រដ្ឋាភិបាលសិង្ហបុរីឈប់ចេញថ្លៃព្យាបាលអ្នកជំងឺកូវីដ ដែលមិនព្រមចាក់វ៉ាក់សាំង
ក្នុងកាលៈទេសៈដែលប្រព័ន្ធសុខាភិបាលកំពុងរងសម្ពាធខ្លាំងដោយសារចំនួនអ្នកជំងឺកូវីដ រដ្ឋាភិបាលសិង្ហបុរីបានសម្រេចឈប់ចេញថ្លៃព្យាបាលអ្នកជំងឺកូវីដណា ដែលធ្លាប់បដិសេធ មិនចាក់វ៉ាក់សាំងបង្ការជំងឺកូវីដ១៩។ តាមសេចក្តីប្រកាសព័ត៌មានរបស់ក្រសួងសុខាភិបាល សិង្ហបុរី ចុះផ្សាយ កាលពីថ្ងៃចន្ទទី ៨វិច្ឆិកា អ្នកជំងឺកូវីដដែលមិនបានចាក់វ៉ាក់សាំង ដោយសារហេតុផលផ្ទាល់ខ្លួន នឹងត្រូវបង់ថ្លៃព្យាបាល ដោយខ្លួនឯង គឺលែងមានជំនួយ ពីរដ្ឋដូចមុន។
ចុះផ្សាយនៅថ្ងៃ៖
ស្តាប់ - ០២:១៨
ប្រឈមនឹងរលកឆ្លងថ្មី នៃជំងឺកូវីដ១៩ សិង្ហបុរីដែលមានអ្នកឆ្លងថ្មីពី២០០០ទៅ ៣០០០នាក់ក្នុងមួយថ្ងៃ បានសម្រេចចាត់វិធានការតឹងរ៉ឹងសម្រាប់អ្នកដែលបដិសេធ មិនព្រមចាក់វ៉ាក់សាំងបង្ការជំងឺកូវីដ១៩។
តាំងពីកើតមានវិបត្តិជំងឺឆ្លងកូវីដ រដ្ឋាភិបាលសិង្ហបុរីបានចេញថ្លៃទាំងស្រុង សម្រាប់ថ្នាំ និងការព្យាបាលអ្នកជំងឺកូវីដ ជាតិសិង្ហបុរី ប៉ុន្តែ លើកលែងតែអ្នកឆ្លង ដែលទើបធ្វើដំណើរមកពីបរទេស។ ប៉ុន្តែ ចាប់ពីថ្ងៃទី ៩ធ្នូ (ខែក្រោយ) រដ្ឋាភិបាលនឹងឈប់ចេញថ្លៃព្យាបាល សម្រាប់អ្នកជំងឺកូវីដណាដែលមិនបានចាក់វ៉ាក់សាំងទាល់តែសោះ។ សម្រាប់អ្នកដែលបានចាក់វ៉ាក់សាំង មួយដូស រដ្ឋាភិបាលនឹងបន្តចេញថ្លៃព្យាបាលរហូតដល់ថ្ងៃទី ៣១ធ្នូ ចុងឆ្នាំនេះ។ បន្ទាប់ពីនោះ ពួកគេត្រូវពឹងអាស្រ័យលើក្រុមហ៊ុនធានារ៉ាប់រងឯកជនសម្រាប់បង់ថ្លៃព្យាបាលជំងឺកូវីដ។
នៅក្នុងសេចក្តីប្រកាសព័ត៌មាន កាលពីថ្ងៃចន្ទ ក្រសួងសុខាភិបាលសិង្ហបុរីបានពន្យល់ការសម្រេចចិត្តរបស់រដ្ឋាភិបាល ដោយយោងទៅលើស្ថានភាពនៅមន្ទីរពេទ្យ នៅសិង្ហបុរី ដែលកំពុងរងសម្ពាធខ្លាំង ដោយសារការកើនឡើងនៃចំនួនអ្នកជំងឺកូវីដ។ ជាទូទៅ អ្នកជំងឺ ដែលមិនបានចាក់វ៉ាក់សាំងបង្ការកូវីដទាល់តែសោះ បានធ្លាក់ខ្លួនឈឺធ្ងន់ធ្ងរ ដែលទាមទារការព្យាបាលជាប់ជានិច្ច។ ការណ៍នេះបានដាក់សម្ពាធខ្លាំងលើប្រព័ន្ធមន្ទីរពេទ្យសិង្ហបុរី។
សិង្ហបុរី ជាប្រទេសនាំមុខគេក្នុងលោក ខាងមានប្រជាជនចាក់វ៉ាក់សាំងបង្ការជំងឺកូវីដ។ ៨៥%នៃប្រជាជនសិង្ហបុរី ដែលមានប្រមាណ ៥លាន ៥សែននាក់ បានចាក់ថ្នាំបង្ការកូវីដពេញលេញ។
ប៉ុន្តែ ជាមួយគោលនយោបាយ ដែលតម្រូវឲ្យរៀនរស់ជាមួយជំងឺកូវីដ និងវត្តមានមេរោគកូវីដ បំប្លែងខ្លួន Deltaដែលឆ្លងលឿន និងគ្រោះថ្នាក់ជាងមេរោគដើម សិង្ហបុរីកំពុងប្រឈមនឹងការកើនឡើងកាន់តែច្រើន នៃចំនួនអ្នកឆ្លងជំងឺកូវីដ។
នៅក្នុងសេចក្តីថ្លែងការណ៍កាលពីថ្ងៃចន្ទ ក្រសួងសុខាភិបាលសិង្ហបុរីបានបញ្ជាក់ដែរថា រដ្ឋនៅតែបន្តចេញថ្លៃព្យាបាលសម្រាប់អ្នកជំងឺកូវីដ ដែលបានចាក់វ៉ាក់សាំងរួចហើយ និងអ្នកជំងឺកូវីដដែលជាកុមារ អាយុ ក្រោម ១២ឆ្នាំ ដែលគេមិនបានតម្រូវឲ្យចាក់វ៉ាក់សាំងបង្ការកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ