្លះលើផ្ទៃទឹក
នាវាមុជទឹកឥណ្ឌូណេស៊ី ដែលបានបាត់ខ្លួន តាំងពី ថ្ងៃពុធ ទី ២១មេសា ជាមួយនាវិក៥៣នាក់ បានលិច ក្នុងបាតសមុទ្ទជម្រៅប្រមាណ៧០០ម៉ែត្រ។ នេះបើតាមការអះអាងរបស់មេបញ្ជាការកងទ័ពជើងទឹកឥណ្ឌូណេស៊ី នៅថ្ងៃសៅរ៍ទី ២៤មេសា ២០២១ ដោយបញ្ជាក់ថាក្រុមអ្នកសង្គ្រោះបានរកឃើញបំណែកនាវាច្រើន។
ចុះផ្សាយនៅថ្ងៃ៖
ស្តាប់ - ០២:៣០
ក្រុមយោធាដែលកំពុងធ្វើប្រតិបត្តិការស្វែងរកនាវាមុជទឹក KRI Nanggala ដែលគេទាក់ទងលែងបានតាំងពីថ្ងៃពុធទី ២១មេសា បានរកឃើញបំណែករបស់នាវានេះជាច្រើនដុំ ក្នុងនោះ ខ្លះជាបំណែកនៃគ្រឿងក្នុងនាវាផង មានជាអាទិ៍ បំណែកប្រព័ន្ធបាញ់ ដបខ្លាញ់រំអិលសម្រាប់ប្រព័ន្ធកែវឆ្លុះ ឬកំរាលសម្រាប់នាវិកអង្គុយសូត្រធម៌ ... មានន័យថានាវាមុជទឹករងការខូចខាតធ្ងន់ធ្ងរ។ បំណែកខ្លះមិនអាចខ្ទាតចេញមកក្រៅ ដោយគ្មានសម្ពាធពីខាងក្រៅ ឬដោយគ្មានការខូចខាតប្រព័ន្ធបាញ់ទេ។ នេះបើតាមការគូសបញ្ជាក់របស់អ្នកនាំពាក្យនៃទីបញ្ជាការដ្ឋានកងទ័ពជើងទឹកឥណ្ឌូណេស៊ី នៅក្នុងសន្និសីទកាសែត។
តាមរយៈការរកឃើញបំណែកនេះ ឥណ្ឌូណេស៊ី បានសន្និដ្ឋានថានាវាមុជទឹកបាត់ខ្លួនទំនងជាបានលិច នៅក្នុងបាតសមុទ្ទជម្រៅប្រមាណពី ៧០០ទៅ៨០០ម៉ែត្រ ដែលជាកំរិតជ្រៅជ្រុល ជាងសមត្ថភាពរបស់នាវា។ តាមក្បួន នាវាមុជទឹកនេះ អាចចុះទឹកបានត្រឹមជម្រៅ ៣០០ទៅ ៤០០ម៉ែត្រតែប៉ុណ្ណោះ និង មិនអាចទ្រទ្រង់នឹងសម្ពាធទឹកបានទេ នៅធ្លាក់ដល់ជម្រៅជាងនេះ។ ដូច្នេះគេមិនសង្ឃឹមថានាវិកទាំង៥៣នាក់ អាចនៅមានអាយុជីវិតបានទេ។ ម្យ៉ាងទៀត ជោគវាសនារួចជីវិតមានកាត់តែតិចតួចខ្លាំង ព្រោះនាវាមានបំរុងអុកស៊ីហ្សែនសម្រាប់តែ៧២ម៉ោងប៉ុណ្ណោះ ដើម្បីសង្គ្រោះជីវិតក្នុងករណីនាវាត្រូវដាច់ភ្លើង។ ប៉ុន្តែឥលូវហួសម៉ោងបាត់ទៅហើយ។
អ្នកនាំពាក្យដដែលបានអះអាងជាថ្មីថានាវាមុជទឹកដែលផលិតនៅឆ្នាំ១៩៧៨ និងដែលឥណ្ឌូណេស៊ីបានទទួលនៅឆ្នាំ១៩៨១ មានដំណើរល្អការ។ តែអាជ្ញាធរដដែលនេះ មិនបានពន្យល់អំពីមូលហេតុដែលអាចកើតមាននៅក្នុងនាវាមុជទឹកនោះទេ ហើយក៏មិនឆ្លើយបញ្ជាក់ដែរថាហេតុអ្វីបាននាវាមានផ្ទុកនាវិកលើចំណុះដល់ទៅ៥៣នាក់ មិនមែនជាង៤០នាក់ដូចកំណត់។
នាវាមុជទឹកឥណ្ឌូណេស៊ីពុំធា្លប់រងជួបគ្រោះថ្នាក់ធ្ងន់ធ្ងរដូច្នេះទេពីមុនមក។ ប៉ុន្តែគ្រោះថ្នាក់លិចបាត់នាវាមុជទឹកស្លាប់នាវិក មានកើតឡើងច្រើនមកហើយនៅក្នុងប្រទេសផ្សេង។ កាលពីឆ្នាំ២០០០ នាវាមុជទឹកបំពាក់នុយក្លេអ៊ែររុស្ស៊ីបានលិច ពេលកំពុងធ្វើសមយុទ្ធ បណ្តាលឱ្យនាវិក១១៨នាក់ស្លាប់។ កាលពីឆ្នាំ២០១៧ នាវាមុជទឹកអាហ្សង់ទីនមានផ្ទុកនាវិក៤៤នាក់ បានបាត់ខ្លួនឈឹង ក្រោយពីបើកចេញចាកពីឆ្នេរបានចម្ងាយ៤០០គីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ