ពលរដ្ឋអាហ្វហ្កានីស្ថាន ជាងពាក់កណ្តាលរស់ក្នុងស្ថានភាពខ្វះចំណីអាហារស្រួចស្រាវ
អាហ្វហ្កានីស្ថាន កំពុងស្ថិតនៅលើមាត់ជ្រោះនៃវិបត្តិមនុស្សធម៌ដ៏ធ្ងន់ធ្ងរ និងអាក្រក់បំផុតនៅលើពិភពលោក ព្រោះពលរដ្ឋក្នុងប្រទេសនេះជាងពាក់កណ្តាល នឹងត្រូវធ្លាក់ក្នុងស្ថានភាពខ្វះចំណីអាហារបរិភោគ (អស្ថិរភាពស្បៀងអាហារ) នៅរដូវរងារខាងមុខ។ នេះបើតាមសម្រែកព្រមានរបស់អង្គការសហប្រជាជាតិ នៅថ្ងៃ ចន្ទទី ២៥តុលា ២០២១។
ចុះផ្សាយនៅថ្ងៃ៖
ស្តាប់ - ០២:១៦
ដោយហេតុតែភាពរាំងស្ងួតបង្កឡើងដោយការឡើងកម្តៅនៃភពផែនដី និងវិបត្តិសេដ្ឋកិច្ចដែលធ្លាក់កាន់តែដុនដាបខ្លាំងតាំងពីពួកតាលីបង់ឡើងកាន់អំណាចមក នៅពីរបីខែខាងមុខនេះ ពលរដ្ឋអាហ្វហ្កានីស្ថានប្រមាណជាង២២,៨លាននាក់ នឹងត្រូវជួបគ្រោះអស្ថិរភាពចំណីអាហារយ៉ាងស្រួចស្រាវបំផុត។ បើយើងមិនផ្តល់ជំនួយសម្រាប់រស់ទេ ជនអាហ្វហ្កានីស្ថានរាប់លាននាក់ ត្រូវបង្ខំចិត្តជ្រើសរើសរវាងការ រត់និរទេសខ្លួន ឬ រង់ចាំថ្ងៃស្លាប់ដោយភាពអត់ឃ្លាន។ នេះបើតាមការគូសបញ្ជាក់ក្នុងសេចក្តីថ្លែងការណ៍របស់នាយកប្រតិបត្តិអង្គការកម្មវិធីស្បៀងអាហារពិភពលោក ចេញផ្សាយរួមជាមួយអង្គការសហប្រជាជាតិដើម្បីស្បៀងអាហារនិងកសិកម្ម (FAO) នៅថ្ងៃ ចន្ទទី ២៥តុលា២០២១។
វិបត្តិស្បៀងអាហារនៅអាហ្វហ្កានីស្ថាន មានលក្ខណៈធ្ងន់ធ្ងរជាងនៅស៊ីរី នៅយេម៉ែន និងគ្រាន់បើជាងនៅកុងហ្កោបន្តិច។ ទោះស្ថានភាពមិនអាក្រក់ខ្លាំងជាងបំផុតនៅលើពិភពលោកមែន ប៉ុន្តែនៅរដូវរងារខាងមុខ ពលរដ្ឋអាហ្វហ្កានីស្ថានជាង៥០% នឹងធ្លាក់ដល់ដំណាក់កាលលេខបី និងលេខបួន នៃរង្វាស់វិបត្តិចំណីអាហារអន្តរជាតិ។ លេខ៣ ជាការខ្វះចំណីអាហារស្រួចស្រាវធ្ងន់ធ្ងរ និងខុសប្រក្រតី។ ចំណែកដំណាក់កាលទី៤ ជាខ្វះអាហារូបត្ថម្ភស្រួចស្រាវធ្ងន់ធ្ងរក្រៃ និងមានគ្រោះមរណដោយភាពអត់ឃ្លានច្រើន។ ដំណាក់កាលទី៥ ជាដំណាក់កាលចុងក្រោយ គឺគ្រោះទុរ្ភិក្ស។ តាំងពី អង្គការសហប្រជាជាតិចេះវិភាគទិន្នន័យអាហ្វហ្កានីស្ថានមកនេះជាលើកទីមួយ និងជាចំណាត់អាក្រក់បំផុតដែលអង្គការផ្តល់ឱ្យអាហ្វហ្កានីស្ថាន។
ដូច្នេះបើជំនួយទៅមិនដល់ទេ នោះពលរដ្ឋអាហ្វហ្កានីស្ថាននឹងត្រូវធ្លាក់ក្នុងគ្រោះទុរ្ភិក្ស។ កុមារក្រោយអាយុ៥ឆ្នាំនឹងត្រូវខ្វះអាហាររូបត្ថម្ភស្រួចស្រាវធ្ងន់ធ្ងរ នឹងមានចំនួនដល់ទៅ ៣,៨លាននាក់នៅដំណាច់ឆ្នាំ។
សហគមន៍អន្តរជាតិបានសន្យាផ្តល់ជំនួយមនុស្សធម៌ជាច្រើនរយលានដុល្លារដល់ អាហ្វហ្កានីស្ថាន ប៉ុន្តែកំពុងស្វែងរកយន្តការចែកចាយជំនួយដល់ដៃប្រជាពលរដ្ឋ ដោយពុំឆ្លងកាត់រដ្ឋាភិបាលតាលីបង់។ ក្នុងបរិបទបែបនេះ រុស្ស៊ីបានអំពាវនាវឱ្យប្រទេសលោកខាងលិច ជាពិសេសអឺរ៉ុប ឱ្យជួយជ្រោមជ្រែងអាហ្វហ្កានីស្ថាននិង ឈប់បិទបន្ថប់សេដ្ឋកិច្ចអាហ្វហ្កានីស្ថាន ដែលរំពឹងទាំងស្រុងលើជំនួយអន្តរជាតិ។ បើតាមម៉ូស្គូ ភាពអត់ឃ្លាន និងអស្ថិរភាព នឹងរុញច្រានទម្លាក់ប្រទេសទៅក្នុងជំនួញជួញដូរគ្រឿងញៀននិងភេរវកម្មដែលបុកទៅអឺរ៉ុបវិញដដែលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ