ជនភៀសខ្លួនរ៉ូហ៊ីងយ៉ាប្តឹងហ្វេសប៊ុកទារសំណង១៥០ពាន់លានដុល្លារ
នៅថ្ងៃចន្ទទី ៦ ធ្នូ ២០២១នេះ ក្រុមជនភៀសខ្លួនរ៉ូហ៊ីងយ៉ាបានដាក់ពាក្យបណ្តឹងប្រឆាំងនឹងក្រុមហ៊ុនហ្វេសប៊ុក នៅតុលាការរដ្ឋកាលីហ្វ័រញ៉ា។ ក្នុងបណ្តឹង ក្រុមជនភៀសខ្លួនរ៉ូហ៊ីងយ៉ាបានទាមទារសំណងជំងឺចិត្តជាទឹកប្រាក់ចំនួន ១៥០ពាន់ដុល្លារ ពីបណ្តាញសង្គមហ្វេសប៊ុក ពីបទបានបណ្តោយឱ្យមានការផ្សព្វផ្សាយសារស្អប់ខ្ពើមជនជាតិភាគតិច។
ចុះផ្សាយនៅថ្ងៃ៖
ស្តាប់ - ០២:២៥
ហ្វេសប៊ុកប្រៀបដូចជាម៉ាស៊ីនដែលមានកម្មវត្ថុតែមួយ គឺពង្រីកអភិវឌ្ឍន៍។ តែការអភិវឌ្ឍលូតលាស់របស់ហ្វេសប៊ុក មានបណ្តុះទៅដោយភាពស្អប់ខ្ពើម បែងចែង និងព័ត៌មានមិនពិត ដែលប៉ះពាល់ដល់ជីវិតរបស់ជនជាតិភាគតិចរ៉ូហ៊ីងយ៉ា រាប់ម៉ឺននាក់។ នេះបើតាមសំណេរប្តឹងរបស់ក្រុមជនភៀសខ្លួនរ៉ូហ៊ីងយ៉ា ទៅកាន់តុលាការរដ្ឋកាលីហ្វ័រញ៉ា ទីដែលហ្វេសប៊ុកមានទីស្នាក់ការធំនៅទីនោះ។
ពាក្យបណ្តឹងបានសង្កត់ធ្ងន់ទៀតថា បច្ចេកវិទ្យារបស់ក្រុមហ៊ុនហ្វេសប៊ុក បានសម្រួលឱ្យមានការផ្សព្វផ្សាយព័ត៌មានមិនពិត និងការផ្សព្វផ្សាយទ្រឹស្តីបែបជ្រុលនិយម លើបណ្តាញសង្គម ដែលពាក្យទាំងនោះបានប្រែក្លាយទៅជាអំពើហិង្សានៅក្នុងសង្គមរស់នៅជាក់ស្តែង។ ស្ថានភាពបែបនេះ បានរុញច្រានឱ្យក្រុមអ្នកមាននិន្នាការជ្រុលនិយមបន្តិចស្រាប់ កាន់តែជ្រុលនិយមខ្លាំងឡើង និងកាន់តែបានដៃសម្រាប់ក្រុមមេដឹកនាំជ្រុលនិយម និងផ្តាច់ការនិយម។ នេះបើតាមខ្លឹមសារនៃបណ្តឹងរួមរបស់ក្រុមជនភៀសខ្លួនរ៉ូហ៊ីងយ៉ាដដែល។
អង្គការការពារសិទ្ធិមនុស្សបានបន្ទោសតាំងពីយូរមកហើយថាបណ្តាញសង្គមហ្វេសប៊ុក មិនបានបញ្ចេញសកម្មភាពគ្រប់គ្រាន់ក្នុងការប្រយុទ្ធប្រឆាំងនឹងការផ្សព្វផ្សាយព័ត៌មានមិនពិត និងព័ត៌មានភូតភរ។ អ្នករិះគន់ខ្លះបានថែមទាំងធ្លាប់បានចោទប្រកាន់ហ្វេសប៊ុកថា ទោះបីមានសញ្ញាបញ្ជាក់អំពីខ្លឹមសារបែបរើសអើងស្អប់ខ្ពើមគ្នាក្តី ក៏ក្រុមហ៊ុនមិនខ្វល់អើពើដែរ គឺទុកបណ្តោយរហូតមានការគាបសង្កត់ធ្វើបាបជនជាតិភាគតិច ឬឥទ្ធិពលលើលទ្ធផលបោះឆ្នោតណាមួយ។ ភាពអសកម្មរបស់ហ្វេសប៊ុកដែលបានជំរុញឱ្យអ្នកទទួលខុសត្រូវម្នាក់ដើរចេញពីក្រុមហ៊ុន និងឡើងទៅប្រកាសនៅមុខសភាអាមេរិកកាលពីខែឧសភា ថាក្រុមហ៊ុនហ្វេសប៊ុកទាក់ទាញឱ្យមានអំពើហិង្សាជាតិពិន្ធុ នៅក្នុងបណ្តាប្រទេសខ្លះ។
ហ្វេសប៊ុកមិនទាន់បញ្ចេញប្រតិកម្មអ្វីទេទៅនឹងបណ្តឹងរបស់ជនជាតិរ៉ូហ៊ីងយ៉ាទេ។ ហើយបើតាមច្បាប់អាមេរិក ហ្វេសប៊ុកគ្មានទំនួលខុសត្រូវអ្វីនៅចំពោះសារដែលអ្នកប្រើប្រាស់បង្ហោះលើបណ្តាញឡើយ។ ប៉ុន្តែបណ្តឹងរបស់ក្រុមជនភៀសខ្លួនរ៉ូហ៊ីងយ៉ានេះអាចនឹងទទួលបានការចាប់អារម្មណ៍ពិសេសពីតុលាការអាមេរិកព្រោះជនជាតិរ៉ូហ៊ីងយ៉ា មិនបានទទួលការការពារអ្វីទាំងអស់ ពីច្បាប់ភូមា។
សូមបញ្ជាក់ថា ជាជនជាតិភាគតិចកាន់សាសនាអ៊ីស្លាម រស់នៅរាប់ជំនាន់ក្នុងប្រទេសភូមា តែគ្មានសញ្ជាតិ គ្មានប្រទេស គ្មានសិទ្ធិសេរីភាពអ្វីទាំងអស់ និងត្រូវរស់ក្រោមការបង្ក្រាបយ៉ាងហិង្សា ក្នុងនាមជាជនខុសច្បាប់ពីសំណាក់របបសឹកភូមា និងរងការរើសអើងយ៉ាងខ្លាំងក្នុងប្រទេសដែលប្រជាជនភាគច្រើនជាអ្នកកាន់សាសនាព្រះពុទ្ធ។ ជនភៀសខ្លួនរ៉ូហ៊ីងយ៉ា បដិសេធមិនត្រលប់ទៅស្រុកកំណើតវិញទេ ដរាបណាគ្មានការធានាសន្តិសុខនិងសមភាពតាមផ្លូវច្បាប់។ ពួកគេសុខចិត្តរស់នៅក្នុងជំរំរខេករខាកនៅព្រំប្រទល់ប្រទេសបង់ក្លាដែស តាំងពីឆ្នាំ ២០១៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ