ប្រមុខដឹកនាំហុងកុង៖ ប្រព័ន្ធផ្សព្វផ្សាយមិនត្រូវធ្វើវិទ្ធង្សនា បំផ្លិចបំផ្លាញរដ្ឋាភិបាលនោះទេ
ប៉ុន្មានថ្ងៃក្រោយ ប៉ូលិសហុងកុង ចូលឆែកឆេរ រឹបអូសសម្ភារៈ និង ចាប់ឃុំខ្លួន អ្នកទទួលខុសត្រូវ កាសែត Apple Daily ដែលគាំទ្រចលនាប្រជាធិបតេយ្យហុងកុង កំពុងប្រឈមនឹងការបិទទ្វារទាំងស្រុង នៅសប្តាហ៍នេះ។ នៅថ្ងៃអង្គារទី ២២មិថុនានេះ ប្រមុខដឹកនាំហុងកុង លោកស្រី ការី ឡាំ បានចេញមុខការពារវិធានការផ្លូវច្បាប់ប្រឆាំង សារព័ត៌មាន Apple Daily និងថា ចំណាត់ការរបស់អាជ្ញាធរហុងកុងមិនបានសំដៅបិទខ្ទប់សិទ្ធិសេរីភាព សារព័ត៌មាន នៅហុងកុងនោះទេ។
ចុះផ្សាយនៅថ្ងៃ៖
ស្តាប់ - ០២:៤៥
៥ថ្ងៃក្រោយ អាជ្ញាធរចូលរឹបអូស និងចាប់ឃុំខ្លួន អ្នកទទួលខុសត្រូវរបស់កាសែត ប្រឆាំង Apple Daily ប្រមុខដឹកនាំហុងកុង លោកស្រី ការី ឡាំ បានចេញមុខ ការពារចំណាត់ការរបស់អាជ្ញាធរហុងកុង ថា មិនបានប៉ះពាល់ដល់សិទ្ធិសេរីភាពសារព័ត៌មាននៅហុងកុង ដូចការចោទប្រកាន់របស់ក្រុមប្រទេសលោកខាងលិច។
តាមមេដឹកនាំហុងកុង ដោយប្រើចំណាត់ការប្រឆាំង កាសែត Apple Daily អាជ្ញាធរ មិនបានសំដៅប្រឆាំង ការងាររបស់អ្នកកាសែត ធម្មតានោះទេ។ តាមលោកស្រី ការី ឡាំ Apple Daily កាសែតដែលចេញមុខ រិះគន់ មិនសំចៃមាត់ រដ្ឋអំណាចប៉េកាំង បានប៉ុនប៉ង ជាច្រើនលើក ចុះផ្សាយអត្ថបទដែលប៉ះពាល់ដល់សន្តិសុខជាតិរបស់ប្រទេសចិន។
សម្រាប់ប្រមុខដឹកនាំហុងកុង គេអាចរិះគន់រដ្ឋាភិបាលហុងកុង ដោយគ្មានបញ្ហា។ ប៉ុន្តែ បើសិនគេមានចេតនារៀបចំ សកម្មភាព ដែលញុះញង់ឲ្យមានវិទ្ធង្សនា ប្រឆាំងរដ្ឋាភិបាល នោះ គឺជារឿងផ្សេង។
អាមេរិក និងប្រទេសលោកខាងលិច មួយចំនួនបានប្រតិកម្មរិះគន់ និងចាត់ទុក ចំណាត់ការរបស់ប៉ូលិសហុងកុង ទៅលើកាសែត Apple Dailyថា កំពុងធ្វើឲ្យប៉ះពាល់ ដល់សិទ្ធសេរីភាពសារព័ត៌មាន និងមុខមាត់របស់ហុងកុង ដែលធ្លាប់ជាមជ្ឈមណ្ឌលហិរញ្ញវត្ថុអន្តរជាតិ ដ៏ល្បីឈ្មោះមួយ។
នេះជាលើកទី១ដែលអាជ្ញាធរហុងកុង ប្រើច្បាប់ការពារសន្តិសុខជាតិ ដើម្បី វាយប្រហារវិស័យសារព័ត៌មានហុងកុង។ ប៉ុន្តែ ប្រមុខដឹកនាំហុងកុងផ្ទាល់ បិទភ្នែក មើលមិនឃើញថា ចំណាត់ការរបស់អាជ្ញាធរ នឹងជំរុញឲ្យកាសែត Apple Daily ដែលជាកាសែតចេញមុខការពារលទ្ធិប្រជាធិបតេយ្យហុងកុង ត្រូវបិទទ្វារនោះទេ។
បន្ទាប់ពី អ្នកទទួលខុសត្រូវជាន់ខ្ពស់២នាក់ ត្រូវតុលាការចោទប្រកាន់ ពីបទ ឃុបឃិតជាមួយបរទេស ឬជាមួយចរន្តនៅក្រៅប្រទេស ដែលនាំគ្រោះថ្នាក់ដល់សន្តិសុខជាតិ នៅថ្ងៃចន្ទ បុគ្គលិកមួយចំនួន របស់កាសែត ចាប់ផ្តើម ប្រកាស បណ្តើរៗ កម្មវិធីផ្សាយចុងក្រោយ របស់ខ្លួន ដូចជា ការផ្សាយព័ត៌មានលើអ៊ីនធ័រនែត ព័ត៌មានហិរញ្ញវត្ថុ និងព័ត៌មានជាភាសាអង់គ្លេសជាដើម។ សម្រាប់ លោកMark Simon ទីប្រឹក្សា ឯកជនម្នាក់ របស់លោកជីមី ឡៃ មហាសេដ្ឋី និងជា ស្ថាបនិក កាសែត Apple Daily ដែលកំពុងជាប់ឃុំ ដោយសារបទចោទប្រកាន់ ជាច្រើន ទាក់ទងនឹងការរៀបចំបាតុកម្ម នៅហុងកុង នៅឆ្នាំ ២០១៩ គ្មានប្រាក់ខែ កាសែតត្រូវបិទទ្វារ។
សូមបញ្ជាក់ថា ក្រៅតែពីចូលរឹបអូសសម្ភារៈ និងចាប់ខ្លួនអ្នកទទួលខុសត្រូវ របស់កាសែត Apple Daily អាជ្ញាធរហុងកុង បានបង្កកប្រាក់ក្នុងធនាគារ របស់កាសែត។ នៅថ្ងៃចន្ទ ក្រុមប្រឹក្សាភិបាលរបស់ក្រុមហ៊ុន មេ Next Digital ដែលគ្រប់គ្រងពីលើកាសែត Apple Daily បានស្នើសុំឲ្យការិយាល័យ សន្តិសុខហុងកុង ឈប់បង្កកទ្រព្យសម្បត្តិ ដើម្បី អនុញ្ញាតឲ្យគេអាចបើកប្រាក់ខែបុគ្គលិកឡើងវិញ។ បើមិនដូច្នេះទេ កាសែត ត្រូវសម្រេចនៅថ្ងៃសុក្រចុងសប្តាហ៍នេះ ពីថ្ងៃ ចេញផ្សាយលេខចុងក្រោយ របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ