ជប៉ុនបន្តភាពអាសន្នកូវីដ១៩ ពលករស្ម័គ្រចិត្តអូឡាំពិកសុំលាលែងកាន់តែច្រើនឡើងៗ
ភាពអាសន្នដែលកំពុងចូលធរមាននាពេលនេះ នឹងត្រូវពន្យារពេលរហូតដល់ថ្ងៃទី ២០មិថុនា ពោលគឺតែមួយខែគត់មុនការបើកកម្មវិធីប្រកួតកីឡាអូឡាំពិក។ នេះបើតាមសេចក្តីប្រកាសរបស់នាយករដ្ឋមន្ត្រីជប៉ុននៅថ្ងៃសុក្រទី ២៨ ឧសភា។ ស្ថានភាពកូវីដ១៩មិនធូរស្បើយ បានជំរុញឱ្យក្រុមស្ម័គ្រចិត្តបម្រើក្នុងកម្មវិធីអូឡាំពិក ព្រួយបារម្ភខ្លាំង និងនាំគ្នា បាននាំលាលែងពីការងារ កាន់តែច្រើនឡើងៗ។
ចុះផ្សាយនៅថ្ងៃ៖
ស្តាប់ - ០២:២៤
“នៅតូក្យូ និងនៅអូសាកា ករណីឆ្លងកូវីដ១៩ថ្មីបានចាប់ថយចុះហើយ តាំងពីពាក់កណ្តាលខែឧសភាមក ប៉ុន្តែស្ថានភាពនៅមិនប្រាកដទេ” នេះជាប្រសាសន៍របស់ យូស្ហ៊ីហ៊ីដា ស៊ូហ្កា នាយករដ្ឋមន្ត្រីជប៉ុន បញ្ជាក់អំពីហេតុផលដែលរដ្ឋាភិបាលសម្រេចបន្តប្រកាសដាក់តំបន់ជាង១០ រាប់ទាំងតូក្យូមួយផង ក្នុងភាពអាសន្នរហូតថ្ងៃទី ២០មិថុនា។
ជាសរុប មួយភាគបីនៃប្រទេសជប៉ុនស្ថិតក្រោមភាពអាសន្ន។ ប៉ុន្តែវិធានការអាសន្នជប៉ុន មិនតឹងតែងខ្លាំងដូចបណ្តាប្រទេសដទៃនៅលើពិភពលោកទេ គឺមានត្រឹមតែជាបម្រាម ឱ្យ អាហារដ្ឋានភោជនីដ្ឋាន បាររង្គសាល ឆាប់បិទទ្វារ មុនម៉ោងកំណត់តែប៉ុណ្ណោះ។
ប៉ុន្តែការព្រួយបារម្ភនិងរិះគន់មានខ្លាំងជាពិសេស ចំពោះចំណាត់ការដ៏យឺតយ៉ាវខ្លាំង របស់រដ្ឋាភិបាលក្នុងយុទ្ធនាការចាក់ថ្នាំបង្ការ។ មកទល់ពេលនេះមានប្រជាពលរដ្ឋជប៉ុនមិនដល់២,៥%ផងបានទទួលវ៉ាក់សាំងគ្រប់ចំនួនពីរម្ជុល។ ជាងនេះទៅទៀត បើតាមការព្យាកររបស់អ្នកជំនាញ រលកចម្លងកូវីដ១៩លើកទីបួនអាចនឹងវាយបោកលើជប៉ុនយ៉ាងពេញអំណាច នៅពាក់កណ្តាលខែកក្កដា។ ពាក់កណ្តាលខែកក្កដា គឺត្រូវចំពេលដែលតូក្យូត្រូវទទួលរៀបចំកម្មវិធីប្រកួតកីឡាអូឡាំពិកតែម្តង។ មានន័យថាពេលនោះ មន្ទីរពេទ្យអាចនឹងត្រូវចង្អៀត ខ្វះគ្រែ ខ្វះកម្លាំង និងមិនអាចទទួលគ្រប់អ្នកជំងឺមកព្យាបាលបានទេ។
ក្តីព្រួយបារម្ភនេះកំពុងរីកធំធាត់ជាលំដាប់ និងបានជំរុញឱ្យអ្នកធ្វើការស្ម័គ្រចិត្តចាប់សុំលាលែងពីតួនាទី។ ក្រៅពីគ្មានអ្វីមកធានាអះអាងអ្នកធ្វើការស្ម័គ្រចិត្តនឹងបានទទួលការព្យាបាលយ៉ាងត្រឹមត្រូវក្នុងករណីឆ្លងហើយធ្លាក់ខ្លួនឈឺកូវីដ១៩ គ្មានទេពន្លឺនៃសង្ឃឹមថាពួកគេអាចនឹងទទួលបានថ្នាំវ៉ាក់សាំងនាពេលឆាប់ៗ។
ក្រុមការងារស្ម័គ្រចិត្តបានបន្ទោសអ្នករៀបចំកម្មវិធីថាមើលស្រាលស្ថានភាពដ៏ធ្ងន់ធ្ងរដែលបណ្តាលមកពីកូវីដ១៩។ សារព័ត៌មានជប៉ុនក៏បានចុះផ្សាយយ៉ាងព្រោងព្រាតដែរ ក្រុមការងារស្ម័គ្រចិត្តគ្មានថ្នាំបង្ការជាជនរងគ្រោះទីមួយ ប្រសិនកម្មវិធីកីឡាក្លាយជាប្រភពមហន្តរាយសុខភាពផ្ទុះកូវីដមែន។
តាមការពិត ជប៉ុនមិនសូវរងគ្រោះខ្លាំងដោយកូវីដ១៩ទេ។ គិតចាប់តាំងពីវិបត្តិរាតត្បាតសកលបានផ្ទុះឡើង ជប៉ុនមានអ្នកឆ្លងកូវីដសរុបជាង ៧សែន២ម៉ឺន៧ពាន់នាក់ និងស្លាប់ជាង១២៥០០នាក់ ក្នុងចំណោមប្រជាជនសរុប១២៦លាននាក់។ រដ្ឋាភិបាលជប៉ុនសន្យាចាក់វ៉ាក់សាំងជូនពលរដ្ឋអាយុលើសពី៦៥ឆ្នាំទាំងអស់យ៉ាងយូរត្រឹមចុងខែកក្កដា និងមានជំនឿជាក់ថា ការប្រកួតកីឡាអូឡាំពិកនឹងប្រព្រឹត្តទៅដោយ “សុខ និងសុវត្ថិភាព”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ