នូវែលសេឡង់បង្កើន៤ដង ប្រាក់ជំនួយអន្តរជាតិសម្រាប់ជួយប្រទេសដែលប្រឈមខ្លាំងនឹងបញ្ហាអាកាសធាតុ
១២ថ្ងៃមុនបើកសន្និសីទអន្តរជាតិស្តីពីអាកាសធាតុ ដែលត្រូវរៀបចំនៅប្រទេសអង់គ្លេស នាយករដ្ឋមន្រ្តីនូវែលសេឡង់បានប្រកាសបង្កើន ៤ដង ប្រាក់ជំនួយអន្តរជាតិសម្រាប់បញ្ហាអាកាសធាតុ។ នៅក្នុងសេចក្តីថ្លែងការណ៍កាលពីថ្ងៃចន្ទ ប្រមុខរដ្ឋាភិបាលនូវែលសេឡង់ លោកស្រី ងហ្សាស៊ីនដា អារឌែន បានប្រកាសផ្តល់ប្រាក់ជំនួយសម្រាប់ប្រទេសផ្សេងទៀត ដែលកំពុងប្រឈមខ្លាំងនឹងការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:១៥
ដើម្បីប៉ះប៉ូវ ការយឺតយ៉ាវរបស់ខ្លួន ក្នុងការប្រយុទ្ធប្រឆាំងនឹងការប្រែប្រួលអាកាសធាតុ នូវែលសេឡង់បានបង្កើន ៤ដង ប្រាក់ជំនួយអន្តរជាតិសម្រាប់ជួយបណ្តាប្រទេសដែលមានប្រាក់ចំណូលទាប ឲ្យមានសមត្ថភាពបង្ការទប់ទល់ នឹងការខូចខាត ដែលបង្កឡើងដោយសារការប្រែប្រួលអាកាសធាតុ។
តាមការប្រកាសរបស់នាយករដ្ឋមន្រ្តីនូវែលសេឡង់ លោកស្រី ហ្សាស៊ីនដា អារឌែន រដ្ឋាភិបាលរបស់លោកស្រីបានសម្រេចផ្តល់ថវិកា ១,៣ពាន់លានដុល្លារ នូវែលសេឡង់ ស្មើនឹងទឹកប្រាក់ ៩៣០លានដុល្លារអាមេរិក ដល់បណ្តាប្រទេស ដែលកំពុងប្រឈមបន្ទាន់នឹងការប្រែប្រួលអាកាសធាតុ។
នៅក្នុងសេចក្តីថ្លែងការណ៍លកាលពីថ្ងៃចន្ទ លោកស្រីនាយករដ្ឋមន្រ្តីនូវែលសេឡង់ បានអះអាងថា ពាក់កណ្តាលនៃទឹកប្រាក់ជំនួយរបស់នូវែលសេឡង់ សម្រាប់រយៈពេល ៤ឆ្នាំ (ពីឆ្នាំ ២០២២ ដល់ឆ្នាំ ២០២៥) នឹងត្រូវផ្តល់ទៅឲ្យបណ្តាប្រទេសកោះក្នុងមហាសមុទ្រប៉ាស៊ីហ្វិក ដែលមួយភាគធំរងការគំរាមកំហែង លិចបាត់ ទៅក្នុងទឹក ដោយសារការឡើងកំពស់ទឹកសមុទ្រ។ លោកស្រីអារឌែនបានបញ្ជាក់បន្ថែមថា ទឹកប្រាក់ជំនួយរបស់នូវែលសេឡង់ នឹងជួយប្រជាជនរបស់បណ្តាប្រទេសផ្សេងទៀតឲ្យអាចទប់ទល់ការខូចខាត ដែលបង្កឡើងដោយខ្យល់ព្យុះ ការឡើងកំពស់ទឹកសមុទ្រ និងហេតុការណ៍ឧតុនិយមផ្សេងទៀត ដែលអាចបង្កជាទឹកជំនន់ ទឹកភ្លៀង ឬគ្រោះរាំងស្ងួត។ មួយវិញទៀត ប្រាក់ជំនួយរបស់នូវែលសេឡង់នឹងផ្តោតសំខាន់ផងដែរ លើគម្រោងការប្រើថាមពលស្អាតស្អំ នៅតាមបណ្តាប្រទេសកំពុងអភិវឌ្ឍន៍។
ដោយបង្កើនប្រាក់ជំនួយរបស់ខ្លួន សម្រាប់កញ្ចប់ថវិកាបៃតងអន្តរជាតិ នូវែលសេឡង់ដែលមានប្រជាជនតែ ជាង ៥លាននាក់ បានចូលរួម ប្រយុទ្ធប្រឆាំង ការប្រែប្រួលអាកាសធាតុ ស្មើនឹងកម្រិតចូលរួមរបស់ប្រទេសអង់គ្លេស។ នូវែលសេឡង់បានចូលរួមក្នុងចំណោមប្រទេសមហាអំណាច ដើម្បីប្រយុទ្ធប្រឆាំងនឹងការប្រែប្រួលអាកាសធាតុ។
រដ្ឋមន្រ្តីទទួលបន្ទុកការប្រែប្រួលអាកាសធាតុរបស់នូវែលសេឡង់ លោក James Shaw ដែលត្រូវចូលរួមក្នុងសន្និសីទអន្តរជាតិស្តីពីអាកាសធាតុនៅប្រទេសអង់គ្លេសនៅចុងខែតុលា បាននិយាយថា វាជាកាតព្វកិច្ចរបស់ប្រទេសអ្នកមាន ដូចជានូវែលសេឡង់ ដែលត្រូវជួយប្រទេសដែលងាយរងគ្រោះដោយសារការប្រែប្រួលអាកាសធាតុ។
យ៉ាងណាក៏ដោយ វិបសៃតិ៍ Climate Action Tracker វាយតម្លៃថា កញ្ចប់ថវិការបស់រដ្ឋាភិបាលនូវែលសេឡង់សម្រាប់បញ្ហាអាកាសធាតុនៅតែតិចខ្លាំង ចំណែកវិធានការជាទូទៅរបស់នូវែលសេឡង់ ដើម្បីអាកាសធាតុនៅតែមិនទាន់គ្រប់គ្រាន់។
រដ្ឋមន្រ្តីនូវែលសេឡង់ទទួលស្គាល់ថា ប្រទេសរបស់លោកចាត់វិធានការយឺត បើមើលទៅលើការងារដែលគេត្រូវធ្វើ ពោលគឺធ្វើយ៉ាងណាទប់ទល់កុំឲ្យផែនដីឡើងកំដៅ ជាង ១,៥អង្សារ នៅចុងសតវត្សរ៍នេះ។ ប៉ុន្តែ បើប្រៀបធៀបនឹងប្រទេសផ្សេងទៀត នូវែលសេឡង់បានសម្រេចការងារ ដូចគេឯងដែរ នោះទោះបីជាចាប់ផ្តើមការងារយឺតជាងគេបន្តិចមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ